2 Rapajko 8 - সান্তালী বাইবেল

Sunemren maejiu do jumiye ńam ruạṛetʼ

¹ Elisae do okoeṭakʼ maejiuren hopone jiwetʼlede uni maejiue metadea, “Am do amakʼ gharońjrenko tulucʼ jãhãregem daṛeakʼ onḍege thoṛa din lạgitʼ tahẽ hataṛokʼme, ente Probhu Isor do niạ disạmre akale kola, ar eae bochor hạbicʼ ona akal do tahena.”

² Maejiu do Isorren hoṛakʼ katha lekageye kạmikeda. Uni ar acʼ gharońjrenko do onḍe khonko calaoente eae bochor hạbicʼ Philisṭikoakʼ disạmreko tahẽyena.

³ Eae bochor tayom uni do Philisṭikoakʼ disạm khone ruạṛ hecʼen khan acʼakʼ oṛakʼ-duạr ar jaega-jumiko ńam ruạṛ lạgitʼ raj ṭhene calaoena.

⁴ Unre raj do Isorren hoṛren guti Gehosi sãoteye galmarokan tahẽkana. Uni doe kuliyede tahẽkana, “Elisae oka maraṅ maraṅakʼkoe kạmi akatʼ onako reakʼ lạiyạńme.”

⁵ Ado Gehosi tinre raje lạiyaekan tahẽkana Elisae do gocʼicʼ cetʼlekae jiwetʼ ruạṛledea mente ar ṭhik ona jokhecʼge Elisae okoeṭakʼ maejiuren hopone jiwetʼlede uni maejiu do raj ṭhen senkate acʼakʼ oṛakʼ-duạr ar ot-baṛgeko ńam ruạṛ lạgitʼ nehõrokʼe ehopʼena. Gehosi do unreye menkeda, “E ińren mạlik maharaj, nui kangeae uni maejiu do one okoeren hopon Elisae doe jiwetʼ ruạṛlede.”

⁶ Unre raj do ona reaṅ maejiue kulikede khan uni do jotowakʼe lạikeda. Onate raj do maejiu babotre mitʼṭen guti bahal kedeteye metadea, “Uniyakʼ jotowakʼ ruạṛkataeme ar disạime bạgi oṭowakʼ khon teheń hạbicʼ uniyakʼ jumire oka arjao akan ona hõ ruạṛkataeme.”

Hosaelakʼ tite Benhadadakʼ gujukʼ

⁷ Inạ tayom Elisae do Damesekteye calaoena. Ar unre Aramren raj Benhadad doe ruạ kạhil akan tahẽkana. Unre rajko lạiyadea, “Isorren hoṛ do nonḍeye hecʼakana.”

⁸ Ar raj do Hosaele metadea, “Am do soṅgete mitʼṭecʼ sandes idi toraeme ar Isorren hoṛ sãote ńapamokʼme. Ar uni hotete Probhu Isor ṭhen khon baḍae joṅme, iń do niạ ruạ kạhil khoniń bogekʼa se baṅa.”

⁹ Unre Hosael do sandes lekate Damesek reakʼ joto khon bhageakʼ jinisko pongel ũṭreye ladekeda ar Elisae sãote ńapamokʼ lạgitʼe senena. Uni do Elisae samaṅre senkate teṅgoyenteye menkeda, “Amren hopon Aramren Benhadad raj do niạ katha kulime lạgitʼe kol akadińạ, ruạ kạhil khon uni doe boge ruạṛokʼa se baṅa.”

¹⁰ Elisaeye roṛ ruạṛkeda, “Am do ruạṛ senkate unim lạiyaea, khạṭigeye boge ruạṛokʼa, menkhan Probhu Isor do iń ṭhene sodor akada, uni doe gujukʼa.

¹¹ Niạ menkate Hosael ạuriye lajaokʼ hạbicʼ Elisae do uni secʼ beṅgetʼ akaegeye tahẽyena. Ona tayom Isorren hoṛ do rarakʼe ehopʼena.

¹² Hosael do uniye kulikedea, “E ińren mạlik cedakʼem rakʼeda?” Elisaeye roṛ ruạṛkeda, “Ente iń doń baḍaegea Israelkoakʼ cetʼkom loksantakoa mente. Am do onkoakʼ gaṛkore seṅgelem jeretʼakʼa, ar tarwaṛete onkoren juạnkom gocʼkoa, onkoren kạṭicʼ gidrạ do otrem tawakʼ gocʼkoa ar onkoren bhạrti hoṛmowan maejiukoakʼ lacʼ dom getʼ cirạitakoa.”

