2 Rapajko 6 - সান্তালী বাইবেল

Ṭeṅgocʼ cape rakabokʼkan

¹ Mitʼdin cela-nạbiko do Elisaeko metadea, “Ńelme, oka jaegare am sãote duṛupʼkatele galmarao ona jaega abo lạgitʼ do huḍińgea.

² Onate amem hukumale khan ale do jordan gaḍa ṭhen senkate mitʼṭecʼkate khunṭi jogaṛ ạgukate abo lạgitʼ mitʼṭecʼ tahen jaegale benaoa.”

³ Unre onko modren mitʼ hoṛe menkeda, “Am hõ amren gutiko sãote dela calakʼme.” Elisaeye menkeda, “Ṭhikgea, dela bon calakʼa.”

⁴ Niạ menkate uni do onko sãoteye calaoena. Ar onko do Jordan ṭhen senkate dare mamakʼko ehopʼena.

⁵ Onko modre mitʼ hoṛ do tinre dareye mamakʼ kan tahẽkana unre uniyakʼ ṭeṅgocʼ do dakʼre ńurentaea. Uni do ãṭ aṛaṅteye menkeda, “Hae, hae! E ińren mạlik, ona doń koe ạguakatʼ tahẽkana.”

⁶ Unre Isorren hoṛe kulikedea, “Ona do okare ńur akana?” Uni do ona jaegae udukʼketʼ khan Elisae do mitʼṭecʼ kaṭ ạgukate onḍeye capatʼ khadlekada ar onate ṭeṅgocʼ do cape rakapʼena.

⁷ Unre uniye menkeda, “Ma rakabme.” Onate uni hoṛ do ti tiạrkate onae rakapʼkeda.

Aramren lạṛhại phạdko bhagao ocoyen

⁸ Ona jokhecʼ Aramren raj do Israelko upạrteye lạṛhạikan tahẽkana. Uni do acʼren subedarko sãote solha mitʼkateye menkeda, “Phalna jaegakore bon ḍerakʼa.”

⁹ Unre Isorren hoṛ do Israelren raj ṭhene roṛ gotʼkada, “Sontorokʼme, phalna jaega secʼ do alom calakʼa, ente Aramrenko do onḍeko calakʼ kana.”

¹⁰ Onate Israelren raj do Isorren hoṛe hukum akatʼ jaegate hoṛ kolkateye sontorkatʼkoa. Ar nonkate raj do apnare rukhiyạkʼ kan tahẽkana.

¹¹ Onate Aramren raj do ạḍiye raṅgaoena. Uni do acʼren subedarko hohoatʼkoteye metatʼkoa, “Ma lạipe, abo talare Israelren raj secʼ do okoe menaea?”

¹² Uniren subedar modren mitʼ hoṛe menkeda, “E ińren mạlik, abo modre do okoege bạnukʼkoa; menkhan am do amakʼ giticʼ kandhare okam roṛ ona katha hõ Israelren nạbi Elisae do Israelren raje lạiyae kana.”

¹³ Unre raj do noae hukumkeda, “Do senkate uni sendra ńamepe okare menaea, jemon iń do hoṛ kolkate uniń sapʼ ạgu daṛeae.” Tayomte khobor baḍaeyena, uni do Dathonre menaea.

¹⁴ Unre raj do sadomko, rãt gạḍiko ar maraṅ lạṛhại phạdko onḍeye kolketʼkoa. Onko do ńindạ jokhecʼ senkate nagrahako gherao ạcurkeda.

¹⁵ Dosar hilokʼ ạḍi setakʼre Isorren hoṛren guti do beretʼkate bahreteye senen khane ńelkeda sadomko ar rãt gạḍikoante mitʼ dol lạṛhại phạdko do nagrahako gherao ạcur akada. Unre uni guti doe menkeda, “Hae, hae! E ińren mạlik, alaṅ do cetʼ laṅ cekaea?”

¹⁶ Nạbiye roṛ ruạṛkeda, “Alom botorokʼa. Okoe alaṅ sãote menakʼko onko do hanko khon hõko saṅgegea.”

¹⁷ Ona tayom Elisae doe koekeda, “E Probhu Isor, uniyakʼ mẽtʼ baṛe jhicʼkatae me jemone ńeńel.” Unre Probhu Isor do uni gutiyakʼ mẽtʼe jhicʼketʼaea. Uni doe ńelkeda Elisae beṛhaeteakʼ burure do seṅgel reakʼ rãt gạḍi ar sadomkote perecʼgea.

¹⁸ Ar bạiriko do tinre Elisae secʼko pheḍ hijukʼkan tahẽkana unre uni do Probhu Isor ṭhene koekeda, “E Probhu noko hoṛ do ạndhuạ ocokom.” Elisaeyakʼ koe lekage Probhu Isor do onkoakʼ mẽtʼe ạndhuạ ocoketʼtakoa.

