Amos 9 - সান্তালী বাইবেল

Israel do dhaṅdhaserokʼa

¹ Probhu Isor do pinḍ aṛere teṅgo akaniń ńelkedea. Uniye metadińa, “Khunṭi chatnako kuṭạmme jemon duạr saṅgako daldalaokʼte sanam hoṛkoakʼ bohokʼ cetanre rạputʼ ńurokʼ. Okoe jiwetʼko tahen onko do tarwaṛeteń gocʼkoa. Onko do celege bako ńir phoṛokʼa ar celege bako dạṛ paskaokʼa.

² Onko do Sheol hạbicʼko la bololenre hõ ińakʼ ti do onḍe khon hõe oḍok ạgukoa. Ar coṭ sermateko rakapʼlenre hõ onḍe khoniń pheḍ ạgukoa.

³ Karmel buru muthnire apnartetʼko okolenre hõ iń do onḍe khoniń sendra oḍokkoa ariń sapʼạgukoa. Onko do jalapuri latarreko okolenre hõ onko gerko lạgitʼ bińiń hukumakoa.

⁴ Bạiriko hotete eṭakʼ disạmteko bondi idi ocolenre hõ onko gocʼko lạgitʼ tarwaṛeń hukumaea. Bhạlại lạgitʼ do baṅ menkhan bin bhạlại lạgitʼ onko cetanre mẽtʼ do tahentińạ.”

⁵ Phạdkoren Probhu Isor do dhạrtiye joṭetʼ lekhan ona do le cabakʼa ar onare girobasokʼ kan sanamgeko homor halaṅa. Uniyakʼ joṭetʼte goṭa dhạrtige Misor reakʼ nil gaḍa dakʼ leka se rakabokʼa ar ona tayom do pheḍ calakʼa.

⁶ Uni do sermare acʼakʼ usul oṛakʼe benao akada ar dhạrti cetanre chamḍa leka sermae aṭetʼ akada; uni do jalapuri reakʼ dakʼe hoho ạguiyetʼa ar otreye dul bubhạu ocoyeda. Ar okoe noakoe kạmikan uniyakʼ ńutum do Probhu Isorge.

⁷ Probhu Isore meneda, “E Israelren hoṛko, ape do cetʼ Kusrenko leka dope baṅkana? Iń do cetʼ Misor khon Israelko, Kapthor khon Philisṭiko ar Kir khon Aramrenko bạń ạguakatʼkoa?

⁸ Ińakʼ mẽtʼ do khạṭige niạ ghạṭte perecʼ rajosṭi cetanre menakʼa. Dhạrti khon iń do onań marao giḍikakʼa; enhõ Jakobakʼ bõs do purạte bạń marao utạra.

⁹ Iń do hukumiń emokʼa, ar calate guhum cetʼlekako calae onkage sanam jạtrenko tala khon Israel bõsrenkoń calakoa, menkhan muṭkuri do mitʼṭecʼ hõ otre baṅ ńurokʼa.

¹⁰ Ińren sanam kại hoṛko modre okoeko men, ‘muhin do bae tiyokʼlea se ale ṭhen baṅ hijukʼa,’ onko sanamge tarwaṛeteko gujukʼa.”

Israelakʼ bańcaokʼ

¹¹ Probhu Isore meneda, “Enhilokʼ Dạudakʼ lạnduṛ akan oṛakʼ do arhõń beretʼ ruạṛa. Uniyakʼ rạputʼ ṭhạ̃ikoń jut aroya, ar dhaṅdhaserakʼ koń ṭhika ar lahate lekageń beretʼ ruạṛa.

¹² Jemon Israelko do Edomren sarecʼ hĩs ar eṭakʼ jạtrenkoakʼ disạmko ạidạri daṛeakʼ.” Probhu Isor, okoe do noakoe kạmikan, unige noa katha doe meneda.

¹³ Probhu Isor do arhõe meneda, “Onako dinge darae kana tinre phosolko nunạkʼ ḍher hoyokʼa je, onako ạuri ir cabaerege arhõ cas lạgitʼ okte hijukʼa ar darkha jo hõ nunạkʼ jokʼa je, ona ạuriko len cabaerege arshõ rohoe okte hijukʼa. Maraṅ buruko khon nãwã darkha rasa ńamokʼa ar huḍiń buruko khon do ạtu ãṛgona.

¹⁴ Bondi dosare menakʼko ińren hoṛ Israelkoń ruạṛ ạgukoa; onko do dhaṅdhaser akan nagraha arhõko benao aroea ar onakoreko tahena. Onko do darkha bagwanko benaojoṅa arko ńũiya; onko do bagwanko benaoa ar ona reakʼ joko joma.

¹⁵ Israelko do akoakʼ disạmre dare lekań rohoekoa; okaṭakʼ disạmiń em akawatʼko onḍe khon onko do ar tishõ bako or totʼ giḍi ocokʼa.” Noa katha do aperen Probhu Isorgeye meneda.