2 Samuel 12 - সান্তালী বাইবেল

Dạud ṭhen Nathan nạbi

¹ Probhu Isor do unre Dạud ṭhen Nathan nạbiye kolkedea. Uni do Dạud ṭhen senkateye metadea, “Mitʼ nagrahare bar hoṛkin tahẽkana. Unkin modre mitʼ hoṛ do kisạ̃ṛ ar eṭakʼicʼ do ạḍitetʼ reṅgecʼe tahẽkana.

² Kisạ̃ṛ hoṛren do ạḍi utạr ḍaṅgra ar bhiḍiko tahẽkantaea.

³ Menkhan uni reṅgecʼ hoṛakʼ do cetʼge baṅ tahẽkantaea, uniren do eken mitʼṭen bhiḍi hopone tahẽkana. Uni do kirińkateye ạsulede tahẽkana. Uni do acʼ ar acʼren hopon ar hoponerako sãote dohokateye ạsul harayede tahẽkana. Ar uni reṅgecʼ hoṛ okae jometʼ tahẽkan uni bhiḍi hopon hõ onageye jometʼ tahẽkana ar uniyakʼ bạṭi khongeye ńũiyetʼ tahẽkana. Ar uni ṭhengeye guṅgutʼkan tahẽkana. Uni ṭhen do hoponera lekageye tahẽkana.

⁴ Mitʼdin mitʼṭen peṛa do uni kisạ̃ṛ hoṛ ṭhene hecʼena. Menkhan kisạ̃ṛ hoṛ do uni peṛa acʼren ḍaṅgra se bhiḍite peṛaye do bae khojleda. Ona bodolte uni reṅgecʼ hoṛren bhiḍi hopon ạgukate acʼren peṛa lạgitʼe isinkedea.”

⁵ Niạ katha ańjomkate Dạud do uni kisạ̃ṛ hoṛ cetanre ạḍiye raṅgaoena. Uni do Nathane metadea, “Probhu Isore jiwetʼ lekage, okoe hoṛ nonkae kạmi akatʼ uni do gocʼ ocokʼ lek kanae.

⁶ Uni do thoṛa hõ mãyã udukʼ baṅkate nonkae kạmi akatʼte bhiḍi hopon reakʼ pon doboṛ dam em ruạṛkakʼ hoyokʼtaea.”

⁷ Unre Nathan do Dạude metadea, “Am kangeam uni hoṛ do. Israelren Probhu Isor do noa kathageye meneda, ‘ińge Israel cetanre raj menkateń ojokʼ bahal akatʼmea ar Sạulakʼ ti khoniń rukhiyạ akatʼmea.

⁸ Amren mạlikakʼ sanamakʼ iń emakawatʼmea ar uniren bạhuko hõ amakʼ hoborreń ematʼmea. Israel ar Jihudạren sanam gusṭiren hoṛkoakʼ dạyik hõń emakawatʼmea. Niạko hõ am lạgitʼ ḍherteakʼ baṅ hoylen khan iń do arhõń emkema.

⁹ Menkhan Probhu Isorakʼ mẽtʼre oka bạṛicʼakʼkan ona kạmikate cedakʼ uniyakʼ katha dom nihạ̃t akada? Uni Hiti hoṛ Uriạ do tarwaṛetem gocʼ ocokedea ar uniren bạhu do amren bạhu mentem hatao akadea, ar Amonrenko hotetem gocʼ ocoakadea.

¹⁰ Am do ińem nihạ̃t akadińạ ar uni Uriạren bạhu do amren bạhu mentem dohoakadea, ona iạte amakʼ gharońj do khũniạhi reakʼ ti khon tishõ rukhiyạ bae ńama.’

¹¹ “Probhu Isor do arhõe meneda, ‘iń do amakʼ gharońj khonge am do muhinreń paṛao ocomea. Amakʼ mẽtʼãhã samaṅrege amren erako do amren hoṛiń emaea. Uni do sanamko samaṅre amren erako tulucʼe giticʼ midokʼa.

¹² Am do oko okotem kạmi akada menkhan iń do ḍig ḍig marsalre jotoko samaṅre onań kạmi ocoya, hẽ sanam Israelkoakʼ mẽtʼãhã samaṅrege.’ ”

¹³ Unre Dạud do Nathane metadea, “Iń do Probhu Isor upạrteń kại akada.” Nathane roṛ ruạṛadea, “Probhu Isor do amakʼ kạiye ikạ akatʼtama; am do bam gujukʼa.

¹⁴ Menkhan noam kạmi akatʼte am do Probhu Isorren bạiriko nindạu reakʼ ạtem ematʼkoa. Ona iạte amren okoeṭakʼ gidrại janam akan uni do khạṭigeye gujukʼa.”

¹⁵ Ar Nathan do acʼakʼ oṛakʼteye ruạṛ calaoena. Ar Uriạ hoṛren bạhuttetʼakʼ hoṛmore Dạudren okoeṭakʼ koṛa gidrại janamlen Probhu Isorakʼ hạnte uni do ạḍitetʼe ruạ kạhilena.

