2 Samuel 21 - সান্তালী বাইবেল

Gibeonkoakʼ gujukʼ iạte hakʼla hạli

¹ Dạude rajokʼkan tahẽkanre pe bochor akal hoylena ona do bochorke bochorge. Ona iạte Dạud do Probhu Isor ṭhen niạ reaṅe kuliyana. Ar Probhu Isor do roṛ ruạṛadeteye metadea, “Noa do Sạul ar uniyakʼ bõsrenko iạte hoyakana. Onkoge mãyãm reakʼ dusi kanako; Sạul do Gibeonrenkoe gocʼletʼkoa.”

² Ona iạte raj do Gibeonrenkoe hohowatʼkote onko tulucʼe galmaraokeda. Gibeonren hoṛ do Israel hoponko talare bako tahẽkana. Onko do Amorikoren sarecʼko kanako. Onko alo maraoko lạgitʼge Israelko doko kiriạlena, menkhan Sạul do Israel ar Jihudạ lạgitʼe ãṭokʼkan tahẽkante onko sanamkoge gocʼko reakʼe kurumuṭuleda.

³ Dạud do Gibeonkoe kuliketʼkoa, “Ape lạgitʼ do cetʼ iń ceka daṛekea? Ar apeakʼ loksanko cetʼ lekateń puruntapete Probhu Isorakʼ ạidạriren Israelpe bhor daṛekekoa?”

⁴ Gibeonrenko do uniko metadea, “Sạul ar uni bõsrenko ṭhen aleakʼ oka dạbiteakʼ menakʼtale ona do sona ar rupạ reaṅ do baṅkana se Israelko gocʼ giḍikako reaṅ hõ baṅkana.” Dạude kuliketʼkoa, “Enḍekhan ape lạgitʼ do cetʼ iń cekawapepe menjoṅkana?”

⁵ Onko do rajko roṛ ruạṛadea, “Okoe hoṛ aleye jarkhar akatʼle ar Israelkoakʼ simạna tala khon marao giḍi utạrle lạgitʼte bạṛicʼakʼe phundi akatʼ,

⁶ uniyakʼ bõs khon eae goṭen herel hoṛ aleakʼ tire soprotaleme. Ale do Probhu Isorren bachao hoṛko, metakʼme Sạulakʼ nagraha Gibeonre Probhu Isorakʼ burure Probhu Isor samaṅre onkole gocʼkoa ar sanamko samaṅre onkoakʼ mạ̃ṛĩkole giḍikakʼa.” Raj doe metatʼkoa, “Iń do apeakʼ tire onkoń soprotkoa.”

⁷ Dạud do Sạulren goṛomtetʼ koṛa, metakʼme Jonathanren hopon Mephiboset do jiwetʼe dohokedea, ente Sạulren hopon Jonathan ṭhen uni do Probhu Isor samaṅreye kiriạlena.

^8-9 Unre raj do Aya hoponera Rispawakʼ kukhiren Sạulren banar hopon Armoni ar Mephiboset ar Sạul hoponerat Merabakʼ kukhiren Meholathi Barsilairen hopon Adiyelren mõṛẽ goṭen hoponko do Gibeonkoakʼ tireye soprotketʼkoa. Onko do mitʼṭecʼ buruteko idiketʼkote Probhu Isor samaṅreko gocʼketʼkoa ar sanamko samaṅre onkoakʼ mạ̃ṛĩko giḍikada. Onko eae hoṛ do mitʼ dhaoteko gocʼketʼkoa; phosol gegetʼ jokhecʼ, metakʼme jao gegetʼ ehobokʼre onko doko gocʼ ocoyena.

¹⁰ Unre Ayaren hoponerat Rispa do gõṛẽ kicricʼ idikate mitʼṭecʼ dhiri cetanreye aṭetʼana. Pạhil phosol gegetʼ khon ehopʼkate tinạkʼ din ona mạ̃ṛĩko cetanre serma khon jạ̃ṛĩ dakʼ ạuri ńurokʼ hạbicʼ siń do cẽṛẽko ar ńindạ do bir janwarko ona mạ̃ṛĩ ṭhen bae sor ocoatʼkoa.