¹⁹ Elisae do onkoe metatʼkoa, “Noa do ona hor hõ baṅkana ar ona nagraha hõ baṅkana. Ape do iń tayomte hijukʼpe; ar ape okoepe sendrayedekan uni hoṛ ṭheniń idipea.” Niạ menkate uni do Samariạte onkoe idiketʼkoa.

²⁰ Nagrahate bolokate Elisaeye menkeda, “E Probhu Isor, ńitokʼ onkoakʼ mẽtʼ do saṛ ocoytakome jemonko ńeńel.” Unre Probhu Isor do onkoakʼ mẽtʼe jhicʼketʼtakoa arko ńelkeda, onko do Samariạreko seṭer akana.

²¹ Israelren raj do onko ńelte Elisaeye metadea, “E baba, onko do cetʼ iń gocʼkoa?”

²² Uniye roṛ ruạṛkeda, “Baṅa, onko do alom gocʼkoa. Am apnarakʼ tarwaṛe ar sarte okoeyem bondi akatʼko onko do cetʼem gocʼkoa? Onko do jomakʼ ar ńũiyakʼ emakom, jemon jom ńũkate akoren mạlik ṭhenko ruạṛ sen daṛeakʼ.”

²³ Onate raj do onko lạgitʼ maraṅ okocʼe bhojkeda. Arko jom ńũ baṛaketʼ khan onkoe bidạkatʼkoa ar onko do akoren mạlik ṭhenko ruạṛ calaoena. Onate Aramren lạṛhại phạdko do Israel raj talare luluṭko bạgikeda.

Samariạ reakʼ akal

²⁴ Inạ thoṛa din tayom Aramren raj Benhadad do acʼren sanam lạṛhại phạdkoe jarwaketʼkoa ar Samariạko gherao ạcurkeda.

²⁵ Unre nagrahare maraṅ akal ńelena. Niạ gherao do nunạkʼ din hạbicʼ hoyena je, mitʼṭen gadhawakʼ bohokʼ do mitʼ keji rupạte ar mitʼ keji reakʼ pon hạṭiń reakʼ mitʼ hạṭiń parwa icʼ do eae gram rupạte ạkhrińokʼ ehopʼena.

²⁶ Israelren raj do mitʼdin nagraha reakʼ pạcri cetanreye dãṛã baṛaekan tahẽkanre mitʼṭen maejiu do ãṭ aṛaṅte uniye metadea, “E ińren mạlik maharaj, goṛowạńme baṛe.”

²⁷ Raje roṛ ruạṛkeda, “Probhu Isor bae goṛowạń khan iń do cekateń goṛowama? Khạrại khon, se darkha lelenḍ kunḍ khon?”

²⁸ Ona tayom uniye kulikedea, “Cetʼ hoyakana?” Uni maejiue menkeda, “Nui maejiu do ińe metadiń tahẽkana, ‘teheń do amren hopon jome lạgitʼ emokʼme, ar gapa do ińren hopon jome lạgitʼ iń emokʼa.’

²⁹ Onate ạliń do ińren gidrạ isinkate liń jomkedea. Ar dosar hilokʼ uniń metadea, ‘ńitokʼ do amren gidrạ emokʼme.’ Menkhan uni doe oko akadea.”

³⁰ Maejiuakʼ katha ańjomte raj do acʼakʼ kicricʼe oṛecʼketʼtaea. Uni do unrehõ pạcri cetanreye tahẽkana. Onate hoṛkoko ńelkeda, uniyakʼ horokʼakʼ latarre do gõṛẽ kicricʼteye bande akana.

³¹ Uniye menkeda, “Teheń Saphatren hopon Elisaeyakʼ bohokʼ tarenre tahentae enḍekhan Isor do ińe sạjạiyińma, ona do ạḍi bạṛicʼ sạjạige!”

³² Elisae do unre acʼakʼ oṛakʼreye duṛupʼ akan tahẽkana ar uni sãote murubbikoko tahẽkana. Raj do mitʼṭen hoṛ Elisae ṭhene kolkadea, menkhan uni hoṛ onḍe ạuriye seṭerokʼrege Elisae do murubbikoe metatʼkoa, “Ape do cetʼ uni khuniạhi do bape ńele kana okoe do ińakʼ bohokʼ makʼ ńur tiń lạgitʼ mitʼ hoṛe kolekana? Ńelpe, uni hoṛe hecʼlen khan duạrpe sińa ar alogepe jhicʼaea. Ar uni tayomte do uniren mạlikakʼ sabadge cetʼ baṅ ańjomokʼ kana?”

³³ Elisae do unhõ kathae roroṛ kan tahẽkana un jokhecʼ uni hoṛ doe hecʼena. Ona tayom raj do hecʼkateye menkeda, “Noa muhin do Probhu Isor ṭhen khonge hecʼakana. Enḍekhan Probhu Isor lạgitʼ do cedakʼ iń biloma?”