Amos 4 - সান্তালী বাইবেল

Israel do Isor ṭhen bae ruạṛ hecʼlena

¹ E Samariạ buru cetan reakʼ Basonren mãṛ bitkilko, ańjompe baṛe. Ape do reṅgecʼ hoṛpe santaoetʼkoa ar nandanko dope lebetʼ jạuetʼkoa ar aperen jãwãe dope metakokana, “Bubulakʼ ạgualepe.”

² Probhu Isor do acʼakʼ sonottetʼ reakʼ kiriạteye meneda, “Ona okte do khạṭige daraekana tinre ạṅkuskotepe bạkupʼ idi ocokʼa; ape sanamkoge ạṅkustepe or idi ocokʼa.

³ Ape mimitʼko do lạnduṛakan bhit secʼtegepe or oḍok ocokʼa ar Hermon secʼpe giḍi ocokʼa. Iń Probhu Isorge noa katha doń menetʼkana.

⁴ “Ape do Betheltepe calakʼa arpe ghạṭa; Gilgalte senkate arhõ bạ̃ṛtipe ghạṭa. Din hilokʼ setakʼ reakʼ samaṅokʼakʼ jinisko ar pepe din hilokʼre apeakʼ gel hạṭiń reakʼ mitʼ hạṭiń jiniskope idiyetʼkana.

⁵ Ape do gun manao reakʼ samaṅokʼakʼ lekate khạmiyanakʼ piṭhạpe samaṅetʼa ar apeakʼ monejoṅakʼ lekage samaṅokʼakʼ jiniskote bạḍạitepe perejokʼkana, ente E Israelko, ape do onagepe kusiyakʼkana. Iń Probhu Isorge noa katha doń menetʼkana.

⁶ “Iń do arhõń menetʼkana, mimitʼ nagrahare reṅgecʼteń dohoketʼpea ar mimitʼ atorenko do piṭhạ reakʼ ṭonṭateń dohoketʼkoa; enhõ ape do iń ṭhen bape ruạṛlena.

⁷ Irokʼ din pe cando ạuri tiyogokʼrege iń do ape cetanre jạṛi dakʼ iń akoṭkeda. Mitʼṭecʼ atore jạṛi dakʼ kolkate eṭakʼ atore do bạń dakʼ ocowada. Mitʼṭecʼ khet do dakʼte lohotʼena, ar eṭakʼ khet do dakʼ begorte khaṅgoṭena.

⁸ Dakʼ lạgitʼ ape do ḍhoya ḍhape mitʼ ato khon eṭakʼ atope senlena menkhan tirpitokʼ leka dakʼ do bape ńamleda; enhõ ape do iń ṭhen bape ruạṛ hecʼlena.

⁹ Ạḍi dhao apeakʼ bagwan ar darkha bagwanko jhãoraokʼteń ńẽtʼketʼa ariń ujạṛketʼtapea. Apeakʼ loa dare ar jạitun dareko do pohoko jomkeda; enhõ ape do iń ṭhen bape ruạṛ hecʼlena.

¹⁰ Misorre cetʼlekań kolletʼ onkage ape talare iń do mahamạriń kolkeda. Ar lạṛhại hotete aperen juạnkoń gocʼketʼkoa ar aperen sadomkoń idiketʼkoa. Apeakʼ chạuni reakʼ bạṛicʼ so do mũreyiń jiyatʼpea; enhõ ape do iń ṭhen bape ruạṛ hecʼlena.

¹¹ Ińge aperen Isor do cetʼleka Sodom ar Gomorań maraoletʼ onkage aperen ḍherkogeń maraoketʼkoa. Ape do seṅgel khon halaṅ rakapʼ akatʼ jolokʼkan ṭhuṭkutʼ leka kanape, enhõ ape do iń ṭhen bape ruạṛ hecʼlena.

¹² Onatege E Israel, iń do khạṭige am sãote nonkań beohara. Ona iạte E Israel, amren Isor samaṅre teṅgokʼ lạgitʼ ma sapṛaokʼme.”

¹³ Disạipe, okoe buru boṭkocʼkoe benao akatʼ, ar hoeye sirjạu akatʼ ar manwa ṭhen acʼakʼ ganḍon joṅakʼkoe sodor ocoy, okoe do marsale ńut ocoy ar dhạrti reakʼ buru boṭkocʼko cetanteye daṛan kan uniyakʼ ńutum do phạdkoren Probhu Isorge.