Aposkạmi 2 - সান্তালী বাইবেল

Celako sonot Jiuko ńamekan

¹ Niạ thoṛa din tayom Pentekosṭ porob reakʼ dinre celako do mitʼ ṭhenko jarwa mitʼakan tahẽkana.

² Unre ackage serma khon tạpis hoe reakʼ hud hud saḍe leka mitʼṭecʼ saḍe hecʼena ar onko okareko tahẽkan ona oṛakʼ do saḍete perecʼena.

³ Ar celakoko ńelkeda seṅgel reakʼ alaṅ leka cetʼ coṅ hạṭińokʼkana ar onako do hoṛo hoṛo apʼatʼkoa.

⁴ Onate onko jotoge sonot Jiuteko perecʼena ar uni Jiue danatʼko daṛe leka eṭakʼ eṭakʼ pạrsite roroṛko ehopʼena.

⁵ Ona oktere dhạrti reakʼ aema disạm khon Isor bhokti Jihudiko do Jerusalemre hecʼkateko girobasokʼkan tahẽkana.

⁶ Onko do ona saḍeko ańjomkeda ar ḍherkoge onḍeko jarwayena. Ar apan ạpin pạrsite celako katha roroṛko ańjomketʼko khan onko doko tharbasaoena.

⁷ Onko do ạḍi hahaṛayenteko menkeda, “Katha roroṛkanko do cetʼ jotoge Gạlilren doko baṅkana?

⁸ Ar onka kan khan abo do cekate apan ạpin pạrsite onkoakʼ moca khon katha bon ańjomeda?

⁹ Parthiko, Mediko, Elamiko ar Mesopotamiare berelakan hoṛko, Jihudạ ar Kapadokiạren, Pontos ar Asiạren,

¹⁰ Phrugiạ ar Pamphuliạren, Misor ar Kurene senakʼ Lubiạ reakʼ adom jaegaren hoṛko, ar Rom nagrahare upriạ Jihudiko ar Jihudi dhoromreko pạtiạu akan boṅgan hoṛ jạtrenko,

¹¹ Kret dipren hoṛko ar Arobrenko; abo sanamkoge coṅ aboakʼ nij nij pạrsite Isorakʼ maraṅ kạmiko reakʼ katha roroṛkan bon ańjometʼko.”

¹² Onko do hahaṛa arko tharbasaoente ako akore kupulikʼko ehopʼena, “Noa reakʼ mane do cetʼkana?”

¹³ Arhõ eṭakʼko do celakoko cigạriwatʼkoteko menkeda, “Onko do bubulakʼteko ńu bhuteṛ akana.”

Hoṛko ṭhen Patrasakʼ katha

¹⁴ Unre Patras do onko gelmitʼ celako sãote teṅgokate ãṭ aṛaṅte hoṛkoe metatʼkoa, “E Jihudiren hoṛko ar okoe do Jerusalemrepe tahenkan, ape do baḍae dohokakʼpe ar monte ińakʼ kathako ańjompe.

¹⁵ Ape dope hudisetʼkana noko doko bul akana, menkhan ona do baṅ; ente ńitokʼ ma setakʼ are baja hoyakan.

¹⁶ Noa do ona ghoṭna leka, one okoeyakʼ katha Joel nạbi hotete roṛlen,

¹⁷ ‘Mucạtʼ dinkore iń do sanam hoṛko cetanre ińren Jiu iń dulea; onate aperen hopon ar hoponerako do nạbi lekate Isorakʼ kathako lạiya, ar aperen juạnko do dorsonko ńama, ar aperen murubbiko do kukmũko ńela.

¹⁸ Onako dinre ińren guti ar kạ̃ṛmĩko cetanre hõ ińren Jiu iń dulea, ar onko do nạbi lekate kathako roṛa.

¹⁹ Iń do coṭ sermare hahaṛawakʼ ghoṭnakoń uduga, ar dhạrtire hõ ạḍi lekan cinhạkoń hoeocoya; metakʼme mãyãm, seṅgel ar aema dhuạ̃koń ńel ocoya.

²⁰ Probhu Isorakʼ ona maraṅ ar ṭhonokte perecʼ dinko hijukʼ lahare, siń cando doe ńutokʼa; ar ńindạ cando do mãyãm lekae hoyokʼa.

²¹ Ar bańcao ńam lạgitʼ, Probhu Isor okoeye hohowae uni doe bańcaokʼa.’

²² “E Israelko, noa katha ańjompe. Nasaretren Jisu hotete Isor do ape talare bhage ar hahaṛa kạmikote ape ṭhene sạbud akada je, uni do Jisui kolledea; ar noa katha do ape hõpe baḍaegea.

²³ Isor, okoe do laharege jotowakʼe baḍaekan, uni do laharegeye ṭhik dohoakatʼ tahẽkana je, apeakʼ tire Jisui soprotea. Ar ape hõ bạṛicʼ hoṛko hotete unipe kuruskedea arpe gocʼ ocokedea.

²⁴ Menkhan Isor do gujukʼ reakʼ bedon khon khalaskate uniye jiwetʼ beretʼkedea, ente uni sapʼ dohoye reakʼ ektiạri gujukʼakʼ do bạnukʼtaea.

²⁵ Dạud do uni reaṅe menakada, ‘Probhu Isor do jaoge iń samaṅreń ńelekana; uni do ińakʼ jojomsa aṛere menaete iń doń ṭarhao akana.

