2 Rapajko 9 - সান্তালী বাইবেল

Israelren Jihu raj

¹ Elisae do cela-nạbiko mod khon mitʼ hoṛ hohoadeteye metadea, “Ḍanḍa paṭhe keṭejme ar niạ sunum cukạkʼ hataokate am do Ramot-Gileadte calakʼme.

² Onḍe senkate Nimsiren goṛomtetʼ koṛa, metakʼme Jehosaphatren hopon Jihum sendra ńameya. Ar uni ṭhen senkate uniren gateko ṭhen khonem ocogea ar mitʼṭecʼ kandharem aderea.

³ Ona tayom cukạkʼ reakʼ sunum uniyakʼ bohokʼre dulkatem mena, Probhu Isore meneda, ‘Israelren raj mente iń do amiń ojokʼ bahalketʼmea.’ Ona tayom duạr jhicʼkate am dom ńir oḍokokʼa, ar alogem biloma.”

⁴ Onate uni juạn nạbi do Ramot-Gileadteye senena.

⁵ Onḍe seṭerkate uni do subedarko mitʼ jaegare duṛupʼ akane ńelketʼkoa. Uni doe menkeda, “E subedar, am lạgitʼ mitʼṭecʼ sombatiń ạguakada.” Jihuye kulikedea, “Aleko modre ona sombat do okoe lạgitʼ kana?” Uniye menkeda, “Subedar, am lạgitʼ kangea.”

⁶ Onate Jihu doe beretʼente oṛakʼ bhitriteye boloyena. Unre uni nạbi do Jihuwakʼ bohokʼre cukạkʼ reakʼ sunum dulketʼteye menkeda, “Israelren Probhu Isor do niạ kathae meneda, ‘Probhu Isorren hoṛko cetanre, metakʼme Israelko cetanre iń do raj menteń ojokʼ bahalketʼmea.

⁷ Am do amren mạlik Ahabakʼ bõsem marao utạrtaea. Isebel do ińren gutiko, metakʼme nạbiko ar Probhu Isorren eṭakʼ eṭakʼ gutikoakʼ oka mãyãme joro ocoakatʼ ona reakʼ iń hala ruạṛaea.

⁸ Ahabakʼ bõsren jotogeko marao utạrokʼa. Golamge cetʼ ar sạdhinge cetʼ, Ahabakʼ bõsren mitʼke mitʼ herel hopon doń gocʼ cabakoa.

⁹ Iń do uniyakʼ bõsko Nabatren hopon Jerobiamakʼ bõs ar Ahiạren hopon Basakʼ bõs lekań hoeocoya.

¹⁰ Isebel do Jisriyelre setako jomea, uni do okoege bako topakaea.’ ” Niạ menkate uni nạbi do duạr jhicʼketʼteye ńir oḍokena.

¹¹ Jihui oḍok hecʼen khan onko modren mitʼ hoṛ do uniye kulikedea, “Jotowakʼ bhage gea tho? Uni pagla do cetʼ lạgitʼe hecʼlena?” Jihuye roṛ ruạṛkeda, “Uni hoṛ mape baḍae akadege ar cetʼ lekan kathakoe roṛ ona hõpe baḍaegea.”

¹² Onkoko menkeda, “Niạ katha do ṭhik baṅkana, khulạsate lạiyaleme.” Unre Jihuye menkeda, “Uni doe metadińạ, Probhu Isore meneda, ‘Israelren raj lekate iń do amiń ojokʼ bahalketʼmea.’ ”

¹³ Unre onko subedarko do usạrate akoakʼ hoṛmo reakʼ kicricʼko bocʼketʼte siṛhi cetanre Jihuakʼ jaṅga latarreko aṭetʼkeda. Ar ona tayom do sakwa oroṅkate ãṭ aṛaṅateko menkeda, “Jihu kangeae raj do.”

Jihuwakʼ tire Joram ar Ahasiạwakʼ gujukʼ

¹⁴ Ona tayom Jehosaphatren hopon, metakʼme Nimsiren goṛomtetʼ koṛa Jihu do Joram upạrteye soṛojontrokeda. Ona jokhecʼ Joram ar sanam Israelko do Ramot-Gilead rukhiyại lạgitʼ Aramren raj Hosael upạrteko lạṛhạikan tahẽkana.

