2 Samuel 23 - সান্তালী বাইবেল

Dạudakʼ ses kathako

¹ Jisạiren hopon Dạudakʼ ses katha do noa kana: “Okoeye rakapʼ ocoakan, Jakobren Isor okoeye ojokʼ bahallede, Israelko talare liṭhur sekʼreńicʼ, hoṛ doe meneda,

² Probhu Isorren Jiu do iń hotete kathae roṛeda, uniyakʼ katha do ińakʼ luṭire menakʼa.

³ Israelren Isore meneda, Israelren asray-buru do ińe mitạń kana, ‘Okoe hoṛ dhoromteye ḍanṭaoko ar Isore botorae,

⁴ Uni do bae rimil akatʼ setakʼ siń cando reakʼ marsal lekanicʼ kanae; ar jạ̃ṛĩ dakʼ tayom siń cando reakʼ marsalre ot khon omonokʼkan ghãs lekanicʼ kanae.’

⁵ Isor ṭhen ińakʼ bõs do cetʼ onka do baṅkana? Iń iạte uni do mitʼṭecʼ jaejugakʼ bondobose dohoakada. Ona bondobos reakʼ sanamakʼko ṭhik leka sajao are khạṭi dohoakada. Ińakʼ bańcao doe jo baha ocoya, ar ińakʼ monsubạ doe puruntińạ.

⁶ Menkhan bạṛicʼ hoṛ do totʼ giḍi ocokʼ jạnum leka kanako, one onko do tite ohoko sapʼlen.

⁷ Okoe onko sapʼkoe men uni do mẽṛhẽtʼ reakʼ khanḍa bhanḍa se borlom beohar hoyokʼtaea; onate jãhãrege onkoko tahen onḍege seṅgelteko lo marao ocokʼa.”

Dạudren birbanṭa hoṛko

⁸ Dạudren birbanṭa hoṛkoakʼ ńutum do nonka leka: Tahkemonren Joseb-Boseboth do pene birbanṭakoren mathae tahẽkana. Mitʼṭen lạṛhạire uni do irạlsae hoṛe gocʼletʼkote Esniren Adinoko metaekan tahẽkana.

⁹ Uni tayom dosaricʼ doe tahẽkana Eleasar. Uni do Ahoyi bõsren Dodoren hopone tahẽkana. Philisṭiko tinre lạṛhại lạgitʼko jarwakʼkan tahẽkana unre onko henostako lạgitʼ okoe pene birbanṭa Dạud sãoteko tahẽkan onko modre Eleasar hõe tahẽkana. Ar lạṛhạire Israelkoko pạcen khan,

¹⁰ Eleasar do lạṛhại thạ̃ire teṅgoyente Philisṭiko ńẽńẽtʼe ehopʼena. Ar onko ńẽtʼ ńẽtʼteye laṅgayen khan uniyakʼ tire tarwaṛe do laṭkao uricʼena. Enhilokʼ Probhu Isor do mitʼṭecʼ maraṅ jite hoyocokeda. Ar lạṛhại phạdko tinre Eliasar ṭhenko ruạṛ hecʼena unre gocʼ hoṛkoakʼ jinisko luṭ chaḍa cekae reakʼ ar cetʼ hõ baṅ tahẽlentakoa.

¹¹ Uni tayom doe hoyokʼkana Hararen Age hopon Samaye. Mitʼ dhao Philisṭiko mạsri baṛgere hecʼkateko jarwayen khan Israelren lạṛhại phạdko do onko ṭhen khonko dạṛkeda.

¹² Menkhan Samay do tala baṛgere teṅgokate ona baṛgeye rukhiyạkeda ar Philisṭikoe ńẽtʼketʼkoa. Enhilokʼ Probhu Isor do maraṅ jitạue hoeocokeda.

¹³ Mitʼ dhao phosol gegetʼ jokhecʼ pegel birbanṭa modre onko pene birbanṭa do Adulam danderte Dạud ṭhenko hecʼena. Unre Philisṭiren lạṛhại phạdko do Rephayim reakʼ buru lodamre hecʼkateko ḍera akan tahẽkana.

¹⁴ Un jokhecʼ Dạud do hahaṅkar reakʼ aotan gaṛreye tahẽkana ar Philisṭiren lạṛhại phạdko do Bethlehemreko tahẽkana.

