2 Samuel 7 - সান্তালী বাইবেল

Dạud raj ṭhen Isorakʼ gokʼakʼ

¹ Ona tayom raj do raj oṛakʼre tahene ehopʼena ar Probhu Isor do uni beṛhaeten bạirikoakʼ ti khone rukhiyạkedea.

² Mitʼ do raj do Nathan nạbiye metadea, “Ńelme, iń do debdạru kaṭ reakʼ oṛakʼreń girobasokʼ kana menkhan Isorakʼ sinduk do tạmbure menakʼa.”

³ Nathan do raje roṛ ruạṛadea, “Amakʼ monre oka cekae reakʼ menakʼ onage onkaeme. Probhu Isor do am soṅgere menaea.”

⁴ Menkhan enhilokʼ ńindạge Probhu Isorakʼ katha do Nathan ṭhen seṭerena; Uniye menkeda,

⁵ “Am do senkate ińren guti Dạudem metaea, Probhu Isore meneda, ‘ińakʼ tahen lạgitʼ am do cetʼ mitʼṭecʼ oṛakʼem benaoa?

⁶ Misor disạm khon Israelkoń oḍok ạguko hilokʼ khon teheń hạbicʼ jãhã oṛakʼre hõ bạń tahẽkana. Iń do tạmburege tahẽkate mitʼ tahen jaega khon eṭakʼ tahen jaegateń senlena.

⁷ Okoe nạbiko cetanre ińren hoṛko jotonko lạgitʼ bhariń ematʼko tahẽkan, ar Israelko sãote judạ judạ jaegare ạcur baṛaekan tahẽkan jokhecʼ okoe mukhiyạ hõ bạń metatʼko tahẽkana, cedakʼ debdạru reakʼ kaṭte iń lạgitʼ oṛakʼ bape benaoeda.’

⁸ “Ńitokʼ ińren guti Dạud metaeme, sanam daṛeanicʼ Probhu Isor do niạ kathae meneda, ‘ińren hoṛ do Israelkoren cakʼlaoyicʼ hoyokʼ lạgitʼ ińge gupi ṭạnḍi khon, bhiḍi palrenko tayom khoniń ạgu akatʼmea.

⁹ Ar okako jaegatem senlen onḍege iń hõ am sãoteń senlena ar am samaṅ khon sanam bạirikoń marao caba akatʼkoa. Ar dhạrtire iń do amakʼ ńutumiń maraṅ ocoya.

^10-11 Ińren hoṛ Israelko lạgitʼ mitʼṭecʼ jaegań ṭhik dohoyte onḍege cara lekań rohoekoa, jemon onko do akoakʼ jaegare sulukteko girobas daṛeakʼ ar ińren hoṛ Israelko cetanre cakʼlaoyicʼ iń bahale tayom onko cetanre bạṛicʼ hoṛkoakʼ okako santao hecʼlen onka do ar bako daṛeakʼa. Iń do sanam bạirikoakʼ ti khon amiń rukhiyạmea. “ ‘Iń Probhu Isor do arhõń meneda, iń apnarge amren bõskoń teṅgo rakapʼkoa.

¹² Amakʼ bahaokʼ dinko mucạtʼlen khan am do amren hapṛamko ṭhenem calakʼre am bodolte am bõsren mitʼ hoṛ, amren hopongeń duṛubea ar uniyakʼ rajosṭiyiń ṭarhaotaea.

¹³ Amren uni hoponge ińakʼ ṭhonok lạgitʼ mitʼṭecʼ oṛakʼe benaoa. Ar uniyakʼ raj siṅghạson do jaejug hạbicʼ tahena.

¹⁴ Iń do uniren apatiń hoyokʼa ar uni do ińren hopone hoyokʼa. Ar uniye behok lekhan eṭakʼ hoṛ cetʼleka sạjạiko ńam uni hõ onkageń sạjạiyea.

¹⁵ Menkhan ińakʼ dulạṛ do tishõ uni cetan khon bạń ocoga, cetʼleka Sạul cetan khoniń ocokʼletʼte amakʼ hor khoniń ocokʼ giḍilede.

