2 Samuel 16 - সান্তালী বাইবেল

Dạud ar Siba

¹ Dạud do buru muthni khon thoṛae laha idiyen khan Mephibosetren guti Siba sãoteye ńapamena. Uni soṅgete do barea gadhakin tahẽkana ar unkinre do bojha lade tahẽkana. Ona bojhakinre do barsae piṭhạ, mitʼsae thoka kismis, mitʼsae thoka loa reakʼ piṭhạ ar harta reakʼ thulire mitʼ thuli darkha rasa tahẽkana.

² Raj do Sibae kulikedea, “Noako do okoe lạgitʼem ạguakada?” Sibae roṛ ruạṛkeda, “Gadhakin do raj gharońjrenko dejokʼ lạgitʼ, piṭhạ ar jo do hoṛko jom ocoko lạgitʼ ar darkha rasa do onko lạgitʼge okoe do hahaṅkarreko loraokʼ.”

³ Raje kuliyana, “Amren kisạ̃ṛren goṛomtetʼ koṛa do okare menaea?” Siba doe roṛ ruạṛkeda, “Uni do Jerusalemrege menaea, ente uni doe meneda, ‘teheń Israelko do goṛomiń haṛamakʼ rajosṭi ińko em ruạṛạńạ.’ ”

⁴ Niạ katha ańjomkate Raj do Sibae metadea, “Mephibosetakʼ sanam sompotti do ńitokʼ amiń ematʼmea.” Sibae menkeda, “Iń do amakʼ jaṅga reakʼ dhuṛi lek geń baṅ kana; ińren mạlik maharaj do daya baṛeye udukʼạń ma.”

Dạud ar Simai

⁵ Dạud raj do tinre Bahurimteye seṭerena unre Sạulakʼ bõsren mitʼṭen hoṛ do onḍe khone oḍok hecʼena. Uni do Geraren hopon Simaiye tahẽkana. Uni doe sarap ạguyetʼ tahẽkana.

⁶ Unre Dạudakʼ etom-końeren sanam lạṛhại phạdko ar rurukhiyạ dolko tahẽkanre hõ uni do Dạud ar uniren gutiko dhirite tińkoe ehopʼena.

⁷ Simaiye do sarap em emteye menkeda, “Men ocogokʼme, men ocogokʼme, eya mãyãm jokʼroyicʼ, eya dusṭạmi hoṛ!

⁸ Okoeyakʼ ṭhạ̃irem rajokʼkan uni Sạul bõsren sanam hoṛkoakʼ mãyãm reakʼ Probhu Isor do amreye hala akada. Ar Probhu Isor do amakʼ ona rajosṭi amren hopon Absalome emakawadea. Am dom khũniyạhi kana ar onatege nonkan dosarem paṛao akana.”

⁹ Noako katha ańjomkate Seruyaren hopon Abisae do raje metadea, “Nui gocʼ seta do ińren kisạ̃ṛ maharaj cedakʼe sarapae kana? Den uniyakʼ bohokʼ hesetae lạgitʼ aṛakʼạńme.”

¹⁰ Raje menkeda, “E Seruyaren hoponko, noa reaṅ ape sãote ińakʼ do cetʼ? Probhu Isorge, ‘Dạud sarapaeme’ noa kathae metaekan khan, tobe uni do okoeye kuli daṛekea, ‘cedakʼ nonka dom kạmikana?’ ”

¹¹ Dạud do unre Abisae ar uniren sanam kạmiyạkoe metatʼkoa, “Ińren hoponge ińakʼ jiwi hatao reakʼe kurumuṭu kan khan Benjamin gusṭiren nui hoṛ do cetʼ artetʼge bae onkaea. Uni okae cekayetʼkan ona baṛe onka ocoaepe, ente Probhu Isorge ona onkae lạgitʼe metaekana.

¹² Hoedaṛeakʼ Probhu Isor do ińakʼ niạ kosṭoe ńela, ar teheń okaṭakʼ sarapiń ńametʼ ona bodolte ińakʼe bhạlạitińạ.”

¹³ Inạ tayom Dạud do acʼren hoṛkoante horteye calao idiyena ar Simaiye do sarap em emte ar raj secʼ dhiri capatʼ capatʼte ar dhuṛi uḍiạu uḍiạute buru daṛaṅ secʼteye calaoena.

¹⁴ Raj ar uni soṅgeten hoṛko do okateko calakʼkan tahẽkan onḍeko seṭerena arko loraoena. Ona tayom Dạud do ona ṭhạ̃ireye jirạuena.

Absalom Jerusalemteye hecʼena

¹⁵ Ar Absalom ar Israelren sanam hoṛ do Jerusalemteko hecʼena. Ar Ahitophel hõ onko sãoteye tahẽkana.

¹⁶ Unre Dạudren gate Erekren Husai do Absalom ṭhen senkateye menkeda, “Maharaj jiwetʼ baṛeye tahenma! Maharaj jiwetʼ baṛeye tahenma.”

¹⁷ Absalom do Husạiye kulikedea, “Amren gate lạgitʼ pạtiạr do nõkʼõetam? Cedakʼ am do amren gate sãote bam senlena?”

¹⁸ Husại do Absalome metadea, “Probhu Isor ar noko hoṛko, metakʼme Israelren sanam hoṛ okoeko bachao akade, iń do unirengeń hoyokʼa. Ar uni sãotegeń tahena.

¹⁹ Ona chaḍa iń do okoeyiń sapʼ soraea? Uniren hoponge cetʼ baṅa? Cetʼleka ạpumiń sapʼsorae kan tahẽkan onkage am hõń sapʼsorama.”

²⁰ Absalom do Ahitophele metadea, “Ńitokʼ do cetʼ bo cekaea? Am do cetʼ solham emkińạ?

²¹ Ahitophel doe roṛ ruạṛketʼteye menkeda, “Raj oṛakʼ horhoe lạgitʼ ạpum do acʼren okoe chuṭki erakoe bạgi oṭoakatʼko am do onko tulucʼ giticʼ midokʼme. Enḍekhan Israelren sanam hoṛko baḍae daṛeakʼa, am do amren ạpum ṭhen hirkhạwạnicʼem hoyokʼa. Onate am sãoten sanam hoṛ doko am sejokʼa.”

²² Unre hoṛko do chat cetanre Absalom lạgitʼ mitʼṭecʼ tạmbuko ṭaṅgaokeda ar uni do sanam Israelkoakʼ mẽtʼãhã samaṅre acʼ apatren chuṭki erako tulucʼ giticʼ midokʼ lạgitʼ onḍeye boloyena.

²³ Onako dinre Ahitophelakʼ sopolha do Isor emakʼ sopolha menteko hudisetʼ tahẽkana. Dạud ar Absalom hõ Ahitophelakʼ sopolha do onkage kin hudisetʼ tahẽkana.