¹⁵ Menkhan Aramren raj Hosael sãote lạṛhại jokhecʼ Aramrenko do Joram one hoṛmoreko ghạllede ona khon bogekʼ lạgitʼ uni do Jisriyelteye ruạṛ senakan tahẽkana. Jihu do acʼ sãoten subedarkoe metatʼkoa, “Iń tulucʼpe tahen khan tobe do ńelpe Jisriyelte khobor em lạgitʼ okoe hoṛ hõ jemon nagraha khon hape hapete aloko oḍok calakʼ.”

¹⁶ Ona tayom Jihu do acʼakʼ rãt gạḍire decʼkate Jisriyelteye senena, ente Joram do onḍe kạhilge aṭetʼreye giticʼ akan tahẽkana ar Jihudạren raj Ahasiạ hõ uni ńele lạgitʼ onḍeye senakan tahẽkana.

¹⁷ Jihuren lạṛhại phạdko hijukʼkane ńelketʼko khan Jisriyel gaṛ cetanreye teṅgo akan pahradar do hohoateye menkeda, “Iń do lạṛhại phạdko hijukʼ kaniń ńel ńametʼkoa.” Unre Jorame hukumkeda, “Mitʼṭen aswari onko ṭhen kolkaepe. Uni do onko ṭhene kulijoṅa, ‘apeakʼ hijukʼ reakʼ monsubạ do cetʼ bhagegea?’ ”

¹⁸ Uni aswari do Jihu sãote ńapamokʼ lạgitʼe senena are menkeda, “Raje meneda, ‘amakʼ hijukʼ reakʼ monsubạ do cetʼ bhagegea?’ ” Jihuye roṛ ruạṛkeda, “Ińakʼ hijukʼ reakʼ monsubạ baḍae reakʼ amakʼ do cetʼ? Am do iń tayom tayomte hijukʼme.” Uni pahradar do unre khobore emkeda, “Khobor idiyicʼ hoṛ do onko ṭhene seṭerena, menkhan bae ruạṛ hijukʼkana.”

¹⁹ Unre raj do dosaricʼ armitʼṭen aswariye kolkadea. Uni hõ onko lạṛhại phạdko ṭhen seṭerkateye menkeda, “Raje kulikana, ‘apeakʼ hijukʼ reakʼ monsubạ do cetʼ bhagegea?’ ” Jihuye roṛ ruạṛkeda, “Ińakʼ hijukʼ reakʼ monsubạ baḍae reakʼ amakʼ do cetʼ? Am do iń tayomte hijukʼme.”

²⁰ Uni pahradar do khobore emkeda, “Uni do onko ṭhene seṭerakana, menkhan uni hõ bae ruạṛ hijukʼ kana. Rãt gạḍi reakʼ calao ńelte bujhạukʼ kana Nimsiren goṛomtetʼ koṛa Jihuge rãt gạḍi doe calaoeda. Uni do raṅgao akan hoṛ lekage rãte calaoeda.”

²¹ Unre Joram doe hukumkeda, “Ińakʼ rãt gạḍire sadom joṛaokope.” Ar sadomko joṛaoketʼko khan Israelren raj Joram ar Jihudạren raj Ahasiạ do apan ạpin rãt gạḍire decʼkate Jihu sãote ńapamokʼ lạgitʼ kin oḍok calaoena. Ar Jisriyelren Nabatakʼ jumi ṭhen Jihu sãotekin ńapamena.

²² Joram do Jihuye kulikedea, “Jihu, amakʼ hijukʼ reakʼ monsubạ do cetʼ bhagegea?” Jihui roṛ ruạṛkeda, “Amren eṅgam Isebelakʼ boṅga sewa ar gunidar kạmiko nunạkʼ bạ̃ṛti hoyokʼkana je, cekate ińakʼ hijukʼ do bhage hoedaṛekokʼa?”

²³ Niạ katha ańjomkate Joram do usạrate gạḍi ạcurkate Ahasiại hohoadeteye metadea, “Ahasiạ, noa do hul kana.”

