2 Samuel 15 - সান্তালী বাইবেল

Absalomakʼ soṛojontro

¹ Noa tayom Absalom do acʼ apnar lạgitʼ rãt gạḍi ar sadomkoe jogaṛketʼkoa ar acʼ laha lahate calakʼ lạgitʼ mõṛẽgel hoṛe bahalketʼkoa.

² Ar Absalom do ạḍi setakʼre beretʼkate nagraha reakʼ phaṭok-duạr secʼ calakʼ hor aṛereye teṅgokʼ kan tahẽkana. Unre jãhãege jãhãn mambla iạte raj ṭhen bicạr lạgitʼe hijukʼre Absalom do hohokate uniye kuliyede tahẽkana, “Am do okaṭakʼ atoren kanam?” Uni hoṛ doe menetʼ tahẽkana, “Iń amren guti do Israelren hana se noa gusṭiren hoṛ kạnạń.”

³ Ar Absalom do unre uniye metaekan tahẽkana, “Ńelme, amakʼ lạlisakʼ do ṭhikgetama, menkhan amakʼ katha ańjom lạgitʼ rajren do cele hoṛge bạnukʼkoa.”

⁴ Ona tayom uni do arhõe menetʼ tahẽkana, “Hae, iń do disạmren bikʼcạricʼ iń tahẽlen khan! Enḍekhan jãhãege iń ṭhen mambla se bicạr lạgitʼko hecʼkokʼ onkoakʼ do hok reakʼ iń bicạrketakoa.”

⁵ Ona chaḍa jãhãege uni ḍobokʼae lạgitʼko sorokʼkan tahẽkan onko do koke kateye cokʼako kan tahẽkana.

⁶ Israelren tinạkʼ hoṛ raj ṭhen bicạr lạgitʼko hijukʼkan tahẽkan Absalom do onko tulucʼ nonkageye beoharetʼ tahẽkana. Nonkate uni do Israelkoakʼ mone kombṛoyetʼtako tahẽkana.

⁷ Pon bochor tayom Absalom do raje metadea, “Probhu Isor ṭheniń manot akatʼakʼ purạu lạgitʼ iń do Hebronte sen ocoạńme.

⁸ Iń amren guti do Aram reakʼ Gesurreń tahẽkan jokhecʼ manot kateń menleda, ‘Probhu Isor do Jerusalemteye ruạṛ idiyiń enḍekhan Hebronte senkate Probhu Isor ńutumte samaṅokʼakʼ iń samaṅa.’ ”

⁹ Raj do uniye metadea, “Sulukte senjoṅme.” Unre Absalom do Hebronteye calaoena.

¹⁰ Absalom do Israelren sanam gusṭiko ṭhen noa katha menkate oko okote hoṛkoe kolketʼkoa, “Sakwa reakʼ saḍe ańjom toragepe mena, ‘Absalom do Hebronren raje hoyena.’ ”

¹¹ Unre Jerusalem khon barsae hoṛ do Absalom sãoteko calaoena. Onko do peṛa lekateko idi ocolena ar jãhãnakʼ begor baḍaekate soṛa montege soṅgeteko senlena.

¹² Samaṅokʼakʼ samaṅ jokhecʼ Absalom do Dạudren sosolhayicʼ Gili nagraha khon Ahitophel hoho ạguiye lạgitʼ hoṛkoe kolketʼkoa. Nonkate soṛojontro do arhõ diṛho idiyena, ente disom hoṛko do Absalom ṭhenko saṅge idiyena.

Dạud Jerusalem khone dạṛetʼkan

¹³ Mitʼṭen hoṛ Dạud ṭhen hecʼkateye metadea, “Israelkoakʼ mon do Absalom secʼ ạcur akantakoa.”

¹⁴ Unre Dạud do Jerusalemre acʼren okoeko kạmiyạ hoṛko tahẽkan onkoe metatʼkoa, “Dela, abon do nonḍe khon bon dạṛa. Ar baṅkhan okoehõ Absalomakʼ ti khon rukhiyạ do bako ńama. Abo do ńitge oḍok calakʼ hoyokʼtabona, ente usạrage ruạṛ hecʼkate uni do muhinreye paṛao oco bona ar nagraharen sanam hoṛkoe marao cabakoa.”

¹⁵ Rajren kạmiyạko do uniko metadea, “Aleren mạlik maharajakʼ monsubạ lekage ale dole sapṛaogea.”

¹⁶ Unre raj doe mohnḍayena ar acʼakʼ oṛakʼren sanamko uniko pańjakedea. Ar raj oṛakʼ horhoe lạgitʼ acʼren gel goṭen chuṭki erakoe doho oṭokatʼkoa.

¹⁷ Raj ar uni sãoten sanam hoṛ do nagraha mucạtʼre senkateko teṅgoyena.

¹⁸ Ar Dạudren hoṛko do uni samaṅteko laha idiyena. Onko modre Kerethiko, Pelethiko ar Gatren turui sae hoṛko tahẽkana okoe do Gat khon raj sãoteko hecʼlen tahẽkan.

¹⁹ Unre raj do Gatren Itaiye metadea, “Ale sãote am do cedakʼem hijukʼ kana? Do ruạṛ senkate Absalom raj sãote tahenme. Ente am dom bidisiạ hoṛ kana; ar amakʼ disạm khon am dom oḍok hecʼakana.

