2 Samuel 13 - সান্তালী বাইবেল

Amnon ar Tamar

¹ Tayomte nonka hoyena. Dạudren hopon Absalomren do Tamar ńutuman ńelokʼte mońj mitʼṭen miserae tahẽkantaea. Ar Dạudren hopon Amnon do uni ạḍiye dulạṛede tahẽkana.

² Amnon do acʼren misera Tamar ńame lạgitʼ iạteye ruạ utạrena. Kũạ̃ri kuṛiye tahẽkante, uni jãhãnakʼe cekaeye do baṅ hoedaṛeakʼ lekae hudisetʼ tahẽkana.

³ Dạudren dadattetʼ Simeyaren hopon Jonadab do Amnonren gateye tahẽkana. Uni do ạḍi cạtur hoṛe tahẽkana.

⁴ Uni do Amnone metadea, “E raj kũạr, din dinte cekate nonka dom osogokʼ kana? Iń do cetʼ bam lạiyạńạ?” Amnone menkeda, “Iń do Absalomren misera Tamar iń dulạṛ edekana.”

⁵ Jonadabe menkeda, “Am do aṭetʼre giticʼkokʼme ar ruạkʼ kanam mente bhanme. Ar amren ạpum tinre am ńeńele hijukʼa unre unim metaea, ‘dayakate ińren misrań Tamar iń ṭhen kolkaeme jemon uni do hecʼkate thoṛa jomakʼe jom ocoyiń. Ar ona jomakʼ do iń samaṅregeye tearma jemon onań ńel are jom ocoyiń.”

⁶ Amnon do ruạkʼ kanae menteye giticʼ hapeyena. Ar raj do uni ńeńele hecʼen khan uniye metadea, “Dayakate ińren miserań Tamar do iń ṭhen kolkaeme ar uni do jemon hecʼkate iń samaṅre thoṛa piṭhại benaoạńma are jom ocoyińma.”

⁷ Unre Dạud do niạ menkate Tamar ṭhen hoṛe kolketʼkoa, “Do dadam Amnonakʼ oṛakʼte calakʼme ar thoṛa jomakʼ tear oṭoaeme.”

⁸ Niạ katha ańjomkate Tamar do dadattetʼ Amnonakʼ oṛakʼteye boloyena. Unre Amnon do aṭetʼreye giticʼ akan tahẽkana. Tamar do uni samaṅrege holoṅe thapṛaketʼte piṭhại rapakʼ isinkeda.

⁹ Ar ona tayom do tawate ona piṭhạko idikate uni samaṅreye dohokeda, menkhan Amnon do ona jojom bae rebenlena. Amnon do sanam hoṛ oṛakʼ khon oḍokokʼe metatʼkoa, onate onko jotoge oṛakʼ khonko oḍokena.

¹⁰ Unre Amnon do Tamare metadea, “Jomakʼ hataokate dela ińakʼ kandhate aderme. Ar jom ocoyińme.” Onate Tamar do tearakʼ piṭhạkoante dadattetʼ Amnonakʼ kandhateye boloyena.

¹¹ Menkhan jom lạgitʼ tinre uni ṭhene idikeda unre Amnon do uni jhuṭiạukedeteye metadea, “Dela iń tulucʼ giticʼmitʼlen me.”

¹² Tamar do uniye metadea, “Alo dada, alom jormoṭeńa. Ente Israelko talare nonkanakʼ do baṅ ganokʼa. Nonkan bạṛicʼakʼ kạmi do alogem kạmiya.

¹³ Ińakʼ do cetʼ hoyokʼtińạ? Cekate ińakʼ lajao doń okoetińạ? Ar amhõ Israelko talare mitʼṭen kharap hoṛ menteko baḍaemea. Nehõram kạnạń, am do boroṅ raj ṭhen senkate metaeme; enḍekhan uni do amakʼ tireye jimạyińạ.”

¹⁴ Menkhan Amnon do Tamarakʼ katha bae ańjomleda. Ar Tamar khon daṛegeye tahẽkante uniye jormoṭkedea ar uni tulucʼe laṭghaṭkeda.

¹⁵ Inạ tayom Amnon do uni kurudaye ehopʼena. Ar tinạkʼe dulạṛedekan tahẽkan ona khon hõ bạ̃ṛti kurudaye ehopʼena. Amnon do uniye metadea, “Beretʼme ar calao joṅme.”

¹⁶ Tamar do uniye metadea, “Baṅa dada baṅ, ińre oka bạṛicʼakʼem kạmiketʼ ńitokʼ ińem oḍok giḍiliń khan ona khon hõ ḍher bạṛicʼakʼem kạmiya.” Menkhan Amnon do uniyakʼ katha bae ańjomleda.

¹⁷ Uni do acʼren guti hohowadeteye metadea, “Nui ạimại do bahrete oḍok giḍikaeme ar silpiń sińkakʼme.”

¹⁸ Unre guti do Tamare oḍok gotʼkadete silpiń reakʼ huṛkạṛe lagaokada. Uni kuṛi do mitʼṭecʼ tilpạṅ talpaṅ kicricʼe horokʼ akatʼ tahẽkana, ente rajren kũạri kuṛi do nonkan kicricʼgeko horokʼetʼ tahẽkana.