Dạudren hoponakʼ gujukʼ

¹⁶ Unre Dạud do uni gidrạ lạgitʼ Isor ṭhen nehõrokʼe ehopʼena. Uni doe upạskeda ar acʼakʼ oṛakʼte senkate otreye giticʼ aṅgayena.

¹⁷ Raj oṛakʼren cetan hudạren kạmiyạko do ot khon berede lạgitʼ uni ṭhenko calaoena, menkhan uni do beretʼ bae rebenlena ar onko sãote hõ bae jom-ńũleda.

¹⁸ Ruạ eae din tayom uni gidrạ doe gocʼena. Ar Dạudren kạmiyạko do gidrạ gocʼen reakʼ baḍae ocoye do bako dilleda. Onkoko menkeda, “Gidrạtae jiwetʼe tahẽkanre bon metade tahẽkanre hõ aboakʼ katha bae ańjomleda. Ar ńitokʼ do cekate bon metaea gidrạ doe gocʼena? Ar bon metae khan hoedaṛeakʼa uni do acʼakʼ jãhãnakʼe hạn botejtaea.”

¹⁹ Kạmiyạko talare khae khoe joṅkane ńelketʼko khan Dạud doe bujhạukeda, gidrạ doe gocʼentaea. Uni doe kuliyana, “Gidrạ do cetʼe gocʼena?” Onkoko roṛ ruạṛadea, “Hẽ, gocʼenae.”

²⁰ Unre Dạud do ot khone beretʼena ar ḍạbrạ saphakate sunume ojokʼana ar kicricʼe bodolente Probhu Isorakʼ oṛakʼte senkate otre ombakʼkateye sewakeda. Ar ona tayom do acʼakʼ oṛakʼteye ruạṛ hecʼente jomakʼ ạgui reakʼe hukumkeda. Ar uni samaṅre jomakʼko ạguketʼ khan uni doe jomkeda.

²¹ Onate uniren kạmiyạko doko kulikedea, “Cedakʼ nonka dom kạmiyeda? Am do gidrạ jiwetʼe tahẽkanrem upạskeda arem rakʼkeda, menkhan uniye gocʼen khan dom beretʼena arem jom-ńũ kana.”

²² Dạude menkeda, “Gidrạ jiwetʼe tahenre iń doń upạskeda ariń rakʼkeda, ente ińiń hudisan tahẽkana, hoedaṛeakʼa Probhu Isor do ińe dayawạńạ ar uni doe jiwedokʼa.

²³ Menkhan uni tinreye gocʼena unre cetʼ lạgitʼ iń upạsa? Uni do cetʼ iń ruạṛ ạgu daṛeaea? Ińge uni ṭhen calakʼ hoyokʼtińạ. Uni do ar tishõ iń ṭhen do bae ruạṛ hijukʼa.”

Solomonakʼ janam

^24-25 Dạud do acʼren bạhu Bethseba jiwi raṛecʼe emadea ar uni tulucʼ arhõe giticʼ mitʼena. Ar uniren do mitʼṭen koṛa gidrại hoyena. Dạud do uniyakʼ ńutum Solomone dohoketʼtaea. Probhu Isor do uni gidrại dulạṛede tahẽkante uniyakʼ ńutum do Jedidia dohoytae lạgitʼ Nathan nạbiye kolkedea.

Dạud do Raba reakʼ nagrahakoe hatetʼkan

²⁶ Joab do Amonrenkoakʼ raj nagraha Rabare jhãpe emketʼte onae hatkeda.

²⁷ Joab do Dạud ṭhen hoṛ kolkateye roṛ gotʼkada, “Iń do Raba upạrteń lạṛhạiyena ar dakʼ nagrahako hõń hatakada.

²⁸ Am do sarecʼ nagrahako cetanre jhãp em lạgitʼ lạṛhại phạdko jarwakate onako hatme. Ar baṅkhan ińge nagrahakoń dokhol lekhan nagraha reakʼ ńutum do ińakʼ ńutumtege hoyokʼa.”

²⁹ Unre Dạud do sanam lạṛhại phạdante Rabateye senena ar nagrahakore jhãpe emketʼte onakoe hatkeda.

³⁰ Uni do onḍenicʼ rajakʼ bohokʼ khon mukuṭe bocʼketʼtaea. Ona do pegel are keji sonate benao tahẽkana ar onare damanakʼ dhiriko hõ bạisạu tahẽkana. Ona mukuṭ do Dạudko horokʼadea. Ar Dạud do ona nagraha khon ạḍi utạr luṭakʼ jiniskoe idikeda.

³¹ Uni do nagraharen hoṛkoe oḍok idiketʼkoa ar ạri, mẽṛhẽtʼ, kuḍi ar ṭeṅgocʼkoteye kạmi ocoketʼkoa. Uni do iṭạ bhaṭare kạmireye lagaoketʼkoa. Amonrenkoakʼ sanam nagrahare uni do onkageye kạmi ocokeda. Inạ tayom Dạud do acʼren lạṛhại phạdkoante Jerusalemteye ruạṛ hecʼena.