2 Samuel 11 - সান্তালী বাইবেল

Dạud ar Bethseba

¹ Bochor reakʼ etohopʼ kana, ar rapajko do lạṛhại lạgitʼko oḍok calakʼa. Un jokhecʼ Dạud hõ lạṛhại lạgitʼ Joab ar uniren eṭakʼ subedarko ar Israelren lạṛhại phạdkoe kolketʼkoa. Onko do Amonrenkoko jarkharketʼkote Raba nagrahako gheraokeda. Menkhan Dạud do Jerusalemregeye tahẽyena.

² Mitʼdin maraṅ dakʼ lo ber Dạud do acʼakʼ aṭetʼ khon beretʼkate raj oṛakʼ reakʼ chatreye dãṛã baṛaekan tahẽkana. Unre uni do chat cetan khon mitʼṭen maejiu ḍạbrạkʼ kane ńelkedea. Maejiu do ńelokʼte ạḍi napaeye tahẽkana.

³ Unre Dạud do uni maejiu reakʼ khoj hatao lạgitʼ hoṛe kolketʼkoa. Mitʼṭen hoṛ doe menkeda, “Uni do Eliamren hoponera Uriạ Hitiren oṛakʼ hoṛ Bethseba kanae.”

⁴ Ar Dạud do acʼ ṭhen ạguiye lạgitʼ hoṛe kolketʼkoa. Ado maejiue hecʼen khan Dạud do uni sãoteye loṭghuṭikeda. Unre maejiu do acʼakʼ candoteakʼ khone sapha gotʼ akan tahẽkana. Ar ona tayom maejiu do acʼakʼ oṛakʼteye ruạṛ calaoena.

⁵ Ar maejiu do bhạrti hoṛmo akana menteye bujhạuketʼ khan ona khobor do Dạud ṭhene kolkeda.

⁶ Unre Dạud do Joab niạ kathae roṛgotʼadea, “Uriạ Hiti do iń ṭhen kolkae me.” Onate Joab do Dạud ṭhene kolkedea.

⁷ Uriạ do Dạud ṭhene hecʼen khan Joab ar lạṛhại phạdko reaṅ boge judạ khobor ar lạṛhại cetʼleka calakʼ kana onae kulikedea.

⁸ Ona tayom uni do Uriại metadea, “Amakʼ oṛakʼte senkate ti jaṅga ạbukokʼte jirạukʼme.” Uriạ do raj oṛakʼ khone oḍokena ar raj do uni lạgitʼ thoṛa sandese kolkeda.

⁹ Menkhan Uriạ do acʼakʼ oṛakʼte bae senlena. Uni do rajren sanam kạmiyạko sãote raj oṛakʼ reakʼ phaṭok duạr aṛeregeye giticʼena.

¹⁰ Dạud ona kathako baḍae ocokede khan uni do Uriại metadea, “Am ma lạṛhại khonem ruạṛ hecʼakan, enḍekhan cedakʼ amakʼ oṛakʼte do bam calaolena?”

¹¹ Uriạ do Dạude metadea, “Israel ar Jihudạren lạṛhại phạdko do goha sindukante tạmbure menakʼkoa, ar ińren subedar Joab hõ ṭạnḍire menaea. Ar iń do cekate ińakʼ oṛakʼte senkateń jom-ńũiya ar ińren bạhu tulucʼ iń giticʼ midokʼa? Amreń kiriạkʼ kana, nonkan kạmi do tishõ ohogeń kạmi daṛelea.”

¹² Unre Dạud do uniye metadea, “Teheń hõ nonḍege tahenme; ar gapa doń kol ruạṛmea.” Onate Uriạ do enhilokʼ ar ona dosar hilokʼ hõ Jerusalemregeye tahẽyena.

¹³ Ar Dạud do Uriại neotakedea ar acʼ sãoteye jom-ńũ ocokedete uniye bul ocokedea. Ar ạyupʼen khan Uriạ do rajren kạmiyạko talare acʼakʼ aṭetʼreye giticʼena, menkhan acʼakʼ oṛakʼte do bae senlena.

¹⁴ Dosar hilokʼ setakʼ Dạud do mitʼṭecʼ ciṭhi olkate Uriạ hotete Joab ṭhene kolkeda.

¹⁵ Onare niạ kathae olkeda, “Okare kajak lạṛhại hoyokʼkan onḍe Uriạ do lạṛhại phạdko laharem dohoyea, ar uni tayom khonpe ocogokʼte unipe ńẽtʼ ocoyea jemone gujukʼ.

¹⁶ Onate nagrahako gherao jokhecʼ Joab do Uriạ nonkan mitʼṭecʼ jaegateye kolkedea okare daṛean lạṛhại birko tahẽkan.

¹⁷ Ar nagraharen hoṛ do oḍok hecʼkate Joab sãote lạṛhạiko ehopʼena ar unre Dạudren lạṛhại phạdren adomkoko gocʼ ocoyena ar ona sãote Uriạ Hiti hõe gocʼena.

^18-20 Joab do hoṛ kolkate lạṛhại reakʼ joto khobor do Dạude baḍae ocokedea. Ar Joab do khobo idiyetʼkan hoṛe metadea, “Lạṛhại reakʼ niạ khobor raj ṭhen seṭerlen khan pasecʼ uni doe edrekʼa are metama, ‘nagraha reakʼ nunạkʼ sor do cedakʼpe senlena? Pạcri cetan khon sarteko tuńpe ona do cetʼ bape baḍaekan tahẽkana?

²¹ Jerubaset hopon Abimelek do okoe ṭhene gocʼ ocolena? Mitʼṭen maejiu hotetege cetʼ baṅa, one Tobesre pạcri cetan khon jante dhiriye giḍiwade tahẽkanteye gocʼlede. Ar cedakʼ ape do pạcri sorpe senlena?” Uni niạ kathae metam khan unim metaea, amren guti Uriạ Hiti doe gocʼena.”

²² Unre uni hoṛ doe mohnḍayena ar Dạud ṭhen seṭerkate Joab okae metade tahẽkana onae baḍae ocokedea.

²³ Uni do Dạude metadea, “Pạhilre onko do ale khon ḍher daṛe salakʼ ale upạrteko oḍok hecʼlena, menkhan ale do nagraha reakʼ phaṭok duạr hạbicʼle khudạu idiketʼkoa.

²⁴ Nonkate dhinkiạko do pạcri cetan khon amren gutiko cetanre sar aṛakʼko ehopʼena. Onate rajren adom hoṛ doko gocʼena. Ar amren guti Uriạ hõe gocʼena.”

²⁵ Dạud do uniye metadea, “Joab metaeme jemon mon aloe bạrijtae, ente lạṛhại jokhecʼ tarwaṛe do celege rehay bae emakoa. Nagraha upạrte arhõ kajakte lạṛhạipe jemon onape jarkhar daṛeakʼ. Am do niạ kathate Joabem udgạuea.”

²⁶ Uriạ Hitiren bạhu do acʼren jãwãeyakʼ gujukʼ khobore ańjomketʼ khan homor halaṅe ehopʼena.

²⁷ Ado homor halaṅ reakʼ okte sạten khan Dạud do acʼakʼ oṛakʼte uniye ạgukedea. Ar acʼren bạhui hoyena ar mitʼṭen gidrại janamkedea. Menkhan Dạud okae cekaketʼ onate Probhu Isor do bae kusilena.