2 Samuel 14 - সান্তালী বাইবেল

Absalom Jerusalemteye ruạṛ hecʼen

¹ Seruyaren hopon Joabe baḍaekeda, raj do Absalom lạgitʼ jiwi ragokʼ kantaea.

² Onate Joab do Tekoate hoṛ kolkate onḍe khon mitʼṭen cạtur maejiue hoho ạgukedea. Uniye metadea, “Am do homor halaṅokʼ reakʼem bhana. Am do hokʼmor halaṅ reakʼ kicricʼ horogme ar hoṛmore sunum alom ojoga. Ar nonkan maejiu lekam udugokʼa am do ḍher din khonem hokʼmor halaṅeda.

³ Ona tayom raj ṭhen senkate noa katham roṛa.” Ar Joab do uni cetʼe roṛa onae lạiyadea.

⁴ Tekoaren uni maejiu do unre raj ṭhen senkate otre ombakʼente uni ḍobokʼadeteye menkeda, “E maharaj, rukhiyạyińme baṛe!”

⁵ Raj do uniye kulikedea, “Cetʼ muskilakʼrem paṛao akana?” Uni doe menkeda, “Sạri kathageń meneda, ińren jãwãe doe gocʼena, ar iń doń rạnḍi akana.

⁶ Iń amren kạ̃ṛmĩren do barea koṛakin tahẽkantińa. Mitʼdin unkin do ṭạnḍire jhogṛakʼ kin ehopʼena ar onḍe unkin chaḍaokin leka do celege bako tahẽkana. Onate unkin modre mitʼṭen do dosaricʼe gocʼkedea.

⁷ Ńitokʼ ińren jãwãeakʼ bõsren hoṛko do iń amren kạ̃ṛmĩ upạrteko teṅgo akana arko meneda, ‘Dini uni hoṛ oḍok ạgualeme okoe do acʼren boehae gocʼakade. Ale do uniren boehawakʼ jiwi reakʼle hala hạliya. Enḍekhan sompottiren ạidạriyicʼ mente do ar okoege bako tahena.’ Onko do ińakʼ sarecʼ akan aṅgra hõ ĩṛĩj tińko khojkana. Onka hoylen khan ińren jãwãeakʼ ńutum do dhạrti khon meṭaokʼtaea ar uniren bõsko hõ bako tahena.”

⁸ Raj do maejiue metadea, “Do oṛakʼte ruạṛ calakʼme. Iń do am babotre mitʼṭecʼ iń bebostaea.”

⁹ Unre Tekoaren maejiu do raje metadea, “E ińren mạlik maharaj, dostetʼ do iń ar ińakʼ gharońj cetanrege paṛaokʼma. Raj ar uniyakʼ siṅghạson do miridosge tahenma.”

¹⁰ Raje menkeda, “Jãhãe jãhãnakʼe metam khan onko do iń ṭhenem ạgukoa; enḍekhan ghuriạ ar bako jalaomea.”

¹¹ Maejiue menkeda, “Maharaj do acʼren Probhu Isor ńutumteye kiriạkʼma jemon mãyãm pańjako do ar aloko gogocʼ. Ar baṅ khan ińren hoponiń hõko gojea.” Raje menkeda, “Jiwetʼ Probhu Isor ńutumteń kiriạkʼ kana, amren hoponakʼ bohokʼ reakʼ mitʼṭecʼ upʼ hõ otre baṅ ńurokʼtaea.”

¹² Unre maejiue menkeda, “Ińren kisạ̃ṛ maharaj ṭhen mitʼṭecʼ katha baṛe roṛ ocowạńme.” Uni doe menkeda, “Ma roṛme.”

¹³ Maejiue menkeda, “Enḍekhan Isorren hoṛko upạrte onkan mitʼṭecʼ kạmi reakʼ katha do cedakʼem hudisjoṅ kana? Maharaj nonkan katha tinreye roṛa unre uni do cetʼ apnarge bae dusikʼ kana? Ente uni do acʼren laga oḍokicʼ hopon acʼakʼ oṛakʼte bae ạgu ruạṛ edekana.

¹⁴ Otre dakʼ dul giḍile khan cetʼleka ona ar baṅ hạr ruạṛokʼ onkage abo hõ bon gujukʼa. Menkhan Isor do jiwi bae hataoa bickom nonkae bebostaea jemon ocokʼ giḍi akade hoṛ acʼ khon pharakre aloe tahen.

¹⁵ “Hoṛko botorko udukʼạdiń tahẽkanre ińren kisạ̃ṛ maharaj do niạ katha lạiyae lạgitʼ iń hecʼlena. Iń doń hudisan tahẽkana, raj sãote kathań roṛ legaea; hoedaṛeakʼa uni do ińakʼ kathae ańjomtińa.

¹⁶ Iń ar ińren hoponiń do Isorakʼ sompotti khon, metakʼme acʼren hoṛko tala khon marao giḍi liń lạgitʼ okoe hoṛe kurumuṭukan uniyakʼ ti khon hoedaṛeakʼa maharaj doe rukhiyạ lińạ.

