2 Samuel 22 - সান্তালী বাইবেল

Dạudakʼ sarhao sereń

¹ Probhu Isor do Sạul ar eṭakʼ bạirikoakʼ ti khon tinre Dạude rukhiyạkedea unre Probhu Isor ńutumte Dạud do niạ sereńe sereńkeda:

² Probhu Isorge ińren usul buru, ińakʼ aotan gaṛ ar ińren chakʼḍaoicʼ;

³ Isor kangeae ińren usul buru do, unirege iń doń asray akana. Uni do ińren ḍhal kanae, rurukhiyạicʼ dereńge, unige ińakʼ usul gaṛ, ińakʼ asray ṭhạ̃i. Sasantaokoakʼ ti khon amge bańcaoińme.

⁴ Probhu Isor do sarhao ńam lek kanae, iń do uniń hohowae kana; onate ińren bạirikoakʼ ti khon iń do rukhiyạń ńameda.

⁵ Moron reakʼ ḍheokoteń esetʼ ạcurlena, maraokʼ reakʼ banbạsiteń toraslena.

⁶ Patal puri reakʼ barahikoteń tolakana, ar gujukʼ reakʼ pạsi do iń lạgitʼ oḍao tahẽkana.

⁷ Iń do muhinre ińren Probhu Isoriń hohowadea ar goṛo ńam lạgitʼ uni ṭheniń rakʼkeda. Uni do acʼakʼ tahen ṭhạ̃i khon ińakʼ aṛaṅe ańjomketʼtińạ; ińakʼ rakʼjoṅ do uniyakʼ luturre seṭerena.

⁸ Unre dhạrti do daldalaoena ar ḍikạ ḍakekʼ ehopʼena, buru reakʼ rehetʼko daldalaoena; uniyakʼ edrete onako do dal dalaoena.

⁹ Uniyakʼ mũ khon dhũạ do coṭte rakapʼena, ar moca khon ḍahao marao reakʼ seṅgel oḍokena. Ar uniyakʼ moca reakʼ seṅgelte koelako jolena.

¹⁰ Uni do sermae liwetʼketʼteye pheḍ hecʼena; uniyakʼ jaṅga latarre do hende rimil tahẽkana.

¹¹ Uni do Kerubre decʼkateye uḍạu hecʼena, ar hoe reakʼ phạ̃kṛạ̃kʼteye ạphir hecʼena.

¹² Ńutte uni doe esetʼ ạcurena; ar beṛhaete dakʼ reakʼ dạriạ hende rimilge tahẽkana.

¹³ Uni samaṅ reakʼ rãt khon seṅgel aṅgrako jol oḍokena.

¹⁴ Probhu Isor do serma khone huḍurkeda; ar maraṅ Isorakʼ aṛaṅ ańjomena.

¹⁵ Uni do sarkoe aṛakʼketʼte bạirikoe chirchạturketʼkoa ar bijlikoteye andmandaoketʼkoa.

¹⁶ Probhu Isorakʼ dhomkaote ar sahẽtʼte jalapuri reakʼ nalako ńelena, ar dhạrti reakʼ rehetʼko do oṭakʼena.

¹⁷ Uni do coṭ khon tiye tiyạrketʼteye sapʼkedińa, ar khạndri dakʼ khone owar rakapʼkedińa.

¹⁸ Ińren daṛean bạirikoakʼ ti khon uni doe bańcaokedińa; iń kurudạńko reakʼ ti khon onkoakʼ daṛe do iń khon hõ ḍhergetakoa.

¹⁹ Muhinre onko do ińko esetʼ ạcur ledeńạ, menkhan Probhu Isorgeye sapʼ sãohakedińa.

²⁰ Uni do mitʼṭecʼ phaelao jaegateye oḍok ạgukedińa; ar ińre kusiye tahẽkante uni doe rukhiyạkedińa.

²¹ Ińakʼ dhorom kạmi lekatege Probhu Isor doe dan akawạdińa, ińakʼ kạmi reakʼ napaetetʼ iạtege uni do kuṛạiye emadińạ;

²² Ente Probhu Isorakʼ horrege iń doń dãṛãn kana; ar bạṛicʼakʼ kạmikate ińren Isor khon bạń ocokʼ akana.

²³ Isorakʼ joto ạn-ạriko do iń samaṅre menakʼa; ar uniyakʼ ạn ạri khon do bạń ocokʼ akana.

²⁴ Uni samaṅre iń do bin dusạngeń tahẽkana, ar kại khon hõ pharakreń tahẽlena.

²⁵ Onate Probhu Isor do kuṛạiye emakawạdińa uniyakʼ mẽtʼãhã samaṅrege dhorom kạmi lekate ińakʼ mońjakʼ kạmikote.

²⁶ E Probhu Isor, am do biswạsiko tulucʼ do biswạstem beohareda ar dhoromko tulucʼ do dhoromem beohareda,

²⁷ Ar khạṭiko tulucʼ do khạṭigem beohareda, ar phẽpṛakʼko do amakʼ bud reakʼ phundi udukʼakome.

