2 Samuel 4 - সান্তালী বাইবেল

Isbosete khũnen

¹ Abner do Hebronreye gocʼena menteye ańjomketʼ khan Sạulren hopon Isboset do dile atʼketʼtaea ar Israelko hõ botor caṛhaoatʼkoa.

² Sạulren hopontetʼ secʼren luluṭkoren barea sordarkin tahẽkana. Unkin mitʼ hoṛakʼ ńutum do Bana ar eṭakʼicʼakʼ ńutum do Rekab tahẽkana. Unkin bana hoṛgekin tahẽkana Benjạmin gusṭiren Berot Rimon hoṛren hopon. Ar Berot do Benjạmin ṭoṭha reakʼ mitʼṭecʼ hĩsgeko sapʼetʼ tahẽkana,

³ ente Berotren hoṛko do Gitayimte ńir paskaokate teheń hạbicʼhõ onḍe upriạ lekako girobasokʼ kana.

⁴ Sạulren hopon Jonathanren do mitʼṭen hopone tahẽkana. Uni do leḍhageye tahẽkana. Jisreyel khon tinre Sạul ar Jonathanakʼ gujukʼ khobor hecʼena unre uniyakʼ umer do mõṛẽ bochor tahẽkana. Ona khobor ańjomkate gidrạren dhại buḍhi do uni hoborkate usạrateye dạṛetʼkan tahẽkan jokhecʼ gidrại giḍiledete uniyakʼ jaṅga do leḍhayentaea. Ar uni gidrạwakʼ ńutum do Mephiboset tahẽkana.

⁵ Berotren Rimon hoṛren hopon Rekab ar Bana do mitʼdin tikin okte Isbosete jirạu akan tahẽkanre uniyakʼ oṛakʼtekin boloyena.

^6-8 Unkin do guhum hatao bhankate oṛakʼ bhitritekin boloyena. Unre Isboset do acʼakʼ giticʼ oṛakʼ reakʼ khaṭ cetanreye giticʼ jirạu joṅkan tahẽkana. Rekab ar Bana do uniyakʼ oṛakʼre bolokate lacʼkin bhoskaoketʼtaea arkin gocʼkedea, ar ona tayom do uniyakʼ bohokʼkin kuṭrạketʼte onḍe khonkin dạṛkeda. Unkin do goṭa ńindạ Araba reakʼ horte taṛamate Hebronte Dạud ṭhenkin idikeda. Arkin metadea, “Amren bạiri Sạul, okoe do amakʼ jiwi hatao reakʼe kurumuṭiyetʼ tahẽkan, uniren hopon Isbosetakʼ bohokʼ do nõkʼõe liń ạguakada. Teheń Probhu Isor do aboren mạlik maharaj secʼte Sạul ar uniren hopon cetanreye halakeda.”

⁹ Dạud do Berotren Rimon hoṛren hopon Rekab ar uniren boeha Bana tạkine metatʼkinạ, “Okoe do sanam lekan muhin khone rukhiyạ akadiń uni jiwetʼ Probhu Isorre kiriạkateń meneda,

¹⁰ okoe hoṛ do bhage sombate ạguakada mente Sạulakʼ gujukʼ khobore emadiń tahẽkan uni do sapʼkate Siklogreń gocʼocoledea. Ente uni lạgitʼ do ona siropage emae reakʼ tahẽkantińạ.

¹¹ Enḍekhan mitʼṭen bindusạn hoṛ okoe do uniyakʼ oṛakʼre bolokate aṭetʼreye khũn akade, uni bạṛicʼ hoṛ cetʼ artetʼge bạń sạjạiyea. Ona iạte iń do apeakʼ ti khon uniyakʼ mãyãm reakʼ iń hala hạliya ar dhạrti khon apeń meṭao cabapea.”

¹² Niạ menkate Dạud do acʼren hoṛkoe hukumatʼkoa ar onko do unkinko gocʼketʼkinạ. Onko do unkinakʼ ti-jaṅgako getʼ begarketʼ tạkina ar hoṛmo do Hebron reakʼ pukhri aṛereko akakada. Menkhan onko do Isbosetakʼ bohokʼ hataokate Hebronre Abnerakʼ topareko baekada.