Amos 3 - সান্তালী বাইবেল

Israel upạrte Probhu Isorakʼ katha

¹ E Israelren hoṛko, ape upạrte, metakʼme Probhu Isor okoe do Misor disạm khone oḍok ạgu akatʼko onko jạtren sanamko upạrte uni okae menakatʼ ona ańjompe:

² “Dhạrtiren sanam jạtrenko tala khon iń do eken apegeń bachao akatʼpea; ar onate apeakʼ sanam kại iạte apegeń sạjạipea.”

³ Laha khon jãhãe bạkin ṭhik dohole khan cetʼ mitʼ sãotekin calao daṛekokʼa?

⁴ Sikạr bae ńamle khan kul do cetʼ gajaṛ khone hạnḍrạukʼgea? Ar jãhãnicʼ bae sapʼ daṛeae khan dhạcri kul do cetʼ acʼakʼ danderreye gondraokea?

⁵ Jhampare jãhãn laoṭa bae tahelen khan cẽṛẽ do cetʼ jhampa ṭhene hijukʼgea? Jãhãnicʼ bae siṭạpʼlen khan siṭạpʼ do cetʼ phetʼ rakabokʼgea?

⁶ Nagrahare sakwa reakʼ saḍe ańjomle khan hoṛ do cetʼ bako botorokʼa? Probhu Isor bae hoyocole khan nagrahare cetʼ muhin do paṛaokʼa?

⁷ Probhu Isor do acʼren guti nạbiko ṭhen acʼakʼ jãhãnakʼ goṭawakʼ bae sodorle khan cetʼge ohoe cekalea.

⁸ Dhạcri kule hạnḍrạulere okoe hale bae botorkokʼa? Probhu Isor roroṛe metae khan nạbi lekate katha do okoe hale bae nạbikea?

⁹ Ape do Asdod ar Misor reakʼ sanam gaṛren hoṛko ṭhen roṛpe, “Ar Samariạ reakʼ buruko cetanre jarwakʼpe; ńelpe, ona talare tinạkʼ gulmal hoyokʼkana! Uniren hoṛko talare tinạkʼ santao hoyokʼkana!”

^10-11 Probhu Isore menetʼkana, “Onko do hokakʼ kạmi bako baḍaekana; onko do gaṛko talare julum ar luṭ reakʼ jinisko doho jarwa akawana. Onatege mitʼṭen bạiri do onkoakʼ disạme gherao esetʼeda; ar onkoakʼ dakʼram gaṛkoe rạpudtakoa ar gaṛkoe luṭjoṅa.”

¹² Probhu Isore meneda, “Gukʼpiyicʼ cetʼleka dhạcri kulakʼ moca khon jaṅga reakʼ eken barea jaṅ se lutur reakʼ mitʼ kuṭrại rukhiyạ daṛeakʼ onkage Israelren okoeko hoṛ Samariạreko girobasokʼ kan onko do eken onkoakʼ ṭenḍar mạci reakʼ mitʼ konac ar parkom reakʼ kuṭrạgeko rukhiyạ daṛeakʼa.”

¹³ Phạdkoren Probhu Isore menetʼkana, “Ańjompe ar Jakobren bõsko sontorkope.

¹⁴ Kại iạte oka hilokʼ Israeliń sạjạiye enhilokʼ do Bethel reakʼ pinḍko hõń rạputʼ giḍikakʼa; unre pinḍ reakʼ dereńko do otre rạputʼ ńurokʼa.

¹⁵ Iń do rabaṅ din oṛakʼ ar oṛakʼ banargeń rạpuda; ar hạti ḍaṭate kạmi akatʼ oṛakʼ do nosṭokʼa ar maraṅ maraṅ oṛakʼko do maraokʼa. Iń Probhu Isorge noa katha doń meneda.”