²⁸ Am do nacar jạtrenkom rukhiyạyetʼkoa, ar bạḍạiko tumbutʼ ocoko lạgitʼ amakʼ mẽtʼ do onko secʼge menakʼa.

²⁹ E Probhu Isor, amge ińakʼ diuhe do; amge ińakʼ ńut dom marsal ocoyetʼtińạ.

³⁰ Amakʼ goṛote lạṛhại phạdko cetanre iń do jhãpiń em daṛeakʼa, ińren Isorakʼ goṛote pạcrikoń don parom daṛeakʼa.

³¹ Isorakʼ horre jãhãn bin sạbitanakʼ do bạnukʼanaṅ; ar Probhu Isorakʼ katha do khạṭi mente sạbud akana. Uni do acʼre hirlạjoṅ kan sanam hoṛren ḍhal kanae.

³² Probhu eskar chaḍa ar okoe Isor menaea? Aboren Isor chaḍa cetʼ jãhãn aotan buru menakʼa?

³³ Isorge ińren kajak asray unige ińakʼ horkoe sạbit ocoakada.

³⁴ Uni do posta-jel leka jaṅga reakʼ daṛeye emakawạdińa; ar sanam usul jaegakoreye teṅgo ocoakadińạ.

³⁵ Uni ṭhen khonge ińakʼ ti do lạṛhạiye cetʼakada, onate ińakʼ ti do pitạl reakʼ akʼe gakʼ daṛeakʼ kana.

³⁶ E Probhu Isor, amakʼ rurukhiyạ ḍhal do ińem emakawạdińa; ar amakʼ goṛo doe maraṅ akadińạ.

³⁷ Am do ińakʼ taṛam horem phaelao akada, onate jaṅga do baṅ tohotʼlentińa.

³⁸ Ińren bạirikoń khudạuketʼkoa ariń jarkharketʼkoa; ar onko ạuriko gocʼ cabakʼ hạbicʼ tayom secʼ do bạń ruạṛlena.

³⁹ Onko doń marao giḍi akatʼkoa, ariń gejer caba akatʼkoa, ar alo jemonko beretʼ daṛeakʼ; ente ińakʼ jaṅga latarreko ńurakana.

⁴⁰ Amge ińakʼ ḍanḍare lạṛhại lạgitʼ daṛeyem emakawạdińạ, ar iń upạrtenko do ińakʼ jaṅga ṭhenem tumbutʼ ocoketʼkoa.

⁴¹ Ińren bạiriko iń khonem laga ńirketʼkoa; ar okoe ińko kurudạńkan onko doń marao giḍi akatʼkoa.

⁴² Onko do goṛo ńam lạgitʼko hohoyetʼkana, menkhan onko rukhiyạko lạgitʼ do celege bako hecʼlena. Onko do Probhu Isor secʼko koyokʼ hor akada, menkhan uni do bae roṛ ruạṛatʼkoa.

⁴³ Dhạrti reakʼ dhuṛi leka onko doń holoṅ ḍigirketʼkoa; ar ḍahar reakʼ losotʼ leka jaṅgateń lebetʼ gańjaoketʼkoa.

⁴⁴ E Probhu Isor, ińren huhulkan hoṛko khon am dom bańcao akadińạ, ar eṭakʼ jạtrenko cetanre iń do matha mentem dohoakadińạ; okoe bạń orom akatʼko tahẽkan onko hõ iń gobolrenko hoyena.

⁴⁵ Bidisiạ hoṛ doko luhum suhumińạ; ińakʼ katha ańjom torageko bataotińạ.

⁴⁶ Onko doko tolmojokʼa; ar thar tharaoakʼte gaṛ khonko oḍok hijukʼa.

⁴⁷ Probhu Isor doe jiwetʼgea. Ińakʼ asray cạṭạini do sarhao hoyokʼtae ma. Ińren Isor, okoe doe ińren rurukhiyạicʼ burukan, uni doe usulokʼma.

⁴⁸ Uni do eṭakʼ jạtrenko iń tabereye ạguyetʼkoa ar iń huyạte unige sạjạiye emakokana.

⁴⁹ Uni do bạirikoakʼ ti khone rukhiyạ edeńkana. E Isor, am do ińren bạiriko khonem usul akadińạ, ar jor julumkan hoṛko khon amgem rukhiyạ edeńkana.

⁵⁰ E Probhu Isor, ona iạtege eṭakʼ jạtrenko talare amakʼ ṭhonokiń sodortama ar amakʼ ńutumiń maraṅtama.

⁵¹ Probhu Isor do acʼren raj ḍher dhaoe jitạu ocoyea; hẽ, acʼren ojokʼicʼ lạgitʼ Dạud ar uniren bõsko lạgitʼ uni do acʼakʼ jaejug asambheṛ dayae udukʼetʼ kana.