2 Rapajko 7 - সান্তালী বাইবেল

¹ Elisaeye menkeda, “Probhu Isor okae menetʼ ona baṛe ańjompe. Uniye meneda, gapa Samariạ reakʼ phaṭokre gelbar gram rupạte turui keji holoṅ ar gelbar gram rupạte gelbar keji jao ạkhrińokʼa.”

² Raj do okoe gutiye goṛowade tahẽkan uni guti do Isorren hoṛe metadea, “Ńelme, Probhu Isor do serma reakʼ duạrkoe jhicʼlere hõ onka do ohoge hoylena?” Elisaeye roṛ ruạṛkeda, “Amakʼ mẽtʼtege noa dom ńela, menkhan am do ona reakʼ cetʼge bam jom ńama.”

Aramrenkoko dạṛetʼkan

³ Unre nagraha reakʼ phaṭok duạr bolokʼ horre ponea murhucʼ jom rog hoṛko tahẽkana. Onko do ako akoreko mepenena, “Abo do nonḍe tahẽkate cedakʼ bon gujukʼa?

⁴ Ar bon men nagrahate do babo calakʼa onḍe do akal hoyokʼkana arbo gujukʼa. Ar nonḍe tahenrehõ bon gujukʼa. Ona khon bickom dela, abon do Aramrenkoakʼ ḍerate senkate onkoakʼ tire bon soprotokʼa. Onko jiwetʼko dohole bon khan ma bogege arko gocʼ bon khan mabon gujukʼge.”

⁵ Noa menkate ńuhumokʼ laha onko do Aramrenkoakʼ ḍerateko senena. Ar senkateko ńelkeda onḍe do mitʼ hoṛ hõ bạnukʼkoa.

⁶ Probhu Isor do rãt gạḍi, sadomko, ar maraṅ mitʼ dol lạṛhại phạdkoakʼ sabad Aramrenkoe ańjom ocoketʼkoa. Onate Aramren lạṛhại phạdko do ako akoreko mepenena, “Ńelpe, Israelren raj do abore jhãp em lạgitʼ Hittiren raj ar Misorren rajkine bhaṛa ạguakatʼkinạ.”

⁷ Noa menkate onko do ạyubokʼ laharege akoakʼ tạmbuko, sadomko, gadhako bạgiyatʼkoa arko dạṛkeda. Onko do jiwi botorte ḍera cetʼleka tahẽkan onkage bạgi oṭoada.

⁸ Onko murhucʼ jom rugiko do ḍera ṭhen seṭerkate mitʼṭecʼ tạmbu bhitriteko boloyena. Onko do jom ńukate sona, rupạ, ar kicricʼko idiketʼte onakoko oko dohokada. Ona tayom ruạṛ hecʼkate ar mitʼṭecʼ tạmbuteko boloyena ar ona reakʼ jiniskoko idikeda arko oko dohokada.

⁹ Inạ tayom do ako akoreko mepenena, “Aboakʼ kạmi bhage do baṅ hoyokʼkana. Teheń do mitʼṭecʼ bhage sombat reakʼ din kana ar abo do lại baṅkate hapege menakʼ bona. Ar setakʼ hạbicʼ bon bilomle khan abore sạjại do paṛaokʼgea. Dela, ńitge abo do raj oṛakʼte senkate khobor bon baḍae ocokoa.”

¹⁰ Onate onko do senkate nagraha reakʼ phaṭok duạrren pahradarko metatʼkoa, “Ale do Aramrenkoakʼ ḍeratele senlena. Onḍe do mitʼṭecʼ hoṛ hõ bạnukʼkoa, cetʼ sabadge bạnukʼa; eken sadomko ar gadhako tol akan menakʼkoa ar tạmbuko do cetʼleka tahẽkan onkage bạgikate onko doko calao akana.”

¹¹ Phaṭok duạrren pahradarko do khoborko lạikeda ar ona do raj oṛakʼ bhitrire tahenkanko hõko baḍae ocoketʼkoa.

¹² Raj do ńindạ jokhecʼ beretʼkate acʼren gutikoe metatʼkoa, “Aramrenko cetʼko ceka akatʼ onań lạiyape kana. Onko doko baḍaegea abo do reṅgecʼte menakʼ bona mente; onate onko do ḍera bạgikate ṭạnḍireko oko akana. Onko doko hudiseda khạṭige abo bon oḍok hijukʼa ar unre onko do jiwetʼteko sapʼbona ar nagrahateko bolokʼa.”

¹³ Uniren mitʼṭen gutiye menkeda, “Nagrahare tinạkʼ sadom sarecʼ menakʼko onko modkhon mõṛẽ goṭen sadomante adomko doko oḍokokʼma. Nonḍenko sanam Israelko leka onko do khạṭigeko gujukʼa, onate cetʼ hoyakana ona baḍae lạgitʼ onko bon kolkoa.”

¹⁴ Unre onko do sadom sudhạ barea rãt gạḍiko bachaoana, ar raj do Aramren lạṛhại phạdko sendrako lạgitʼ hoṛe kolketʼkinạ. Uni do rãt gạḍi cakʼlaokin noae hukumatʼkinạ, “Aben do senkate baḍae ạguiben cetʼ hoyakana mente.”

¹⁵ Unkin do jordan gaḍa hạbicʼkin sendraketʼkoa ar unkin do senkatekin ńelkeda Aramrenko do ampa ạmpiko dạṛketʼte akoakʼ sanam jinisko ar kicricʼko horreko bạgi giḍi oṭoada. Ar unkin kol ocolenkin hoṛ do sen ruạṛkate jotowakʼ khobor rajkin lạiyadea.

¹⁶ Unre hoṛko doko oḍok hecʼente Aramrenkoakʼ ḍerako luṭkeda. Onate Probhu Isorakʼ katha lekage turui keji holoṅ do gelbar gram rupạte ar gelbar keji jao do gelbar gram rupạte ạkhrińena.

¹⁷ Okoeṭakʼ guti do raje goṛowade tahẽkan uni cetanre raj do phaṭok ńel todarot reakʼ bhare emadea, menkhan hoṛko do nonkako oḍok senena, uni do phaṭok reakʼ horreko lebetʼ gańjao oṭokedete onḍegeye gocʼena. Isorren hoṛ Elisae do acʼakʼ oṛakʼre raj okaṭakʼ kathae metade tahẽkan onkage uni doe gocʼena.

¹⁸ Uni do raj oka lekae metade tahẽkan onkage hoeyena. Uni doe menleda, “Gapa niạ jokhecʼ Samariạ reakʼ phaṭokre turui keji holoṅ do gelbar gram rupạte ar gelbar keji jao do gelbar gram rupạte ạkhrińokʼa.”

¹⁹ Uni guti do Isorren hoṛe metade tahẽkana, “Ńelme, Probhu Isor do serma reakʼ duạre jhicʼlere hõ noa do baṅ hoedaṛeakʼa?” Isorren hoṛe roṛ ruạṛleda, “Am do amakʼ mẽtʼtegem ńela, menkhan ona reakʼ do cetʼge bam jom ńama.”

²⁰ Ar onkage uni cetanre hoyena, ente phaṭok reakʼ horre uni doko lebetʼ gańjaokedea are gocʼena.”