Amos 5 - সান্তালী বাইবেল

Israel lạgitʼ homor halaṅ

¹ E Israelren hoṛko, ape reaṅ iń homor halaṅetʼkan ona baṛe ańjompe.

² “Kũạri kuṛi Israel doe gurena, ar tishõ bae beretʼ daṛeakʼa; uni do acʼakʼ ot reye giḍi ocoakana, ar uni berede lekan do celege bạnukʼkoa.”

³ Probhu Isore menetʼkana, “Israelakʼ oka nagraha khon mitʼ hajar daṛean hoṛko oḍokʼ senokʼkan tahẽkan onaren do mitʼsae jiwetʼko tahena, arhõ okaṭakʼ ato khon mitʼsae daṛean hoṛko oḍokʼ senokʼkan tahẽkan onaren do gel goṭen jiwetʼko tahena.”

Probhu Isor ṭhen senokʼte bańcaokʼpe

⁴ Probhu Isor do Israelren hoṛkoe metakokana, “Iń ṭhen hijukʼpe, enḍekhanpe bańcaokʼa.

⁵ Ape do Bethel se Gilgal se Ber-sebate alope calakʼa, ente Gilgalren hoṛ do khạṭige bondikate eṭakʼ disạmteko idi ocokʼa ar Bethel do ạuṛiyakʼge hoyokʼa.”

⁶ Probhu Isor ṭhen calakʼpe enḍekhanpe bańcaokʼa; ar baṅkhan uni do seṅgel leka Josephren, metakʼme Israelren hoṛko talareye jol rakabokʼa. Ar seṅgel do onae joma ar Bethelren okoehõ ona do bako ĩṛĩcʼ daṛeakʼa.

⁷ Ape do hok reakʼ bicạrpe haṛhatʼ ocoyetʼkana ar dhorom do otrepe lebda giḍikakʼkana.

⁸ Okoe do soren-ipilko ar arãṛ lalakʼ ipilkoe benao akatʼko, ar okoe do ńute marsal ocoyetʼkan ar siń doe ńut ocoyetʼkan, okoe do jalapuri reakʼ dakʼe hoho ạguiyetʼte pirthimi cetanreye dul bubhạuetʼ, uniyakʼ ńutum do Probhu Isor kangea.

⁹ Uni do daṛeanko cetanre ar onkoakʼ gaṛko cetanre ackage ceṭer leka jarkhare ạguiya ar onakoe marao utạra.

¹⁰ Okoe do nagraha reakʼ phaṭokre behokakʼ upạrteye teṅgonkan uni dope hirkhạwaekana ar okoe sạriyakʼ kathakoe roṛetʼkan uni dope nihạ̃t edekana.

¹¹ Ape do reṅgecʼ hoṛpe santaoetʼkoa ar jor julumkate onko ṭhen khon guhumpe ạdạiyetʼkana. Ape do dhiri reakʼ maraṅ maraṅ oṛakʼkope benaojoṅ kangea menkhan onare do bape girobas daṛeakʼa. Ape do mońj darkha bagwanpe benao joṅkangea enhõ ona reakʼ darkha rasa do bape ńũ ńama.

¹² Ińiń baḍaea apeakʼ behokʼakʼko do tinạkʼ ḍhertapea ar apeakʼ ghạṭko hõ tinạkʼ bạ̃ṛtitapea mente! Ape do dhorom hoṛpe santaoetʼkoa ar ghuspe jomeda; ar nagraha reakʼ phaṭok duạr ṭhen reṅgecʼ hoṛkoakʼ hok reakʼ do bape bicạretʼa.

¹³ Ar onatege budan hoṛ do nonkan oktere thir hape akane tahenkana, ente okte do bạṛicʼgea.

¹⁴ Ape jemonpe bańcao daṛeakʼ ona lạgitʼ bhageakʼko khudạupe, bạṛicʼakʼ do baṅa; enḍekhan cetʼlekape roṛ baṛae onkage sanam daṛeanicʼ Probhu Isor do sạrige ape sãoteye tahena.

¹⁵ Bạṛicʼakʼ hirkhạwakʼpe, ar bhageakʼ dulạṛpe; nagraha reakʼ phaṭok duạrkore hok reakʼ bicạr rukhiyạitape. Israelren sarecʼ jiwetʼ tahen hoṛko cetanre sanam daṛeante perecʼ Probhu Isor doe daya botecʼkokʼge coṅ cetʼ coṅ.

¹⁶ Phạdkoren Probhu Isor doe meneda, “Nagraha reakʼ mitʼke mitʼ phaelao ṭhạ̃ire hoṛko homor halaṅa ar mitʼke mitʼ horre doko hae haeyokʼa. Hẽ, dukokʼkanko sãote homor halaṅ lạgitʼ cacasko hõko hoho ocokʼa.

¹⁷ Sanam darkha khetkorege homor halaṅ do hoyokʼgea ente iń do apeko talateń parom calakʼa. Iń Probhu Isorge noa katha doń meneda.”

Probhu Isorakʼ din

¹⁸ Hae ape do! Ape do ahkaokʼ salakʼ Probhu Isorakʼ din ńeljoṅpe khojkana! Ar cedakʼ ona din lạgitʼ dope gorojokʼkana? Ape ṭhen ona din do marsal reakʼ do baṅ hoyokʼa menkhan ńut reakʼge hoyokʼa.

¹⁹ Ona din do dhạcri kul khon ńir bańcaokate bana eṅga samaṅreye paṛao akan hoṛ leka, one acʼakʼ oṛakʼte ńir bolokate bhitreye capoyen sãote biń do tiye sogakʼkede.

²⁰ Probhu Isorakʼ din do marsal baṅkate cetʼ ńutakʼ do baṅ hoyokʼa? Jhalkaokʼ marsal khon cetʼ kaṛaṅ ńutakʼ do baṅ hoyokʼa?

²¹ Probhu Isore meneda, “Apeakʼ porobko doń hirkhạwakʼkana, ar bạń moneyakʼkana, apeakʼ sabha do bạń sahao daṛeakʼkana.

²² Ape do iń ńutumte jeredokʼ samaṅokʼakʼ ar jomakʼ samaṅokʼakʼpe samaṅrele hõ iń do ona bạń ataṅtapea. Ape do lodgopʼ janwarkote sulukren samaṅokʼakʼpe samaṅạńre hõ samaṅạńre hõ ona secʼ do bạń beṅgeda.

²³ Apeakʼ sereń durạṅ do sạṅgiń giḍikakʼpe. Apeakʼ peṛesaṅ reakʼ mońj rãwãokʼ do bạń ańjomtapea.

²⁴ Ona khon bickom hok do gaḍa leka ar dhorom do jaejug ạtukʼkan dakʼ leka baṛe hoyokʼma.

²⁵ “E Israelren hoṛko, pongel bochor hahaṅkarrepe tahẽkanre ape do cetʼ iń ńutumte jãhãn janwar se eṭakʼ jiniskope samaṅ ạdiń tahẽkana?

²⁶ Ona do baṅa, bickom apeakʼ tite benaoicʼ raj-debota Sakuthakʼ muṭhạn ar ipil debota Kạyunakʼ muṭhạngepe gokʼ idileda.

²⁷ Onate iń doń bondi ocopea ar Damesek hanasateń kolpea. Noa katha do iń Probhu Isorgeń meneda.”