2 Samuel 10 - সান্তালী বাইবেল

Dạud do Amonrenkoe bhagaoketʼkoa

¹ Amonkoren raje gocʼen khan uniren hopon Hanun do uni bodolteye rajena.

² Dạude menkeda, “Hanunren apattetʼ Nahas ińre cetʼleka pạtiạranicʼe tahẽkan onkage iń hõ Hanunre pạtiạr akaniń tahena.” Ona iạte uniren apatakʼ gujukʼre uniyakʼ jiwi raṛecʼtae lạgitʼ uni do adom hoṛkoe kolketʼkoa. Onate Dạudren hoṛ do Amonrenkoakʼ disạmteko calaoena.

³ Menkhan Amonren mukhiyạko do akoren kisạ̃ṛ Hanunko metadea, “Am do cetʼ noam hudiseda, Dạud do ạpume manotede tahẽkante jiwi raṛejtam lạgitʼ hoṛe kolakatʼkoa? Uni disạm ciyại lạgitʼe kolakatʼkoa jemon nagraha reakʼ khoj khoborko hatao daṛeakʼte tayomte onako marao daṛeakʼ.”

⁴ Unre Hanun do Dạudren hoṛko sapʼkate mitʼ sa aṛe reakʼ gocokoe hoyoketʼtakoa ar onkoakʼ jeleń aṅgrop reakʼ adha, metakʼme ḍanḍa hạbicʼe getʼ kuṭrạketʼtakoa are kolgotʼkatʼkoa.

⁵ Dạud do ona kathae ańjomketʼ khan onkoe kolletʼko hoṛ sãote ńapamokʼ lạgitʼ arhõ adom hoṛkoe kolkatʼkoa, ente onko hoṛ do lajaoteko thakao caba akan tahẽkana. Raj doe roṛ gotʼkada, “Gocoko ạuri harakʼ hạbicʼ ape do Jerikhorege tahẽ hataṛokʼpe; ar ona tayom do ruạṛ hijukʼpe.”

⁶ Amonrenko tinreko bujhạu daṛeada, onko do Dạud ṭhenko kurud ocoakana mente. Unre onko do Bethrehobren ar Sobaren bargel hajar otten lạṛhại phạdko, ar Makaren mitʼ hajar hoṛko ar Toabren gelbar hajar hoṛkoe bhaṛaketʼkoa.

⁷ Niạ ańjomkate Dạud do Joab ar uniren sanam lạṛhại phạdkoe kolkatʼkoa.

⁸ Unre Amonrenko do oḍok hecʼkate akoakʼ nagraha reakʼ phaṭok duạr ṭhen lạṛhại lạgitʼ akoren phạdko sapṛaoketʼkoa. Soba ar Rehobren Arami hoṛko ar Toab ar Makaren lạṛhại phạdko do eṭakʼ secʼre bilạn ṭạnḍireko thạrena.

⁹ Joab doe ńelkeda acʼ samaṅ secʼ ar acʼ tayom secʼre Aramren lạṛhại phạdkoko sapṛao akana. Onate uni do acʼren lạṛhại phạdko tala khon adomkoe bachaoketʼkote onko upạrteye thạrketʼkoa.

¹⁰ Ar sarecʼ lạṛhại phạdko do acʼren boeha Abisae tabere Amonrenko upạrteye thạrketʼkoa.

¹¹ Joab do acʼren boehae metadea, “Aramrenko iń khon daṛeanko hoyokʼ enḍekhan am do iń goṛowạń lạgitʼem hijukʼa, ar Amonrenko am khon daṛeanko hoyokʼ enḍekhan iń do amiń goṛowama.

¹² Dil dohoyme; alaṅren hoṛko lạgitʼ ar aboren Isorakʼ nagrahako lạgitʼ dela, dil salakʼ bon lạṛhạilenge. Ar Probhu Isor do acʼakʼ mẽtʼre oka bhageakʼkan onageye onkaema.”

¹³ Niạ menkate Joab do acʼren lạṛhại phạdkowante Aramrenko tulucʼ lạṛhại lạgitʼe laha idiyen khan onko do uni samaṅ khonko dạṛkeda.

¹⁴ Aramrenko dạdạṛko ńelketʼko khan Amonrenko hõ Joabren boeha Abisoe samaṅ khonko dạṛketʼte nagraha bhitriteko boloyena. Ar Joab hõ Jerusalemteye ruạṛ calaoena.

¹⁵ Aramrenko do Israel ṭhenko bhagao ocoyena menteko ńelketʼ khan onko do arhõko jarwa mitʼena.

¹⁶ Ar Hadadeser raj do hoṛ kolkate Phurạt gaḍa hanasareko girobasokʼkan Aramrenkoe ạguketʼkoa. Ar onko do Helamteko hecʼena. Hadadeserren lạṛhại phạdkoren subedar Subak do onkoren ạyuricʼe tahẽkana.

¹⁷ Ado Dạud ona kathako baḍae ocokede khan uni do goṭa Israelren lạṛhại phạdkoe jarwaketʼkoa ar Jordan gaḍa paromkate Helamteye calaoena. Onate Aramrenko do Dạud upạrte akoren lạṛhại phạdko thạrketʼkoa,

¹⁸ menkhan onko do Israelko samaṅ khonko dạṛkeda. Unre Dạud do onkoren eae sae rãt gạḍi cakʼlaoko ar pongel hajar aswarikoe gocʼketʼkoa. Uni do onkoren subedar Subak hõe ńẽtʼkedea; onate Subak do onḍeye gocʼena.

¹⁹ Hadadeser taberen rajko do tinreko ńelkeda, Israel ṭhenko bhagao ocokʼkana mente unre onko do Israelko sãote sulukokʼ lạgitʼ bondobosko bandhaokeda ar onko gobolreko tahẽyena. Ar unkhon Aramrenko do Israelko botorte Amonrenko ar bako goṛowatʼkoa.