¹⁷ “Ńitokʼ iń amren kạ̃ṛmĩ do noań hudiseda, ińren maharajakʼ katha jemon suluke imạń, ente boge-bạṛicʼ bicạrre ińren kisạ̃ṛ maharaj do Isorren mitʼṭen goḍet lekanicʼ kanae. Amren Probhu Isor do am sãotege baṛeye tahenma.”

¹⁸ Unre raj do uni maejiue metadea, “Okań kulime ona reakʼ roṛ ruạṛ do iń ṭhen khon alom okoya.” Maejiue menkeda, “Ińren kisạ̃ṛ maharaj ma roṛme.”

¹⁹ Raje kuliyana, “Niạ babotre am tulucʼ cetʼ Joabakʼ ti menakʼa?” Maejiue roṛ ruạṛkeda, “E ińren kisạ̃ṛ maharaj, amre kiriạkateń meneda, am okam roṛakatʼ ona khon etom se końe secʼ do celege ohoko ghańjeṛlena. Hẽ amren guti Joabge niạ kạmi lạgitʼe men akawạdińa ar unige noako kathae lại cetʼ akawạdińa.

²⁰ Kathako sojhekakʼ lạgitʼge amren guti Joab do noae kạmi akada. Disạmre cetʼ hoyokʼkana baṅ hoyokʼkana ona do ińren kisạ̃ṛgeye baḍaea. Uniyakʼ akel do Isorren goḍet lekage.”

²¹ Raj do Joabe metadea, “Bhagegea, iń do amakʼ nehõrteakʼ iń dohoyeda. Do senkate uni koṛa Absalom ạgu ruạṛem.”

²² Ar Joab do otre ombakʼente raje ḍobokʼadea are sarhaokedea. Ona tayom Joabe menkeda, “E ińren mạlik, teheń amren golam doń baḍaekeda, iń do am ṭhen dayań ńamakada, ente maharaj do ińakʼ nehõr joṅakʼe ańjom akatʼtińạ.”

²³ Ona tayom Joab do Gesurte senkate Absalom do Jerusalemteye ruạṛ ạgukedea.

²⁴ Raj doe menkeda, “Uni do acʼakʼ oṛakʼregeye tahenma. Ar ińakʼ mẽtʼãhã do alo jemone ńeltiń.” Onate Absalom do acʼakʼ oṛakʼteye boloyena; ar rajakʼ mẽtʼãhã do bae ńelleda.

Absalom do Dạud tulucʼe ńapamokʼkan

²⁵ Goṭa Israel disạmre Absalom leka ńelokʼte mońj do ar okoe hõ bako tahẽkana. Mońj ńelokʼ iạte uni do jotoko khon bạ̃ṛti sarhaoe ńametʼ tahẽkana. Uniyakʼ jaṅga talka khon coṭ bohokʼ hạbicʼ okare hõ cetʼ khutge baṅ tahẽkantaea.

²⁶ Bochor reakʼ mucạtʼre uni do upʼe getʼ ocoyetʼtae tahẽkana, ente uniyakʼ upʼ reakʼ hamal do dher idikʼkan tahẽkana. Are soṅle khan ona reakʼ hamal do bar keji tala hoyokʼkan tahẽkana.

²⁷ Absalomren do mitʼṭen kuṛi ar pe koṛa hoponko tahẽkantaea. Kuṛiyakʼ ńutum do Tamar tahẽkana. Uni do ńelokʼte ạḍi mońje tahẽkana.

²⁸ Absalom do bar bochor Jerusalemreye tahẽkana; menkhan rajakʼ mẽtʼãhã do bae ńelleda.

²⁹ Ona tayom uni do raj ṭhen calakʼ iạte Joabe hohoadea, menkhan Joab do uni ṭhen senokʼ bae rebenlena. Uni do dosar dhao arhõ Joabe hohoadea, menkhan niạ dhao hõ Joab do uni ṭhen senokʼ bae rebenlena.

³⁰ Unre Absalom do acʼren gutikoe metatʼkoa, “Ńelpe, ińakʼ khet panterege Joabakʼ khet hõ menakʼtaea. Uni do onare Jaoe er akada. Ape do senkate onare seṅgel junḍiyakʼpe.” Ar Absalomren gutiko do senkate ona khetre seṅgelko junḍiyada.

³¹ Unre Joab do Absalomakʼ oṛakʼte hecʼkate uniye metadea, “Amren gutiko do cedakʼ ińakʼ baṛgere seṅgelko junḍiyada?”

³² Absalom do roṛ ruạṛketʼte Joabe metadea, “Nonḍem hijukʼ iạte am ṭhen hoṛiń kolletʼkoa jemon raj ṭhen senkate noam kuliye, ‘cedakʼ iń do Gesur khon nonḍeń hecʼena? Onḍe tahenge cetʼ iń lạgitʼ boge baṅ tahẽkana?’ Ńitokʼ jemon rajakʼ mẽtʼãhãń ńel daṛeakʼ ona bebostaeme. Ar jãhãnakʼ iń dos akatʼ khan uni do ińe gojeńma.”

³³ Unre Joab do raj ṭhen senkate ona kathae lạiyadea. Ar raj do Absalome hohoade khan uni do raj samaṅre otreye ombakʼena. Unre raj do Absalome cokʼadea.