Aposkạmi 23 - সান্তালী বাইবেল

¹ Pạul do maraṅ bạisiren hoṛko secʼ beṅgetʼkateye menkeda, “E ińren boehako, iń do teheń hạbicʼ bhage hudiste Isor samaṅre ińakʼ dạyikiń manao ạguakada.”

² Noa katha ańjomkate maraṅ naeke Ananiạs do sorre teṅgo akanko mocare thapaye lạgitʼe hukumatʼkoa.

³ Unre Pạul do Ananiạse metadea, “E phạsiạra, Isor hõ ame thapamea. Ạn lekate ińakʼ bicạr lạgitʼ am do onḍem duṛupʼ akana, menkhan daleń reakʼem hukumetʼte amge coṅ ạn mam rạputʼetʼkan.”

⁴ Pạul ṭhen teṅgo akanko doko menkeda, “Am do Isorren maraṅ naekeyem bemanot edekana?”

⁵ Unre Pạule menkeda, “E boehako, bạń baḍaekan tahẽkana uni doe maraṅ naekekana. Ariń baḍae lekhan ona katha do bạń menkea, ente sonot sostorre ol menakʼa, ‘am jạtren mukhiyạ reaṅ bạṛicʼ do alom roṛa.’ ”

⁶ Ona bạisiren mitʼ dol do Sạdukiko ar eṭakʼ dol do Phạrusi menakʼkoa menteye baḍaeketʼ khan Pạul do maraṅ bạisi talare ãṭ aṛaṅteye menkeda, “E boehako, iń do mitʼṭen Phạrusi hoṛ kạnạń ar Phạrusikoren hoponge. Ińakʼ bicạr do hoyokʼ kana, ente ińiń pạtiạukʼ kana, gocʼko do arhõko jiwetʼ beredokʼa.”

⁷ Uniyakʼ noa katha iạte Phạrusi ar Sạdukiko talare jhogṛa ehopʼena. Onate maraṅ bạisiren hoṛ doko hạṭińena,

⁸ ente Sạdukikoko mena, “Gocʼko do ar bako jiwetʼ beredokʼa.” Ona chaḍa arhõko mena, serma goḍetko hõ bạnukʼkoa, jãhãn jiuko hõ bạnukʼkoa; menkhan Phạrusiko do noa sanamakʼgeko pạtiạuakʼa.

⁹ Unre maraṅ gulmal hoyena ar Phạrusi dolren adom sostor baḍaeko doko teṅgoyente ạḍiko rapṭa rạpṭiyena. Onkoko menkeda, “Ale do nui hoṛakʼ jãhãn dosge bale ńametʼtaea. Hoedaṛeakʼa jãhãn jiu se sermaren goḍet do uni sãoteye galmarao akada.”

¹⁰ Ona jhogṛa do nonka sạrdi idiyena je, maraṅ subedar doe botorena ente onko do Pạulko or cirạ botejea. Uni do palṭonkoe hukumatʼkoa jemon senkate hoṛkoakʼ ti khon Pạulko chingạu ạguiyete palṭon gaṛteko idiye.

¹¹ Dosar hilokʼ ńindạ Probhu Isor do Pạul ṭhen teṅgoyenteye metadea, “Dil joṅme, Jerusalemre cetʼleka iń reaṅ goham emakatʼ onkage Romre hõ ińakʼ goha emokʼ hoyokʼtama.”

Pạul goje reakʼko soṛojontroyetʼ

¹² Ado dosar hilokʼ setakʼ bela Jihudiko do mitʼṭecʼko soṛojontrokeda ar Pạul ạuriko goje hạbicʼ cetʼge bako jom ńũiya menteko kiriạyena.

¹³ Onko do pongel khon hõ bạ̃ṛti hoṛko tahẽkana.

¹⁴ Onko do maraṅ naekeko ar Jihudiren murubbiko ṭhen senkateko menkeda, “Pạul ạurile goje hạbicʼ cetʼge bale joma mentele kiriyạ akana.

¹⁵ Ńitokʼ ape ar maraṅ bạisiren hoṛko noa babotre arhõ mońj okocʼte tojbija mente ape samaṅre Pạul ạguiye lạgitʼ maraṅ subedar ṭhen khobor kolpe. Ar nonḍe ạuriye seṭerokʼrege uni goje lạgitʼ sapṛao akanle tahena.”

¹⁶ Menkhan Pạul miseratren hopontetʼ do noa soṛojontro reakʼ katha ańjomkate palṭonkoakʼ gaṛteye calaoena ar ona katha Pạule baḍae ocokedea.

