2 Samuel 3 - সান্তালী বাইবেল

¹ Sạul ar Dạudren lạṛhại phạdko talare ḍher din hạbicʼ lạṛhại calaoena. Dạud doe daṛe idiyena ar Sạulren lạṛhại phạdko doko nijor idiyena.

² Hebronre tahen jokhecʼ Dạudren do arhõ hoponko janamena. Uniren maraṅicʼ hoponakʼ ńutum do Amon; uni do Jisreyel Ahinoamren hopone tahẽkana.

³ Uniren dosaricʼ hoponakʼ ńutum do Kileab; uni doe tahẽkana Karmel Nabalren rạnḍi maejiu Abigaelren hopon. Tesaricʼ hoponakʼ ńutum do Absalom; uni do Gesur raj Talmaeren hoponera Makherren hopone tahẽkana.

⁴ Ponicʼ hoponakʼ ńutum do Adoniạ; uni do Hogetren hopone tahẽkana. Mõṛẽyicʼ hoponakʼ ńutum do Sephaṭia; uni do Abitalren hopone tahẽkana.

⁵ Turuyicʼ hoponakʼ ńutum do Ithream; uni do Dạudren bạhuttetʼ Eglaren hopone tahẽkana. Dạudren nokoko hopon do Hebronreko janamlena.

Abner doe Dạud sejokʼkan

⁶ Sạul ar Dạudren lạṛhại phạdko talare tinre lạṛhại calakʼkan tahẽkana unre Sạulren hoṛko modre Abner do acʼte daṛeanicʼe hoylena.

⁷ Ar Rispa ńutuman Sạulren mitʼṭen miluạ erae tahẽkantaea. Uni do Ayaren hoponerae tahẽkana. Mitʼdin Isboset do Abnere metadea, “Iń ạpuńren miluạ era tulucʼ do cedakʼem giticʼmitʼena?”

⁸ Isabosetakʼ katha ańjomkate Abner do ạḍi raṅgaoenteye menkeda, “Iń do cetʼ Jihudạ secʼren seta kạnạń? Teheń hạbicʼ amren ạpum Sạulakʼ gharońjre ar uniren peṛa pạrbhạko ar gateko talare pạtiạrạnicʼ hoṛ kạnạń. Iń do Dạudakʼ tire bạń jimạ akatʼmea. Ar am do uni maejiu sãoteyem dusiyedeń kana!

^9-10 Probhu Isor do Dạud ṭhen kiriạkate okaṭakʼe gokʼletʼ onka iń bạń kạmi, metatʼme Sạulakʼ bõs khon rajosṭi hataokate Dan khon Berseba hạbicʼ Israel ar Jihudạ cetanre Dạudakʼ siṅghạson bạń teṅgoe enḍekhan Isor do Abner sạjạiye emaema ar ona do ạḍi bạṛicʼ sạjạige.”

¹¹ Isboset do ar mitʼṭecʼ katha hõ Abner ṭhen roroṛ bae dilleda, ente uni doe botoradea.

¹² Inạ tayom Abner do Dạud ṭhen hoṛ kolkate noa kathae menkeda, “Niạ disạm do okoeyakʼ kana? Am do iń tulucʼ mitʼṭecʼ bondobos bandhaome baṛe. Iń do sanam Israelko am secʼ ạguko reakʼ iń goṛowama.”

¹³ Dạude menkeda, “Bhagegea, am tulucʼ mitʼṭecʼ bondobosiń bandhaoa, menkhan am ṭhen mitʼṭecʼ mementeakʼ menakʼtińạ. Am do tinre arhõ iń ṭhenem hijukʼa unre Sạulren hoponera Mikal begor iń samaṅre alom hijukʼa.”

¹⁴ Ona tayom Dạud do Sạulren hopon Isboset ṭhen hoṛkolkate noae baḍae ocokedea, “Ińren bạhu Mikạl imạńme. Iń do Philisṭikoakʼ mitʼsae khatnakʼakʼkote uniń baplaledea.”

¹⁵ Unre Isbosetakʼ hukumte Mikalren jãwãetetʼ Layisren hopon Polṭiyel ṭhen khon Mikal doe ạgu ocoyena.

¹⁶ Uniren jãwãe Polṭiyel do goṭa hor rakʼ rakʼte Bahurim hạbicʼe pańja ạgukedea. Unre Abner do uniye metadea, “Am do oṛakʼte ruạṛ calakʼme.” Ar unre uni do oṛakʼteye ruạṛ senena.

¹⁷ Inạ lahare Abner do Israelren murubbiko ṭhene menletʼ tahẽkana, “Ape do Dạud raje lạgitʼpe menletʼ tahẽkana.

¹⁸ Ńitokʼ do ma onage onkaepe. Probhu Isor do Dạud reaṅe kiriạ akana, uni do acʼren guti Dạud hotete Philisṭikoakʼ tite khon ar onkoren eṭakʼ sanam bạiriko khon uniren hoṛ Israelkoe bańcaokoa.”

¹⁹ Abner do Benjạminreko sãote hõ kathae roṛkeda. Ona chaḍa Israelko ar Benjạmin gusṭiren hoṛko okaṭakʼ cekae lạgidokʼko menetʼkan ona sanamakʼ Dạud baḍae ocoye lạgitʼ uni do Hebronteye senena.

²⁰ Abner do acʼ sãote bargel hoṛ soṅgekate tinre Hebronte Dạud ṭhene seṭerena unre Dạud do uni ar uniren hoṛko lạgitʼ mitʼṭecʼe bhojkeda.