¹⁵ Unre Dạud do dakʼ tetaṅkede khane menkeda, “Jãhãege Bethlehem phaṭok-duạr ṭhenakʼ kuń khon thoṛa dakʼko ạguạń khan honaṅ!”

¹⁶ Niạ katha ańjomkate onko pene birbanṭa hoṛ do Philisṭiren lạṛhại phạdko talate senkate Bethlehem reakʼ phaṭok-duạr ṭhenakʼ kuń khon dakʼ ạgukate Dạudko emadea. Menkhan Dạud do ona dakʼ bae ńũleda; ona bodolte Probhu Isor ńutumte otreye dulkeda.

¹⁷ Uni doe menkeda, “E Probhu Isor, noa dakʼ iń ńũ ona do iń khon sahaṛ akae tahenma. Noa do cetʼ onko hoṛkoakʼ mãyãm do baṅkana okoe do jiwi cuputʼkate ạguko senlen?” Dạud do ona ńũńũ bae rebenlena. Onko pene birbanṭa hoṛkoakʼ kạmige nonka tahẽkana.

¹⁸ Seruya hopon Joabren boeha Abisae do onko pene hoṛren subedare tahẽkana. Uni do borlomte pesae hoṛe gocʼletʼkoa ar uni hõ onko pene birbanṭako leka ńutume hạran tahẽkana.

¹⁹ Uni do pene hoṛko khon hõ ḍher manote ńamleda. Onate onko pene hoṛko modre bae lekhalenre hõ onkoren subedare tahẽkana.

²⁰ Kabsilren Jehoyada hopon Bonae do mitʼṭecʼ birbanṭa hoṛe tahẽkana. Uni hõ maraṅ maraṅakʼkoe kạmileda. Moab Ariyelren barea hopone gocʼletʼkinạ. Mitʼdin him ńurokʼ hilokʼ uni do mitʼṭecʼ danderte bolokate mitʼṭecʼ dhạcri kule gocʼledea.

²¹ Uni do usul mitʼṭen Misri hoṛe gocʼledea. Uni Misri hoṛakʼ tire borlom tahẽkanre hõ uni do mitʼṭecʼ ṭheṅgawante uni secʼe laha idilena. Ar uni Misri hoṛakʼ ti khon borlom recʼkate ona borlomtege uniye gocʼledea.

²² Jehoyada hopon Bonaeakʼ kạmi hõ onkage tahẽkana. Uni hõ onko pea birbanṭa leka ńutume hạran tahẽkana.

²³ Onko pene hoṛko modre bae lekhalenre hõ “Pegel” ńutuman dolren hoṛko khon hõ uni do bạ̃ṛti manote ńamleda. Dạud do acʼakʼ rurukhiyạ reakʼ bhar do Bonae cetanregeye doholeda

²⁴ “Pegel” Ńutuman dolre do nokoko tahẽkana: Joabren boeha Asahel, Dodoren hopon Elhanan,

²⁵ Harodren Sema, Harodren Elika,

²⁶ Peletren Heles, Tekuaren Ikesren hopon Ira,

²⁷ Anathotren hopon Abieser, Husatren Sibekai,

²⁸ Ahohren Salmon, Nethopharen Maharai,

²⁹ Nethopharen Bana hopon Helob, Benjamin-gusṭiren Gibe Ribaeren hopon Ithoy,

³⁰ Pirathonren Benaya Gakʼas reakʼ tapol otren Hidai,

³¹ Arbaren Abi Albon, Bahurimren Asmawet,

³² Sakʼalbonren Eliahba, Benejasen, Jonathan,

³³ Hararren Sama, Hararren Sarar hopon Ahiam,

³⁴ Makaren Ahasbai hopon Eliphelet, Giloren Ahitophel hopon Eliam,

³⁵ Karmelren Hesro, Arabren Parai,

³⁶ Sabaren Nathan hopon Igal, Gadren Bani,

³⁷ Amonren Selek, Seruaren hopon Joabakʼ khanḍa bhanḍa asenicʼ Berotiạ Nohoroe,

³⁸ Jitriạ Era, Jitriạ Gareb,

³⁹ ar Hiti Uriạ. Onḍe do jotote pegel eae birbanṭa hoṛko tahẽkana.