2 Samuel 9 - সান্তালী বাইবেল

Dạud ar Mephiboset

¹ Mitʼdin Dạud doe kuliyana, “Ńit hạbicʼ cetʼ Sạul gharońjren jãhãe jiwetʼ menakʼkoa, one onko lạgitʼ Jonathan khạtirte dayań udukʼ daṛeke?”

² Siba ńutuman Sạulren mitʼṭecʼ gutiye tahẽkana. Hoṛko do uniko hohowadete Dạud ṭhenko idikedea. Ar raj do uniye kulikedea, “Amge cetʼ Siba do?” Uni doe roṛ ruạṛkeda, “Hẽ, amren guti Siba doń ińkangea.”

³ Raj doe kuliyana, “Sạulakʼ gharońjkoren cetʼ jãhãe jiwetʼ menakʼkoa one onko cetanre dayań udukʼ daṛeke?” Siba do roṛ ruạṛketʼte raje metadea, “Jonathanren mitʼṭen hopon ńitʼ hõ jiwetʼ menaegea, ar uni do banar jaṅga leḍhagetaea.”

⁴ Raje kuliyana, “Okare menaea?” Sibae menkeda, “Uni do Lodebarre Amielren hopon Makirakʼ oṛakʼreye tahẽnkana.”

⁵ Unre Dạud do Lodebarte hoṛ kolkate Amielren hopon Makirakʼ oṛakʼ khon uniye ạgukedea.

⁶ Sạulren goṛomtetʼ koṛa, metakʼme Jonathanren hopon Mephiboset do Dạud ṭhene hecʼena ar otre ombakʼkateye ḍobokʼadea. Dạude menkeda, “E Mephiboset.” Uni doe menkeda, “Ma roṛme, amren golam kangeạń.”

⁷ Dạud do uniye metadea, “Alom botorokʼa. Iń do amren ạpum Jonathan khạtirte khạṭige dayań udukʼama. Amren goṛomme haṛam Sạulakʼ sanamakʼ jaega jumiń ruạṛama, ar am do jao ghuṛi ińakʼ ṭebilrem jom ńũiya.”

⁸ Niạ katha ańjomkate Mephiboset do uni ḍobokʼ adeteye menkeda, “Amren guti doe celekante, iń lekan mitʼṭecʼ gocʼ setam beṅgetʼae kana.”

⁹ Unre raj do Sạulren guti Siba hohowadeteye metadea, “Sạul ar uniyakʼ gharońjre cetʼko tahẽkan ona joto do uniren goṛomtetʼ koṛań emadea.

¹⁰ Am, amren hoponko ar amren gutiko do uniyakʼ jumi caskate phosolpe samṭaoa jemon amren kisạ̃ṛren goṛomtetʼ koṛa do jomakʼ hoyokʼtae; menkhan amren kisạ̃ṛren goṛomtetʼ koṛa Mephiboset do jao okte ińakʼ ṭebilreye jom ńũiya.” Sibaren do gelmõṛẽ goṭen hopon ar bargel gutiko tahẽkantaea.

¹¹ Niạ katha ańjomkate Siba do raje metadea, “Ińren mạlik maharaj do acʼren guti okaṭakʼ kạmiye metae onage uni doe kạmiya.

¹² Mika ńutuman Mephibosetren mitʼṭen huḍiń koṛa gidrại tahẽkana; ar Sibakʼ gharońjren sanamkoge Mephibosetren gutiko tahẽkana.

¹³ Ar Mephiboset do Rajakʼ ṭebilreye jom ńũiyetʼ tahẽkante Jerusalemreye tahenkan tahẽkana. Uni do banar jaṅgage leḍha tahẽkantaea.