²¹ Ar Abner do Dạude metadea, “Israelren sanamko jemon am tulucʼ mitʼṭecʼ bandhaoakʼreko hijukʼ ar amakʼ kusileka onko cetanrem raj daṛeakʼ onate ińren mạlik maharaj ṭhen onko jarwako lạgitʼ ńitge iń do calakʼ hoyokʼtińạ.” Niạ katha ańjomkate Dạud do Abnere sen ocoadea ar uni do sulukteye ruạṛena.

Abnerakʼ gujukʼ

²² Unre Dạudren hoṛko ar Joab do bạirikoko bhagaoketʼkote aema luluṭakʼ jinisanteko ruạṛ hecʼena. Unre Abner do Hebronre Dạud ṭhen bae tahẽkana, ente Dạud do uniye bidạ akade tahẽkana ar uni do sulukteye sen akan tahẽkana.

²³ Joab ar uniren lạṛhại phạdkoko ruạṛ hecʼen khan hoṛko do Joabko metadea, Nerren hopon Abner do raj ṭhene hecʼlena ar raj do uniye bidạ akadea ar uni do sulukteye ruạṛ senena.

²⁴ Unre Joab do raj ṭhen senkateye menkeda, “Am do cetʼem cekakeda? Abner do am ṭhene hecʼlenre cedakʼem sen ruạṛ ocokedea? Ńitokʼ uni doe ruạṛ calao akana.

²⁵ Am do Nerren hopon Abnerem baḍae akadegea; uni do am sãote cholkate amakʼ khoj khobor hatao ar cetʼkom ceka kana ona baḍae joṅ lạgitʼe hecʼlena.

²⁶ Niạ menkate Joab do Dạud ṭhen khone oḍok senente Abner sendraye lạgitʼ hoṛkoe kolketʼkoa. Onko do Sirạ ńutumanakʼ mitʼṭecʼ kuń ṭhen khon uniko ruạṛ ạgukedea. Menkhan Dạud do ona reakʼ bae baḍaeleda.

²⁷ Abner do Hebronteye ruạṛ hecʼena khan Joab do uni sãote oko okote galmaraoae reaṅ cholte nagraha reakʼ phaṭok talareye idikedea. Ar ona tayom do lacʼre sobokʼ kedeteye gocʼkedea. Nonkate uni do acʼren boeha Asahelakʼ mãyãm reakʼe halakeda.

^28-30 Joab ar uniren boeha Abisae do Abnerkin gocʼkedea, ente uni do unkinren boeha Asahel Gibiạn reakʼ lạṛhạireye gocʼledea. Tayomte Dạud do ona khobor ńamkateye menkeda, “Nerren hopon Abnerakʼ mãyãm reakʼ babotre iń ar ińakʼ rajosṭi do Probhu Isor samaṅre jaejug lạgitʼ bindusạngea. Joab ar uniren apatakʼ bõsren sanamkoge jemon ona mãyãm reakʼ dạyiko hoyokʼ. Joabakʼ bõsrenko sanam ghạṛicʼ jemon jãhãe baṅ jãhãe hereltetʼ khon boḍedakʼ oḍokokʼtako se murhucʼjom rog ńamko, jãhãege ṭheṅgate tiyokʼkateko taṛamma, arko khũn ocokʼma ar jomakʼ okulạnreko paṛaokʼma.”

³¹ Inạ tayom Dạud do Joab ar uni soṅgeten sanam hoṛkoe metatʼkoa, “Ape do apan ạpin kicricʼ oṛecʼkate coṭ horogpe ar homor halaṅate Abnerakʼ mạ̃ṛĩ laha lahate calakʼpe.” Ar Dạud hõ mạ̃ṛĩ gokʼ idikoe pańja idiketʼkoa.

³² Ar abner do Hebronreye topa ocoyena. Ar raj do Abnerakʼ topa ṭhen ãṭ aṛaṅte rarakʼe ehopʼena, ar sanam hoṛko rakʼkeda.

³³ Unre raj do Abner reaṅ nonkae homorkeda; “Abner do bebuj hoṛko lekae gocʼena!

³⁴ Amakʼ ti do tol baṅ tahẽkantama, ar jaṅgare hõ sikṛi do baṅ tahẽkana. Kharap hoṛkoakʼ tire cetʼleka hoṛko gujukʼ, onkage am hõm gocʼ ocoyena!” Niạ katha ańjomkate hoṛko do arhõ Abner lạgitʼ rarakʼko ehopʼena.

³⁵ Bela tahenrege jemon Dạud jãhãnakʼe jom ona lạgitʼ hoṛko do uniko jormoṭkedea; menkhan Dạud do kiriạkateye menkeda, “Siń candoe hạsurokʼ lahare piṭhạ se eṭakʼ jãhãnakʼ iń jom enḍekhan Isor do sạjạiye imạńma ar ona do bạṛicʼ sạjạige.”

³⁶ Sanam hoṛko do noako ańjomketʼ khan ạḍiko kusiyena. Sạrige, raj okakoe kạmiketʼ onate onko do ạḍiko kusiyena.

³⁷ Enhilokʼ Dạudren hoṛko ar Israelren sanamkoko baḍaekeda, Nerren hopon Abner goje reaṅ do rajakʼ jãhãn hat baṅ tahẽkana.

³⁸ Raj do acʼren hoṛkoe metatʼkoa, “Ape do cetʼ bape baḍaea, teheń Israel disạmren mitʼṭecʼ maraṅ mukhiyại gocʼena mente?

³⁹ Raj lekate ińiń ojokʼ bahal oco akanrehõ teheń iń doń nijorena ar Seruyaren hoponko bạń dormoj daṛeako kana. Probhu Isorge behoketʼkoakʼ kuṛại doe emakoma.”