Amos 2 - সান্তালী বাইবেল

¹ Probhu Isore meneda, “Moab reakʼ pea ghạṭ iạte, hẽ, ponea ghạṭ iạte iń do khạṭige uniń sạjạiyea, ente uni do Edomren rajakʼ jaṅkoe lo torocʼ akatʼtaea.

² Onatege iń do Moab upạrte seṅgeliń kola; ona do Keriot reakʼ gaṛkoe joma. Lạṛhại reakʼ hoho ar sakwa saḍe reakʼ gulmal talare Moab doe gujukʼa.

³ Uniren raj doń marao giḍikaea ar uni sãote uniren sanam disạm cakʼlaoko hõń gocʼkoa.”

⁴ Probhu Isore meneda, “Jihudạ reakʼ pea ghạṭ iạte, hẽ, ponea ghạṭ iạte iń do khạṭige uniń sạjạiyea, ente uniren hoṛko do Probhu Isorakʼ ạn-ạriko bebatao akada, ar uniyakʼ niạmko bako dohoakada. Onkoren hapṛamko okoe do eṛe debotako pańjaletʼko onkage onko hõ bạṛicʼ horteko senakana.

⁵ Ar onatege iń do Jihudạ cetanre seṅgeliń kola; ona do Jerusalem reakʼ gaṛkoe joma.”

Israel reakʼ bicạr

⁶ Probhu Isore meneda, “Israelakʼ pea ghạṭ iạte, hẽ, ponea ghạṭ iạte iń do khạṭige uniń sạjạiyea. Uniren hoṛ do ṭaka poesa lạgitʼ dhorom hoṛko ar jaṅga reakʼ mitʼ joṛa panahe lạgitʼ reṅgecʼ hoṛko ạkhriń akatʼkoa.

⁷ Onko do dhuṛiko eretʼkan lekage reṅgecʼ hoṛko eretʼkoa ar nandanko do hor khonko ṭhelao ocokʼetʼkoa. Apat ar hopon do ini mitʼ maejiu sãotegekin laṭghaṭetʼ kana ar nonkate onko do ińakʼ sonot ńutumko besonotetʼtińạ.

⁸ Onko do mitʼke mitʼ pinḍ ṭhen senkate bondhok hatao akatʼ kicricʼreko jạpitʼetʼkana. Onkoakʼ koejoṅ oṛakʼre onko do juribana reakʼ ṭakate darkha rasako ńũjoṅkana.

⁹ “E Israelren hoṛko, Amoriko do debdạru dare leka usul ar Elon dare leka daṛeanko tahẽkanre hõ enhõ onko Amoriko do ape samaṅregeń marao giḍiletʼkoa. Iń do onkoakʼ rehetʼ ar jo sudhạgeń maraoletʼtakoa.

¹⁰ Amorikoakʼ disạm emape lạgitʼ ińge Misor disạm khoniń oḍok ạguketʼpea ar hahaṅkarre pongel bochor hạbicʼ iń ạyurletʼpea.

¹¹ E Israelren hoṛko, noa do cetʼ sạri katha baṅkana, one aperen hoponko mod khon adom do nạbiko ar adom do nasriạkoń bachaoan tahẽkana mente?

¹² Menkhan ape do nạsriko darkha rasape ńũ ocoletʼkoa ar nạbi lekate katha roṛ hõ bape roṛ ocowatʼkoa.

¹³ “Binḍạte perecʼ bhạri sagaṛte jãhãnakʼ ten len khan cetʼleka chakachunokʼ onkage ape hõ ńitokʼ doń chaka chunpea.

¹⁴ Okoe usạrako dạṛ daṛeakʼ onko do apnarte ohoko rukhiyạ daṛelena ar lạṛhại birko hõ akoakʼ jiwi do ohoko rukhiyạ daṛelea.

¹⁵ Dhinkiạ hõ ohoko teṅgo ṭarhao daṛelea, ar coṭkarko dạṛ daṛeakʼ hoṛ hõ bako dạṛ daṛeakʼa; hẽ, aswariko hõ akoakʼ jiwi do ohoko rukhiyạ daṛelea.

¹⁶ Lạṛhại birko talare okoe do joto khone dilan hoṛkan unihõ enhilokʼ do laṅṭakateye ńirjoṅa. Iń Probhu Isorge noa katha doń meneda.”