¹⁶ Amakʼ bõs ar rajosṭi do am samaṅre jaejug ṭarhao akae tahena. Ar amakʼ siṅghạson do jaejug hạbicʼ tahena.’ ”

¹⁷ Niạ dorson reakʼ sanamakʼ kathako Nathan do Dạude lạiyadea.

Dạudakʼ koejoṅ

¹⁸ Niạko katha ańjomkate Dạud raj do tạmbu bhitriteye boloyena ar Probhu Isor samaṅre duṛupʼkateye menkeda, “E Probhu Isor, ińge baṅ cetʼ ar ińakʼ bõsge baṅ cetʼ, amge nunạkʼ hạbicʼem ạyur ạguakadińạ.

¹⁹ E Probhu Isor am samaṅre noage ḍher do baṅ hoyakana; inạ sãote amren gutiyakʼ bõsrenkoakʼ tayom daram katha hõm lạiyeda. E Probhu Isor, niạge jemon manwa lạgitʼ amakʼ bondobos hoyokʼ.

²⁰ “Dạud do am ṭhen ar cetʼe men daṛekea? E Probhu Isor, amren guti mam baḍae akadege.

²¹ Amakʼ katha iạte ar amakʼ sana lekate niạ bhạlạiyakʼem kạmi akada ar amren gutiyem baḍae ocoakadea.

²² E Probhu Isor, am dom maraṅgea! Am leka do ar celege bạnukʼkoa ar am chaḍa eṭakʼ jãhãn Isor hõ bạnukʼkoa; noa katha do aleakʼ luturtegele ańjomakada.

²³ Amren Israel jạtrenko leka dhạrtire ar eṭakʼ jãhãn jạtrenko menakʼkoa okoe do am jạtrenko hoeocoko lạgitʼ ar amakʼ ṭhonok sodor lạgitʼ onko chaḍaoko lạgitʼem calaolen? Ar eṭakʼ jạtrenko samaṅre amakʼ ńutumte amren hoṛko lạgitʼ maraṅ ar botoranakʼ kạmim kạmiakada, cetʼleka amren hoṛko Misor disạm khon eṭakʼ eṭakʼ jạtren ar debotakoakʼ ti khonem chaḍao ạguakatʼko?

²⁴ Amren hoṛ Israelko do jaejug amren hoṛko hoyokʼ lạgitʼem teṅgo akatʼkoa, ar E Probhu Isor, am do onkoren Isorem hoyakana.

²⁵ “Ńitokʼ do E Probhu Isor, amren guti ar uniyakʼ bõs reaṅ okaṭakʼem gokʼakatʼ ona baṛe jaejug rukhiyạ akae dohoyme. Ar amakʼ gokʼakʼ lekage kạmime.

²⁶ Onate amren guti Dạudakʼ bõs do am samaṅre ṭarhao akae tahena ar jaejug amakʼ ṭhonokge hoyokʼa. Unre hoṛko mena, ‘sanam daṛeanicʼ Probhu do Israelkoren Isor kanae.’

²⁷ “E sanam daṛeanicʼ Probhu, Israelkoren Isor, amren guti ṭhen niạ reaṅ do sodortegem menakada, ‘am lạgitʼ iń do mitʼṭecʼ bõsrenkoń benao rakapʼkoa.’ Onate am ṭhen niạ koejoṅ amren gutiyakʼ monre dil hoyakana.

²⁸ E Probhu, amkangeam Isor do. Amakʼ katha do sạrigea, ar noa bhạlạiakʼ reakʼ iń ṭhenem gokʼakada.

²⁹ Ńitokʼ am do kusite amren gutiyakʼ bõsko bhorakʼme jemon onko do jaejug am samaṅreko tahen. E Probhu Isor, apnartege ona katha dom men akada ar amakʼ bhorte amren nui gutiyakʼ bõskore jaejug ạsirbad tahẽ akae tahena.”