²⁰ Hola gem hecʼakana. Ar teheńge ale tulucʼ ṭahapʼ ṭạṭupʼ dãṛãbãṛa ocome do ṭhikakʼ baṅ hoyokʼa? Ińge bạń baḍaea iń do okateń calakʼ kana. Do ruạṛ calakʼme ar amakʼ disạmren hoṛko soṅgete idi torakom. Asambheṛ dulạṛ ar pạtiạrge ape tulucʼ baṛe tahenma.”

²¹ Menkhan Itaiye do raje roṛ ruạṛadea, “Jiwetʼ Probhu Isor ńutumte kiriạkateń meneda ar ińren mạlik ńutumte kiriạkateń meneda, baṅ doń gujukʼ baṅ doń jiwedokʼ, ińren mạlik maharaj jãhãregeye tahen iń amren guti hõ onḍegeń tahena.”

²² Niạ katha ańjomkate Dạud do Itaiye metadea, “Enḍekhan ma laha idikʼme.” Unre Gatren Itaiye do acʼren sanam hoṛko ar acʼ gharońjren hoṛkoanteye laha idiyena.

²³ Dạudren hoṛko tinreko calakʼkan tahẽkana unre disạmren sanam hoṛko do ãṭ aṛaṅte rarakʼko ehopʼena. Raj ar uniren sanam hoṛ do Kedron lodamko paromketʼte hahaṅkar secʼko laha idiyena.

²⁴ Raj do tinre nagraha khone oḍok calakʼkan tahẽkana unre naeke Sadok ar sanam Liwiko hõ uni sãoteko tahẽkana. Liwiko do Isorakʼ goha sindukko gokʼ idiyetʼ tahẽkana. Ar nagraha khon sanam hoṛ ạuriko oḍok hijukʼ hạbicʼ Liwiko do Isorakʼ sindukko dohokeda ar naeke Abiathar hõ onko sãoteye tahẽkana.

²⁵ Ado sanam hoṛko oḍoken khan Raj do Sadoke metadea, “Isorakʼ sinduk do nagrahate idi ruạṛ me. Ente Probhu Isorre dayań ńamle khan uni doe ruạṛ idiyińạ ar noa sinduk ar uniyakʼ tahen ṭhạ̃i arhõe ńel ocoyińạ.

²⁶ Menkhan uniye menkeda, ‘am cetanre bạń kusiya,’ enḍekhan uni oka bhageye hudis onage ińreye cekae ma.”

²⁷ Ona tayom raj do naeke Sadoke metadea, “Jotowakʼ mam ńeletʼkange. Amren hopon Ahimas ar Abiatharren hopon Jonathan soṅgekate Do sulukte ape do nagrahate ruạṛ calakʼpe.

²⁸ Ar tin hạbicʼ iń baḍae ocoyiń lạgitʼ am ṭhen khon khobor baṅ hecʼạń un hạbicʼ hahaṅkarre oka jaegare taṛamte paromokʼ onḍegeń tạṅgi hataṛa.”

²⁹ Onate Sadok ar Abiathar do Isorakʼ sinduk Jerusalemte kin idi ruạṛkeda ar onḍegekin tahẽyena.

³⁰ Dạud do rakʼ rakʼte jạitun buruteye rakapʼ calaoena. Uni do bohokʼ poṭom esetʼkate eken jaṅgae taṛametʼ tahẽkana. Hoṛko hõ jotoge uni sãote bohokʼ poṭomkate rakʼ rakʼte rakabokʼko ehopʼena.

³¹ Unre Dạudko lạiyadea, “Absalom tulucʼ soṛojontroko modre Ahitophel hõ menaea.” Niạ katha ańjomkate Dạud do nonka menkate koejoṅe ehopʼena, “E Probhu Isor, Ahitophelakʼ sopolha baṛe ạuṛiyakʼ ocoytaeme.”

³² Ar hoṛko buru coṭre oka ṭhạ̃ire Isorko sewawae kan tahẽkan onḍenko seṭeren khan Erekren Husai do uni sãote ńapamokʼ lạgitʼe hecʼena. Uniyakʼ kicricʼko do oṛecʼ oṛecʼ ar bohokʼ do dhuṛite loso ponḍo tahẽkantaea.

³³ Dạud do uniye metadea, “Am iń sãotem calakʼ khan ińakʼ bojha do ḍherokʼ tińạ.

³⁴ Menkhan nagrahate ruạṛ senkate Absalom metaeme, ‘E maharaj iń do amren guti menkategeń tahena; cetʼleka iń do ạpumren gutiyiń tahẽkan onkage ńitokʼ hõ amren gutige minạńa.’ Enḍekhan am do Ahitophelawakʼ sopolha iń lạgitʼem bhoṭ ocoya.

³⁵ Naeke Sadok ar Abiathar tạkin hõ onḍe am sãotekin tahena. Ar raj oṛakʼre okam ańjom onage unkinem baḍae ocokina.

³⁶ Sadokren hopon Ahimas ar Abiatharren hopon Jonathan hõ onḍe onko sãote menakʼkinạ. Ar jãhãnakʼ hoylen khan unkin hotetege onam baḍae ocoyińạ.”

³⁷ Dạudren gate Husae do tinre nagrahateye boloyena unre Absalom hõ onḍeye seṭerena.