2 Samuel 6 - সান্তালী বাইবেল

Goha sinduk Jerusalemte ạguyen

¹ Dạud do arhõ Israelko mod khon pegel hajar bachao akan hoṛko mitʼ ṭhene jarwaketʼkoa.

² Dạud ar uniren sanam hoṛko Isorakʼ Sinduk do Bakʼale Jihudạ khon Jerusalemte idi lạgitʼ Bakʼal Jihudạ khonko mohnḍayena. Niạ sinduk do sanam daṛeanicʼ Probhu Isor ńutumte oprom tahẽkana, ente Probhu Isor do sindukren Kerub kin talareye tahẽnkana.

³ Isorakʼ ona sinduk onko do buru cetan reakʼ Abinadabakʼ oṛakʼ khonko oḍok ạguketʼte mitʼṭecʼ nãwã sagaṛreko dohokeda. Us ar Ahio ńutuman Abinadabren hoponkin do taṛam taṛamte ona nãwã sagaṛkin laga idiyetʼ tahẽkana.

⁴ Ar Isorakʼ ona sinduk do sagaṛ cetanre tahẽkana ar Ahio do ona laha lahateye calakʼkan tahẽkana.

⁵ Dạud ar Israel jạtren sanam hoṛ Probhu Isor samaṅre debdạru kaṭte benaoakʼ sanam lekan bajnako ar binạ banam, peṛesaṅ, tabla, kortal ar ghạnṭikoante sereń sereńteko calakʼkan tahẽkana.

⁶ Ado Nakhonakʼ khạrại ṭhenko seṭeren khan ḍaṅgra dokin tohotʼena; ar Us do tiye lahaketʼte Isorakʼ sinduke sapʼkeda.

⁷ Usakʼ niạ bebhukti kạmi ńelte Probhu Isorakʼ edre do uni cetanre paṛaoena. Ona iạte Probhu Isor do uniye ńẽtʼkedea, ar onate uni do Probhu Isorakʼ sinduk pheḍreye gocʼena.

⁸ Us cetanre Probhu Isorakʼ noa edre ńelte Dạud do bae kusilena. Ar teheń hạbicʼ hõ ona jaega reakʼ ńutum do Peres Usko metakʼkana.

⁹ Enhilokʼ Dạud do Probhu Isor ạḍiye botoradea. Uniye menkeda, “Probhu Isorakʼ sinduk do enḍekhan cekate iń ṭhen ạgukʼa?”

¹⁰ Unre Dạud do Probhu Isorakʼ sinduk acʼakʼ nagrahate ạgu bae rebenlena. Uni do ona Gatren Obed-Idomakʼ oṛakʼreye doho oṭokada.

¹¹ Gatren Obed-Idomakʼ oṛakʼre Probhu Isorakʼ sinduk do pe cando tahẽyena. Onate Probhu Isor do uni ar uniyakʼ gharońjren sanamkoe bhoratʼkoa.

¹² Dạud raj doe ańjom ńamkeda je Isorakʼ sinduk Obed-Idomakʼ oṛakʼre tahẽkan iạte Probhu do uniyakʼ oṛakʼren sanamko ar uniyakʼ sanamakʼkoe bhorada.

¹³ Ar okoe do Probhu Isorakʼ sindukko ạguyetʼ tahẽkan onko do turui taṛamko taṛamketʼ tahẽkanre Dạud do mitʼṭen ḍaṅgra ar mitʼṭen phẽṭãṛe samaṅede tahẽkana.

¹⁴ Dạud do Musnạ reakʼ ephod horokʼkate Probhu Isor samaṅre uniyakʼ sanam daṛete enejokʼe ehopʼena.

¹⁵ Unre Dạud ar Israelren sanamko rạskạte hoho hohowate ar sakwa oroṅ oroṅte Probhu Isorakʼ sindukko ạgukeda.

¹⁶ Probhu Isorakʼ sinduk do Dạudakʼ nagrahate seṭerena khan Sạulren hoponera Mikal do jalna khon oyoṅkate onakoe ńelkeda. Ar Probhu Isor samaṅre Dạud do donate enecʼkane ńelkedete uniye nihạ̃tkedea.

¹⁷ Probhu Isorakʼ sinduk ạgukate onko do Dạude beretʼakatʼ tạmbureko dohokeda. Ar Dạud do unre Probhu Isor ńutumte jeredokʼ samaṅokʼakʼ ar sulukren samaṅokʼakʼe samaṅkeda.

¹⁸ Jeredokʼ ar sulukren samaṅokʼakʼe samaṅketʼ khan Dạud do sanam daṛeanicʼ Probhu Isor ńutumte hoṛkoe bhoratʼkoa.

¹⁹ Ona tayom uni do sanam hoṛko, metatʼme jarwa akan Israelren sanam herelhoṛ ar maejiuko mimitʼ goṭecʼ piṭhạ, ar mimitʼ dholma jel ar mimitʼ goṭecʼ kismis piṭhại ematʼkoa. Ar ona tayom onko do apan ạpin oṛakʼteko ruạṛ calaoena.

²⁰ Inạ tayom Dạud do acʼakʼ gharońjren hoṛko ạsirbad ako lạgitʼ tinreye ruạṛ hecʼena unre Sạulren hoponera Mikal do uni daram ạguye lạgitʼe oḍok hecʼena are menkeda, “Israelkoren raj teheń do cetʼlekae manotena! Uni do kharap hoṛko leka acʼren kạ̃ṛmĩko samaṅre hoṛmo reakʼ kicricʼkoe totʼ giḍiketʼtaea.”

²¹ Dạud do Mikale metadea, “Iń do Probhu Isor samaṅrege onań onka akada. Uni do acʼren hoṛko samaṅre, metatʼme Israelko cetanre cakʼlaoicʼ menteye ojokʼ bahalko lạgitʼ amren ạpum se uniyakʼ gharońjren okoege bae bachaoletʼkoa menkhan ińgeye bachao akadińạ. Ona iạte iń do Probhu Isor samaṅreń rạskạkʼ kana.

²² Iń do noa khon arhoń copodokʼa ar iń ṭhen arhoń huḍińokʼa. Menkhan am okoe kạ̃ṛmĩkoakʼ katham roṛetʼkan onko do ińko manotińạ.”

²³ Ar Sạulren hoponera Mikal do ạuriye gujukʼ hạbicʼ bạńjhigeye tahẽyena.