²⁴ Unre Jihu do daṛeakʼ bhor akʼe ṭuniạuketʼtaete Joramakʼ dạbi talareye tuńkedea. Ar sar do uniyakʼ mãyãm kunḍi secʼte boloyena ar uni do rãt gạḍi khone ńurena.

²⁵ Unre Jihu do acʼ sãoten subedar Bidkare metadea, “Ma kuṭuṅ idiyem ar Jisreyelren Nabatakʼ jumire giḍikaeme. Disạime, uniren apat Ahab tayomte rãt gạḍite laṅ calakʼkan tahẽkanre Probhu Isor do Ahab upạrte niạ kathae menleda,

²⁶ ‘Iń Probhu Isorgeń meneda, iń do hola Nabat ar uniren hoponkoakʼ mãyãmiń ńel akada, ar niạ jumi cetanre khạṭige uni reakʼ am ṭheniń hala ruạṛa.’ Enḍekhan Probhu Isorakʼ katha leka ńitokʼ kuṭuṅ rakapʼkate ona jumire giḍikaeme.”

²⁷ Ar okaṭakʼ hoyen ona ńelte Jihudạren Ahasiạ raj do Beth-Hagan reakʼ horteye dạṛkeda. Jihu do uniye khudạu idikedete ãṭ aṛaṅteye menkeda, “Uni hõ gojepe.” Unre hoṛko do Ibleam ṭhen Gur ńutumanakʼ rakabokʼ horre Ahasiạ do acʼakʼ rãt gạḍiregeko ghạlkedea, menkhan uni do Megidatteye dạṛkeda ar onḍegeye gocʼena.

²⁸ Ar uniren gutiko do rãt gạḍite Jerusalemteko idikedea ar Dạud nagrahare uniren hapṛamko sãote uni lạgitʼe ṭhik dohoakatʼ tahẽkan topareko baekadea.

²⁹ Ahabren hopon Joramakʼ rajokʼ gelmitʼakʼ bochorre Ahasiạ do Jihudạren raje hoylena.

Isebelakʼ gujukʼ

³⁰ Inạ tayom Jihu do Jisriyelteye senena. Ona kathae ańjomketʼ khan Isebel doe aenom kajarena ar rokʼ nạkicʼkate jalna khone uyuṅ akatʼ tahẽkana.

³¹ Jihu do tinre phaṭokteye bolokʼkan tahẽkana unre Isebel do uniye metadea, “E Simri lekan khũniạhi, apnar mạlik khukhũnicʼ! Amakʼ hijukʼ reakʼ monsubạ do cetʼ bhagegea?”

³² Jihu do jalna secʼ beṅgetʼ rakapʼkateye menkeda, “Iń secʼ okoe menakʼpea? Okoe menakʼpea?” Unre adom mạ̃yạ̃ṛiko do uniko oyoṅkedea.

³³ Jihui metatʼkoa, “Uni do latarte giḍigotʼkaepe.” Unre onko do latarte Isebelko ḍhaka ńurkedea ar Jihuwakʼ rãt gạḍiren sadomko do uniko lebetʼ gańjaokedea. Onate uniyakʼ mãyãm do ṭunṭiyentaete pạcrire ar sadomkoakʼ hoṛmore paṛaoena.

³⁴ Ona tayom Jihu do bhitrite senkateye jom-ńũkeda. Uni doe menkeda, “Uni sarapicʼ maejiu do topaye reakʼ bebostaepe, ente uni do rajren hoponerae tahẽkana.”

³⁵ Menkhan hoṛko do uni topaye lạgitʼko senen khan bohokʼ khạpri, ti ar jaṅga chaḍa ar cetʼge bako ńamletʼtaea.

³⁶ Onko do ruạṛ hecʼkate Jihuko lạiyade khan uni doe metatʼkoa, “Probhu Isor do acʼren guti Tisberen Eliạ hotete ṭhik niạ kathageye menleda, ‘Jisriyelakʼ jumire setako do Isebelakʼ jelko joma.

³⁷ Ona jumi reakʼ otre Isebelakʼ hoṛmo do guricʼ leka giḍi akan tahena ar okoege bako orom daṛeakʼa ona do Isebelakʼ hoṛmo kana mente.’ ”