¹³ Unre Hosaele menkeda, “Iń amren golam iń seta doń celekante nonkan dil reakʼ iń kạmi daṛekea?” Elisaeye menkeda, “Amge Aramren rajem hoyokʼ onage Probhu Isor do ińe ńel ocoakadińạ.”

¹⁴ Inạ tayom Hosael do Elisae ṭhen khon acʼren mạlik ṭhene ruạṛ calaoena. Binhadad do uniye kulikedea, “Elisae do cetʼe metatʼmea?” Hosaele roṛ ruạṛkeda, “Uni doe metadińạ khạṭigem bogekʼa.”

¹⁵ Menkhan ona dosar hilokʼ Hosael do mitʼṭecʼ kombol lohotʼkate rajakʼ mẽtʼãhãe dapalketʼtaea, ar onate raj doe gocʼena. Ona tayom Hosael do Benhadadakʼ jaegare raje hoyena.

Jihudạren Jehoram raj

¹⁶ Israelren raj Ahabren hopon Jehoramakʼ rajokʼ mõṛẽgel bochorre tinre Jehosaphat do Jihudạren raje tahẽkana unre Jehosaphatren hopon Jehoram do Jihudạre rajokʼe ehopʼena.

¹⁷ Jehoram do pegel bar bochor umer tahẽkanre raje hoylena ar Jerusalemre irạl bochor hạbicʼ raje calaoketʼa.

¹⁸ Ahabakʼ bõsren hoṛko lekage uni do Israelren rajkoakʼ horteye calakʼkan tahẽkana, ente uni do Ahabren mitʼṭen hoponerae baplaledea. Ar Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana.

¹⁹ Enhõ Probhu Isor do acʼren guti Dạudakʼ katha disạite Jihudạ marao giḍikakʼ do bae khojleda, ente uni do Dạud ar uni bõsrenko jaejug lạgitʼ mitʼṭecʼ mạli emako reakʼe gokʼade tahẽkana.

²⁰ Jehoram oktere Edom disạmren hoṛko do Jihudạ upạrte hulkate ako lạgitʼ mitʼṭen rajko ṭhik doho akawan tahẽkana.

²¹ Onate Jehoram do acʼakʼ sanam rãt gạḍikoante Seyirteye calaoena. Ar Edomrenko do uni ar uniyakʼ rãt gạḍiren subedarkoko gheraoketʼkoa, menkhan uni do ńindạ jokhecʼ beretʼenteye oḍokena ar uniren lạṛhại phạdko hõko ńir paskaoente oṛakʼteko ruạṛena.

²² Edom do teheń hạbicʼ hõ Jihudạ upạrteko bhiṅgṛạu akana. Ar inạko oktere Lebnarenko hõko hulleda.

²³ Jehoramakʼ eṭakʼ sanamakʼ kạmi reakʼ kathako do “Jihudạkoren rapajkoakʼ Itihãs” ńutumanakʼ puthire ol menakʼa.

²⁴ Tayomte Jehoram do acʼren hapṛamko ṭhene senena ar Dạudakʼ nagrahare uniren hapṛamko sãoteko topakadea. Ar uniren hopon Ahasiạ do uniyakʼ jaegareye rajena.

Jihudạren Ahasiạ raj

²⁵ Israelren raj Ahabren hopon Jehoramakʼ rajokʼ gelbar bochorre Jihudạren raj Jehoramren hopon Ahasiạ do rajokʼe ehopʼena.

²⁶ Ar tinre raje hoyena unre uniyakʼ umer do bargel bar bochor tahẽkantaea ar uni do mitʼ bochor Jerusalemre raje calaokeda. Uniren eṅgat Athaliạ do Israelren raj Omriren goṛomtetʼ kuṛiye tahẽkana.

²⁷ Ahasiạ do Ahabakʼ bõsren hoṛkoakʼ hortegeye taṛametʼ tahẽkana ar onko lekage Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana, ente bapla hotete Ahabakʼ gharońj tulucʼ uniyakʼ jopoṛao do hoylentaea.

^28-29 Aramren raj Hosael upạrte lạṛhại lạgitʼ Ahasiạ do Ahabren hopon Jehoram sãote Ramot-Gileadteye senena. Unre Aramren hoṛ do Jehoramko ghạlkedea. Ar ona ghạl khon bogekʼ lạgitʼ Jehoram do Jisriyelteye ruạṛ calaoena. Ahabren hopon Jehoram doe ghạl akan tahẽkante Jihudạren raj Jehoramren hopon Ahasiạ do uni ńele lạgitʼ Jisriyelteye calaoena.