¹¹ Sạulren chuṭki era Aya hoponera Rispa okae cekakan ona do Dạudko lạiyadea.

¹² Unre Dạud do Jabes-Gileadren hoṛko ṭhen khon Sạul ar uniren hopon Jonathanakʼ jaṅkoe ạgukeda. Philisṭiko do Gilboare Sạulko gocʼkede khan unkin bana hoṛakʼ mạ̃ṛĩ do Bet-San nagraha reakʼ khạrạireko ṭaṅgaoleda. Jabes-Gileadren hoṛko do onḍe khon onakin mạ̃ṛĩko kombṛo ạguakatʼ tahẽkana.

¹³ Dạud do onḍe khon Sạul ar uniren hopon Jonathanakʼ jaṅkoe ạgu ocokeda. Ar sanam hoṛko samaṅre okoeko gocʼ ocolen onkoakʼ jaṅ hõko halaṅ jarwakeda.

¹⁴ Dạudren hoṛko do Sạul ar uniren hopon Jonathanakʼ jaṅ do Benjạmin ṭoṭha reakʼ Selare uniren apat Kisakʼ topareko topakada. Rajakʼ hukum lekage onko do sanamakʼko kạmikeda. Ona tayom disạm lạgitʼ Isor ṭhenko koeketʼ khan uni do koejoṅe ańjomketʼtakoa.

Philisṭiko upạrte lạṛhại

¹⁵ Philisṭiko ar Israelko talare arhõ lạṛhại ehopʼena. Dạud do acʼren phạdankote Philisṭiko upạrte lạṛhại lạgitʼe oḍok calaoena. Unre uni do lạṛhại lạṛhạiteye laṅga cabayena.

¹⁶ Ar Isbi-Benob ńutuman mitʼṭen Rophayi do nãwã sajte sajkate Dạud goje lạgitʼe hecʼena. Uniyakʼ borlom reakʼ ojon do pon keji hamal ar ona do pitạl reakʼ tahẽkana.

¹⁷ Menkhan Seruya hopon Abisae do Dạude rukhiyạkedea. Uni do Philisṭi hoṛe ńẽtʼkedea are gocʼkedea. Unre Dạudren hoṛko do kiriạwate Dạudko metadea, “Ar tishõ ale sãote lạṛhại do alom oḍok calakʼa, Israel reakʼ diuhe do alom ĩṛĩcʼ ocoya.”

¹⁸ Inạ tayom Philisṭiko sãote Gobre arhõ lạṛhại hoyena. Unre Husathi hoṛ Sibekae do Sippoy ńutuman mitʼṭen Rophayie gocʼkedea.

¹⁹ Gobre Philisṭiko sãote ar mitʼṭecʼ lạṛhạire Betlehemren Jare-oregim hopon Elhanan do Gatren Goliate gocʼkedea. Nui Goliạtakʼ borlom do kicricʼ teteńkoakʼ tur leka tahẽkana.

²⁰ Ona tayom ar mitʼṭecʼ lạṛhại Gatre hoylena. Ona lạṛhạire mitʼṭecʼ usul hoṛe tahẽkana one uniyakʼ banar ti ar banar jaṅgare turui goṭecʼkate jotote bargel pon goṭecʼ kạṭupʼ tahẽkantae. Uni hõ mitʼṭecʼ Rophayi hoṛe tahẽkana.

²¹ Uni do tinre Israelkoe henostayetʼko tahẽkana unre Dạud dadattetʼ Semae hopon Jonathan do uniye gocʼkedea.

²² Noko ponon hoṛ do Gatre girobasokʼ kan Rophayi hoṛko tahẽkana. Dạud ar uniren hoṛkoakʼ tite noko doko gocʼ ocoyena.