2 Samuel 17 - সান্তালী বাইবেল

Husại ar Ahitophelakʼ sopolha

¹ Ahitophel do Absalom arhõe metadea, “Teheń ńindạ gelbar hajar hoṛante Dạud khudạue lạgitʼ sen ocoạńme.

² Ente tinre uni do laṅga ar lorao akane tahena unrege uni cetanre jhãpiń ema. Ar nunạkʼ botoriń udukʼaea, acʼ sãoten hoṛ hõ botorteko dạṛ pạnḍuja. Unre eken raj eskargeń gojea,

³ Ar sanam hoṛko do am ṭheniń ruạṛ ạgukoa. Am okoeyakʼ gujukʼem khojkan uni chaḍa ar eṭakʼ sanam hoṛ tinreko ruạṛ hijukʼa unre do suluk hoyokʼa.

⁴ Absalom ar Israelren sanam murubbiko ṭhen niạ sopolha do bogeakʼ mente bujhạuena.

⁵ Menkhan Absalome menkeda, “Erekren Husại hoho ạguyepe, uniyakʼ jãhãnakʼ mementeakʼ menakʼtae khan bon ańjomtaea.”

⁶ Ado Husạiye hecʼen khan Absalom do uniye metadea, “Ahitophel do noa sopolhae emakatʼlea. Uni okae menakatʼ cetʼ ona bon onkaea? Ar babon onkae khan am do cetʼem menkea?”

⁷ Husại do Absalome metadea, “Niạ dhao Ahitophel oka sopolhae emakan ona do baṅ bhagea.

⁸ Am dom baḍaegea, ạpum ar uniren hoṛko do lạṛhại bir kanako. Onko do hopon recʼakade raṅgao akan birren bana eṅga lekan kanako. Ona chaḍa amren ạpum do lạṛhạire ạḍi gạkhuṛ hoṛ kanae; uni do acʼren lạṛhại phạdko talare bae giticʼ aṅgakʼa.

⁹ Uni do ńitokʼ jãhãn dander se jãhãn jaegareye oko akana. Ar lạṛhại ehobokʼ sãote amren lạṛhại phạdko gocʼlen khan tobe okoe ona kathako ańjom onko doko mena, ‘Absalomren lạṛhại phạdko do ḍhergeko gocʼ ocoyena.’

¹⁰ Unre joto khon daṛean ar dhạcri kul leka dilan lạṛhại phạd hõ botorte disạ adokʼtaea, ente Israelren sanam hoṛkogeko baḍaea, ạpum do mitʼṭen lạṛhại bir kanae ar uni sãote okoe menakʼko onko hõko daṛeangea.

¹¹ “Onate noa sopolhań emam kana: Dan khon Ber-seba hạbicʼ doreão aṛe reakʼ alekha gitil leka Israelren sanam hoṛ am ṭhenko jarwakʼma ar am hõ onko tulucʼ lạṛhại oḍok calakʼme.

¹² Onate jãhãregeye tahen onḍege abo do uni cetanre jhãp bon em daṛeakʼa ar otre sisir ńurokʼ leka uni cetanre bon hecʼ paṛaokʼa. Uni se uniren cele hoṛ hõ jiwetʼ babo dohokoa.

¹³ Ar jãhã nagrahategeye bolokʼ enḍekhan abo sanam Israelko do baber bon idiya ar nagraha sudhạ tul rakapʼkate lodamre bon giḍikakʼa, ar one onḍe nagraha reakʼ mitʼṭecʼ dhiri hõ ńur akan baṅ tahena.”

¹⁴ Absalom ar Israelren sanam hoṛko menkeda, “Ahitophelakʼ sopolha khon Erekren Husaiyakʼ sopolhage bhagea.” Ente Absalom cetanre jarkhar ạgui lạgitʼ Probhu Isorge Ahitophelakʼ bhage sopolhae ạuṛiyakʼ ocoytae lạgitʼe ṭhik dohoakatʼ tahẽkana.

¹⁵ Husai do naeke Sadok ar Abiathare metatʼkinạ, “Ahitophel do Absalom ar Israelren murubbiko niạ sopolhae emakawatʼkoa, menkhan iń do noa sopolhań ematʼkoa.