²⁶ Noa iạte ińakʼ mon do rạskạte perejokʼ kana, ińakʼ alaṅ do rạskạ reakʼ kathae roṛa, ar ińakʼ hoṛmo hõ aste bańcaokʼtińạ;

²⁷ ente patal purire do bam giḍiyińạ, ar amren sonoticʼakʼ hoṛmo hõ bam nosṭo ocoya.

²⁸ Am do jion reakʼ horkom baḍae ocokedińạ; ar cepel cepel rạskạ do am mẽtʼãhã samaṅrege menakʼa.

²⁹ “E boehako, noa katha do khạṭigeń men daṛeakʼa je, raj bõsren baba Dạud doe gocʼena ar topa hõe topa ocoakana ar uniyakʼ topa do teheń hõ nonḍe menakʼa.

³⁰ Uni do mitʼṭen nạbiye tahẽkana, are baḍaekan tahẽkana Isor do kiriạkate noae gokʼade tahẽkana je, uniyakʼ siṅghạsonre uni bõsrenge mitʼṭen hoṛe duṛubea.

³¹ Ar tayomte cetʼ hoyokʼa onae ńelletʼte uni do gocʼko khon Mạsiyakʼ arhõ jiwetʼ beredokʼ reaṅe roṛleda, Mạsi do patal purire hõ bae doho giḍi ocolena ar hoṛmo hõ baṅ sealentaea.

³² Uni Jisuge Isor doe jiwetʼ beretʼkedea, ar ale do sanamkoge uniren gohako kanale.

³³ Isorakʼ jojomsa aṛere duṛubokʼ reakʼ ṭhonok do unigeye dan akawadea are gokʼade tahẽkana sonot Jiu do Isor Baba ṭhen khongeye ńam akadea; ar ńitokʼ ape okape ńeletʼkan arpe ańjometʼkan ona do Jisugeye emakana.

^34-35 Dạud acʼ do sermate bae rakapʼ calao akan tahẽkana, menkhan uni doe menakada, ‘Probhu Isor do ińren Probhui metae kana, tin hạbicʼ amren bạiriko amakʼ jaṅga latarre bạń dohoko unhạbicʼ am do ińakʼ jojomsa aṛere durupʼme.’

³⁶ “Onate sanam Israel jạtrenko do noa katha khạṭiteko baḍaema je, ape okoepe kuruslede Isor do uni Jisuge Probhu hõ ar Mạsi hõe hoyoco akedea.”

³⁷ Noa katha ańjomkate hoṛko do monre dukko ńamkeda. Onko do Patras ar eṭakʼ apostolkoko kuliketʼkoa, “E boehako, ale do cetʼle cekaea?”

³⁸ Patrase roṛ ruạṛatʼkoa, “Kại khon mon ạcurtape ar Jisu Mạsi ńutumte bạptisokʼpe. Ar ape do dan lekate sonot Jiupe ńamea.

³⁹ Ape lạgitʼ, aperen gidrạ lạgitʼ ar okoe do sạṅgińre menakʼko, metakʼme aboren Probhu Isor do okoeko acʼren hoṛ hoyokʼ lạgitʼe hohowako, onko sanamko lạgitʼ noa gokʼakʼ do emakana.”

⁴⁰ Ona chaḍa arhõ ạḍi utạr kathakote Patras do goha emokʼe ehopʼena. Uni do noa menkate bujhạu ocokoe kurumuṭukeda, “Niạ peṛta piṛhiren hoṛko khon apnarte bańcaokʼpe.”

⁴¹ Ado uniyakʼ kathare okoeko pạtiạuen onko doko bạptisena ar enhilokʼ onko sãote pe hajar hoṛko juṭucʼena.

Biswạsikoakʼ cạl colon

⁴² Onkoko hoṛ do apostolkoakʼ cecetʼakʼko ańjometʼkan tahẽkana, ar onko sãote mitʼte Probhu kedokʼko ataṅetʼ tahẽkana ar koejoṅre jamaṛ akanko tahẽyena.

⁴³ Ar sanamkoge botor caṛhaoatʼkoa, ar apostolko do ạḍi utạr hahaṛa kạmi ar cinhạ kạmiko ehopʼena.

⁴⁴ Ar sanam biswạsikoge mitʼ soṅgeteko tahenkan tahẽkana ar jotowakʼge apan ạpin jạruṛakokan lekako beboharetʼ tahẽkana.

⁴⁵ Onko do akoakʼ khet baṛge ar dhon-duribko ạkhrińkate mimitʼkoakʼ jạruṛokʼakʼ lekako em hạṭińako kan tahẽkana.

⁴⁶ Onko do din hilokʼ mundilreko jarwakʼkan tahẽkana ar oṛakʼ oṛakʼ piṭhạ kecag tulucʼ rạskạ salakʼ soṛa monte mitʼteko jom ńũiyetʼ tahẽkana.

⁴⁷ Onko do jao ghuṛi Isorko sarhaoede tahẽkana ar sanam hoṛge onkoko manotetʼko tahẽkana. Ar okoe kại khon bańcaokʼko ńametʼ tahẽkan Probhu do biswạsiko tulucʼ jao hilokʼ onkoe juṭucʼ idiketʼkoa.