Amos 8 - সান্তালী বাইবেল

Mitʼ ḍạlicʼ jo

¹ Probhu Isor do ar mitʼṭecʼ dorsone udukʼạdińa. Iń doń ńelkeda, mitʼ ḍạlicʼ jo.

² Uni doe kulikedińa, “Amos, am do cetʼem ńeleda? Iń doń roṛ ruạṛkeda, “Mitʼ ḍạlicʼ jo.” Unre Probhu Isor do ińe metadińạ, “Ińren hoṛ Israelakʼ okte do caba hecʼakana; iń do ar bạń sa paromkoa.

³ Enhilokʼ mundil reakʼ sereńko do jare jare hoyokʼa, ar ‘mạ̃ṛĩko do aemage hoyokʼa; ar onako do hape hapete goṭa ṭạnḍi giḍi akan tahena.’ ”

⁴ Ape okoe do laṅgaṭkope lebetʼ gańjaoetʼko ar reṅgecʼ orecʼkope caba utạrletʼko, ape baṛe ańjompe.

⁵ Ape dope menetʼkana, “Molokʼ cando do tis baṅ cabakʼ jemon jomakʼle ạkhriń daṛeakʼ? Sabath din baṅ tis paromokʼ jemon bajarre senkate guhumle ạkhriń daṛeakʼ? Ale do sosoṅakʼ baṭkharale komaotalea, ar damle ḍhera, ar ṭhoka reakʼ tulạkole beohara,

⁶ rupạte reṅgecʼ hoṛle kirińkoa ar mitʼ joṛa panahete laṅgaṭkole kirińkoa ar jokʼ giḍiyakʼ guhum do onko ṭhenle ạkhrińa.”

⁷ Probhu Isor, okoe doe Jakobren ṭhonokanicʼ kan, uni do kiriạkateye meneda, “Onko okako kạmi akatʼ ona do tishõ bạń hiṛińokʼa.

⁸ Noa iạte cetʼ disạm do baṅ daldalaokʼa? Onare girobasokʼ kan jotoge cetʼ bako homor halaṅa? Goṭa disạmge Misor reakʼ nil gaḍa dakʼ leka se rakabokʼa ar ona tayom do pheḍ calakʼa.”

⁹ Probhu Isore menetʼkana, “Enhilokʼ tikin jokhecʼ siń cando doń hạsur ocoyea ar siń marsalrege dhạrti doń ńut ocoya.

¹⁰ Apeakʼ sanam hulạs do dukte ar sanam sereń doń homor halaṅ ocoya. Sanamkoge gõṛẽ kicricʼ iń horokʼ ocopea ar bohokʼ doń hoyo ceḍeytapea. Ona okte do sadher hoponakʼ gujukʼ reakʼ homor lekań hoeocoya ar ona do mucạtʼ hạbicʼ ạḍi dukge hoyokʼa.”

¹¹ Probhu Isore meneda, “Nonkan dinko daraekana tinre iń do disạm talare akaliń hoeocoya. Ona do jomakʼ reakʼ akal se dakʼ tetaṅ reakʼ akal do baṅ hoyokʼa menkhan Probhu Isorakʼ katha ańjom lạgitʼ akalge hoyokʼa.

¹² Hoṛko do Probhu Isorakʼ katha sendrae lạgitʼ purub khon pạchim ar utạr khon dạkhin hạbicʼko ạcur baṛaea, menkhan bako ńama.

¹³ Enhilokʼ ńelokʼte mońj juạn kuṛiko ar daṛean juạn koṛako do ona katha lạgitʼ tetaṅteko loraokʼa.

¹⁴ Onko okoe Samariạren boṅga ńutumte kiriạkateko men, ‘E Dan, amren jiwetʼicʼ debota ńutumtele kiriạkʼkana se, ‘Ber-sebaren jiwetʼicʼ debota ńutumtele kiriạkʼkana,’ onko doko bhindạṛokʼa, ar tishõ bako beretʼa.”