2 Samuel 8 - সান্তালী বাইবেল

Dạude jitạukʼkan

¹ Dạud do Philisṭikoe bhagaoketʼko khan acʼakʼ gobolreye ạguketʼkoa. Uni do Philisṭikoakʼ ti khon Metheg-ama nagrahae hatkeda.

² Dạud do Moabrenko hõe bhagaoketʼkoa. Uni do Moabrenkoe ńẽtʼketʼkote otreye giticʼketʼkoa ar baberteye jokhaketʼkoa. Pạhil bar baber jokharen hoṛ doko gocʼ ocoyena ar mitʼ baber jokharen hoṛ do jiwetʼko doho ocoyena. Inạ tayom Moabrenko do Dạud gobolre tahẽkate khajna emaeko ehopʼena.

³ Tayomte Sobaren raj Rehobren hopon Hadadeser do tinre phurạt gaḍa hạbicʼ arhõ ektiạri ńam ruạṛ lạgitʼe senena unre Dạud do uni sãoteye lạṛhạiyena.

⁴ Dạud do acʼren mitʼ hajar eae sae aswariko ar bargel hajar otten lạṛhại phạdkoe hatketʼkoa. Onkoren mitʼsae rãt gạḍiren sadomko dohokate sarecʼ sanam sadomkoakʼ do jaṅga sire samakʼketʼtakoa.

⁵ Damesekreko tahẽnkan Aramrenko do tinre Sobaren raj Hadadser goṛowae lạgitʼko oḍok hecʼena unre Dạud do onkoren bargel bar hajar hoṛe gocʼketʼkoa.

⁶ Dạud do Aramrenkoakʼ rajosṭi reakʼ Damesekre acʼren lạṛhại phạdkoe dohoketʼkoa. Onate Aramrenko do uni gobolre tahẽkate khajna emokʼko ehopʼena. Nonkate Dạud do jãhã ṭhạ̃igeye calakʼkan tahẽkan Probhu Isor do onḍegeye jitạu ocoyede tahẽkana.

⁷ Hadadeserren hoṛkoakʼ sona reakʼ ḍhalko Dạud do Jerusalemteye ạgukeda.

⁸ Betah ar Berothae ńutumanakʼ Hadadeserakʼ barea nagraha khon Dạud raj do ạḍi utạr pitạlkoe ạgukeda.

⁹ Ar Hamatren raj Toi doe ańjomkeda, Dạud do Hadadeserren goṭa lạṛhại phạdkoe bhagao akatʼkoa.

¹⁰ Ar Dạud do Hadadeser sãoteye jitạu akante uni boge judạ ar johar emae lạgitʼ Toi do acʼren hopon Joram Dạud ṭhene kolkedea. Nui Hadadeser sãote Toi do aema dhaoe lạṛhạilena. Ar Joram do Dạud lạgitʼ sona, rupạ ar pitạl reakʼ jinisko soṅgeteye ạgudaraleda.

^11-12 Niạ lahare Dạud do Aramrenko, Moabrenko, Amonrenko, Philisṭiko ar Amalekeki jạtrenkoe dobnaoketʼkote onkoakʼ sona, rupạ, ạgukate Probhu Isor ńutumteye begar dohokada, ar Sobaren raj Rehobren hopon Hadadeser ṭhen khon okakoe luṭ ạgu akatʼ tahẽkan ona hõe begar dohoakatʼ tahẽkana. Uni do Joram emakʼ jinisko hõ Probhu Isor ńutumteye begar dohoakada.

¹³ Dạud do buluṅ lodamre gel irạl hajar Aramren hoṛko gocʼkateye ruạṛ hecʼen khan uniyakʼ sunam do goṭa beṛhaete pasnao idiyena.

¹⁴ Edom disạm reakʼ sanam jaegakore uni do acʼren lạṛhại phạdkoe dohoketʼkoa ar onate Edomrenko hõ uni gobolreko tahẽyena. Ar Dạud do jãhãtegeye calakʼkan tahẽkan Probhu Isor do onḍegeye jitạu ocoyedekan tahẽkana.

Dạudren kạmiyạko

¹⁵ Dạud do goṭa Israel disạm cetanre rajokʼe ehopʼena. Uniren hoṛko cetanre uni do hok ar dhorom reakʼe bicạretʼ tahẽkana.

¹⁶ Seruyaren hopon Joab do uniren maraṅ subedare tahẽkana ar Ahiludren hopon Jehosaphat do uniyakʼ rajosṭi reakʼ sanam itihãskoe ol dohoyetʼ tahẽkana.

¹⁷ Ar Ahiṭubren hopon Sadok ar Abiatharren hopon Ahimelok tạkin do naekekin tahekana ar Seraya do rajren olokʼicʼe tahẽkana.

¹⁸ Jehuyadaren hopon Benaya do Kerethi ar Pelethikoren mathakin tahẽkana, ar Dạudren hoponko do rajren sosolhako ar naekeko tahẽkana.