¹⁷ Unre Pạul do mitʼṭen subedar hohowadeteye metadea, “Nui koṛa do maraṅ subedar ṭhen idiyem. Uni ṭhen thoṛa katha roroṛteakʼ menakʼtaea.”

¹⁸ Unre subedar do uni koṛa maraṅ subedar ṭhene idikedea are metadea, “Pạul ińe hohowạdińte nui koṛa am ṭhen ạguiye reakʼe metadińạ, ente uni do am ṭhen thoṛa roroṛteakʼ menakʼtaea.”

¹⁹ Maraṅ subedar do tire sapʼkate mitʼ secʼe idikedeteye metadea, “Cetʼ mitạńem meneda?”

²⁰ Uni koṛa doe menkeda, “Jihudikoko goṭa akada, Pạul reaṅ mońj okocʼte tojbij lạgitʼ gapa arhõ maraṅ bạisite idiye lạgitʼko nehõrama.

²¹ Am do onkoakʼ katha alom senakʼa, ente pongel khon hõ bạ̃ṛti hoṛ do Pạul lạgitʼ tãṛãkʼ akan menakʼkoa. Noko hoṛ do Pạul ạuriko goje hạbicʼ cetʼge bako jom ńũiya menteko kiriạ akana. Arko sapṛao akana ar am ṭhen khon kathako ńel hohorkana.”

²² Maraṅ subedar do uni koṛa noa menkateye bidạkadea, “Am do noa katha ińem baḍae ocoakadiń ona do okoe ṭhen hõ alom lạiya.”

Pạul Kạsạriạteye kol ocokʼkan

²³ Maraṅ subeder do acʼren barea subedar hohowatʼkinteye metatʼkinạ, “Bar sae palṭon, eaegel aswariko ar barsae borlom palṭonko teheń ńindạ are baja okte Kạisạriạte calakʼ lạgitʼ ben sapṛao dohokoa.

²⁴ Ar Pạul hõ sadom ben bebostaea jemon napaete disạm cakʼlaoyicʼ Pheliks ṭhenpe idi seṭer daṛeae.”

²⁵ Maraṅ subedar do noa ciṭhiye olkeda:

²⁶ “Iń do Klạudius Lusius, maraṅ disạm cakʼlaoyicʼ Pheliks ṭhen noa ciṭhiń oletʼkana. Ińakʼ johar ataṅtińme.

²⁷ “Jihudiko do nui hoṛ sapʼkateko gojekan tahẽkana, menkhan iń do ińren palṭonko idikate uniyiń bańcao ạgukedea, enteń baḍaekeda uni do mitʼṭen Romi hoṛ kanae.

²⁸ Ar baḍae sanakedińa cedakʼko dusiyede kana mente. Onate uni do onkoakʼ maraṅ bạisireń idikedea.

²⁹ Ariń baḍaekeda, onkoakʼ dhorom reakʼ ạn-ạriko babotre uniko dusikedea, menkhan gocʼ ocokʼ se hajotre bhorao ocokʼ leka jãhãn dos do bạnukʼtaea.

³⁰ Ar uni upạrte soṛojontro reakʼ kathań baḍaeketʼ khan iń do am ṭheniń kolkedea. Ar okoe uniko dusiyedekan onko hõń hukumatʼkoa jemon nuiakʼ dos reaṅko lạiyam.”

³¹ Unre maraṅ subedarakʼ hukum leka Pạul do ńindạge ako sãote Antipatris nagraha hạbicʼko idikedea.

³² Ar dosar hilokʼ onko do aswariko sãote Pạulko kolkedete palṭon gaṛteko ruạṛ calaoena.

³³ Ar aswariko do Kạisạriạreko seṭeren khan ciṭhi do disạm cakʼlaoyicʼko emadea ar Pạul hõ uniyakʼ tireko jimạkadea.

³⁴ Disạm cakʼlaoyicʼ do ciṭhiye paṛhaoketʼ khan Pạul oka jaegaren hoṛ kanae menteye kulikedea. Ar Pạul do Kilikiạ disạmren hoṛ kanae menteye baḍaeketʼ khan uni doe menkeda,

³⁵ “Okoe hoṛko amko dusiakatʼme onko nonḍeko hecʼlen tayom iń do amakʼ kathań ańjoma.” Tayomte uni do Herod rajakʼ hajotre Pạul horhoye lạgitʼe hukumatʼkoa.