¹⁹ Unre Tamar do bohokʼre torocʼe ojokʼana ar oneye horokʼ akatʼ kicricʼe oṛecʼketʼtaea. Ar ona tayom do bohokʼ capokate ãṭ aṛaṅte rakʼ rakʼteye calaoena.

²⁰ Tamarren dadattetʼ Absalom do uniye kulikedea, “Amnon do cetʼ ame nosṭo akatʼmea? E mại, niạ babotre okoehõ cetʼge alom lạiyakoa, ente uni doe amren boeha kana. Ar noa iạte mon do alom bạṛijtama.” Un khon Tamar do acʼren boeha Absalomakʼ oṛakʼre mulingeye tahẽyena.

²¹ Dạud raj do noa katha ańjomkate ạḍiye raṅgaoena.

²² Ar Absalom hõ Amnon do boge bạṛicʼ cetʼge bae metadea. Amnon do uniren miserae nosṭokedete Absalom do uni kurudaye ehopʼena.

Amnonakʼ gujukʼ

²³ Niạ bar bochor tayom Ephrayim simạna ṭhen Bakʼal-Hasorre Absalomren bhiḍikoakʼ upʼko kạpciyetʼtako tahẽkana. Unre Absalom do rajren sanam hoponko onḍeye neotaketʼkoa.

²⁴ Uni do raj ṭhen senkateye menkeda, “Amren guti do acʼren bhiḍikoakʼ upʼe kạpciyetʼtakoa. Onate raj do cetʼ acʼren gutikoante iń ṭhene hijukʼa?”

²⁵ Raje roṛ ruạṛkeda, “Baṅa beṭa, ale joto hoṛ do bale calakʼa; arle calaolen khan amakʼ jhamela hoyokʼtama.” Absalom do ạḍiye jormoṭkedere hõ uni do calakʼ bae rebenlena, menkhane bhoradea.

²⁶ Unre Absalom do raje metadea, “Am bam calakʼ khan tobe do ińren boeha Amnon ale sãote sen ocoaeme.” Raj do uniye kulikedea, “Cedakʼ ape tulucʼ doe calakʼa?”

²⁷ Menkhan Absalome jormoṭkede khan uni do Amnon ar uni sãote joto raj kũạrkoe kolkatʼkoa.

²⁸ Absalom do acʼren hoṛko noae hukumatʼkoa, “Ńelpe, darkha rasa ńũkate tinre Amnon doe moṅgonokʼa unreń metape khan, ‘Amnon ńẽdepe,’ Unre ape do unipe gojeya. Ar alope botorokʼa. Ente ińgeń hukumape kana. Diljoṅpe ar daṛeanko hoyokʼpe.”

²⁹ Onate Absalomren hoṛko do uniyakʼ hukum lekage Amnonko gocʼkedea. Noa ńelte rajren eṭakʼ hoponko do apan apin khaccarre decʼkateko dạṛkeda.

³⁰ Onko horreko tahẽkanrege Dạud doe ańjomkeda, Absalom do rajren sanam hoponkoe gocʼketʼkoa, onko modre okoehõ jiwetʼ do bạnukʼkoa.

³¹ Niạ katha ańjomkate raj doe teṅgoyena ar acʼakʼ kicricʼe oṛecʼketʼtaea ar otreye giticʼ hapeyena. Uniren gutiko hõ apan ạpin kicricʼ oṛecʼkate uni sorreko teṅgo hapeyena.

³² Menkhan Dạudren dadattetʼ Simeyaren hopon Jonadab doe menkeda, “E ińren mạlik alom hudisa, joto raj kũạrgeko gocʼ ocoakana mente; eken Amnon motogeye gocʼ ocoakana. Ona reakʼ karon do hoyokʼkana, one oka hilokʼ Amnon do Absalomren misera Tamare nosṭolede enhilokʼ khonge Absalom do noae goṭa akatʼ tahẽkana.

³³ Rajren joto kũạrko gocʼ akana hudiskate ińren mạlik maharaj do alo jemone mondukokʼ, ente eken Amnon motogeye gocʼ ocoakana.”

³⁴ Ar Absalom hõe dạṛ akatʼ tahẽkana. Unre okoe hoṛ do rajren pahradare tahẽkan uni do, buru aṛeteakʼ Horonayim hor horte ạdi gadel hoṛ hijukʼ kane ńelketʼkoa.

³⁵ Ar Jonadab do raje metadea, “Hanko ńelkom, raj kũạrko hijukʼkana. Amren guti okaṭakʼ iń metatʼme tahẽkan onage hoyena.”

³⁶ Uniyakʼ katha ạuri mucạdokʼrege rajren hoponko doko hecʼ seṭerena ar ãṭ aṛaṅte rarakʼko ehopʼena. Unre Raj ar uniren kạmiyạko hõ ạḍitetʼko rakʼkeda.

^37-38 Absalom hõe dạṛketʼte Gesurren raj Amihudren hopon Talmai ṭhene senena. Dạud do acʼren hopon Amnon lạgitʼ din hilokʼe homor halaṅetʼ tahẽkana. Ar Absalom do Gesurre senkate pe bochore tahẽyena.

³⁹ Dạud raj do uni ṭhen calakʼ reakʼ ạḍi mon tahẽkantaea, ente Amnonakʼ gujukʼ tayom uniyakʼ jiwi do raṛecʼ akan tahẽkana.