¹⁶ Aben do ńitge Dạud ṭhen khobor kolkate lạiyae ben, ‘Hahaṅkar reakʼ oka jaegare taṛamate gaḍa paromokʼ teheń do onḍe alom tahẽ aṅgakʼa; am do gaḍa paromokʼtege hoyokʼtama. Ar baṅkhan raj ar uni sãoten sanam hoṛko do gujukʼ hoyokʼtakoa.’ ”

¹⁷ Ona jokhecʼ Jonathan ar Ahimas do Enrogelre kin tahẽkana. Mitʼṭen kạ̃ṛmĩ do unkinakʼ khobore baḍaekan tahẽkana ar unkin do senkate Dạud raj khoborko kin emaekan tahẽkana, ente unkin lạgitʼ nagrahate oḍok bolokʼ do muhin reaṅge tahẽkana.

¹⁸ Menkhan mitʼṭen juạn koṛa do unkine bujhạuketʼkinạ ar senkate Absalome lạiyadea. Onate unkin do usạrate senkate Bahurimre mitʼ hoṛakʼ oṛakʼre kin boloyena. Uniyakʼ racare do mitʼṭecʼ kuń tahẽkana. Unkin do ona kuńre bolokate kin okoyena.

¹⁹ Ar uni hoṛren oṛakʼ hoṛ do mitʼṭecʼ ḍhaknate kuń reakʼ mocae ḍhakna esetʼkada ar ona cetanre busupʼe chiṭiạuada. Ar onate okoehõ bako bujhạu daṛeada.

²⁰ Absalomren hoṛ do ona oṛakʼte hecʼkate uni maejiuko kulikedea, “Ahimas ar Jonathan do okare menakʼkinạ?” Maejiu doe roṛ ruạṛkeda, “Unkin do ạtukʼ gaḍakin parom idikeda.” Onko hoṛ do khoj baṛakate bako ńamletʼkinte Jerusalemteko ruạṛ calaoena.

²¹ Hoṛko ruạṛ calaoen tayom unkin do kuń khon rakapʼkate Dạud raj khobor emae lạgitʼkin calaoena. Arkin metadea, “Am do ńitge mohnḍakʼme ar gaḍa paromokʼme; Ahitophel do am upạrte nonka sopolhae emakana.”

²² Onate Dạud ar uni soṅgeten hoṛ do oḍokente jordan gaḍako paromena. Onko do ạuri aṅga marsalokʼrege jordan gaḍako paromkeda, ar mitʼ hoṛ hõ bako sarecʼ tahẽlena.

²³ Ahitophel do tinreye ńelkeda, acʼakʼ sopolha leka kạmi baṅ hoylena unre uni do acʼren gadhare decʼkate acʼakʼ atoteye calaoena. Ar acʼakʼ oṛakʼ reakʼ jotowakʼ bebosta oṭokateye pạsi gocʼena. Ar acʼren apatakʼ topareko baekadea.

²⁴ Dạud do Mahanayimteye senena ar Absalom do Israelren sanam hoṛkowante jordan gaḍae paromena.

²⁵ Absalom do acʼren lạṛhại phạdko cetanre Joab bodolte Amasae bahalkedea. Amasae do Ithra ńutuman mitʼṭen Israelren hopone tahẽkana. Ithra do Nahasren hoponera Abigaele baplaledea. Abigael do Joabren eṅgattetʼ Seruyaren miserate tahẽkana.

²⁶ Absalom ar Israelko do Gilead ṭoṭhate senkateko derayena.

^27-28 Dạud do Mahanayimteye senen khan Amonrenkoakʼ Raba nagraha ren Nahas ren hopon Sobi, Ledeba khon Amiyel ren hopon Makir ar Rogelim Gilead ren Barsilae teko do Dạud ar uni sãoten hoṛko lạgitʼ aṭetʼakʼko, gamlako ar hasa reakʼ bhajanko ạgukeda. Ar Dạud ar uniren hoṛko jom ocoko lạgitʼ onko do guhum, jao, holoṅ, atawakʼ anaj, malhan, dạl, ramṛa,

²⁹ dumur rasa, dahe, gotom ar bhiḍikoko ạguketʼkoa. Onko doko hudiskeda, hahaṅkarre onko do reṅgecʼ ar tetaṅteko lorao akana.