2 Rapajko 5 - সান্তালী বাইবেল

Namane bogeyen

¹ Naman do Aram rajren lạṛhại phạdkoren subedare tahẽkana. Uniren mạlik samaṅre uni do mitʼṭen maraṅ ar manotanicʼ hoṛe tahẽkana, ente Probhu Isor do uni hotetege Arame jitạu ocoleda. Uni do mitʼṭen birbanṭa hoṛe tahẽkana, menkhan uniyakʼ hoṛmore do murhucʼ jom rog tahẽkantaea.

² Aramren luluṭko do Israel disạmte dolke dolko calakʼkan tahẽkana. Mitʼ dhao onko do mitʼṭen huḍiń kuṛi gidrạ hõ bondikateko idi torakedea. Ar uni do Naman bạhuren kạ̃ṛmĩye hoylena.

³ Mitʼdin kuṛi do acʼ kisạ̃ṛren bạhuttetʼe metadea, “Ińren kisạ̃ṛ do Samariạren nạbi sãote eken mitʼ dhaoe ńapamlen khange uni do murhucʼ jom rog khone boge utạrokʼa.

⁴ Israel khon ạguyicʼ uni kuṛi okae menletʼ Naman do senkate acʼren mạlik onae lạiyadea.

⁵ Unre Aramren raj do roṛ ruạṛketʼteye menkeda, “Ṭhikgea, Do calakʼme. Iń do Israelren raj ṭhen mitʼṭecʼ ciṭhiń kola.” Ar onate Naman do pesae aregel keji rupạ, eaegel irạl keji sona ar gel joṛa kicricʼanteye oḍok calaoena.

⁶ Ar okaṭakʼ ciṭhi do Israel raj ṭhene idiketʼ onare ol tahẽkana, “Ińren subedar Naman hotete niạ ciṭhi am ṭheniń kolkeda jemon murhucʼ jom rog khon unim bogeye.”

⁷ Unre Israelren raj do ciṭhi paṛhaokate ona or cirạketʼteye menkeda, “Iń do cetʼ Isor kạnạń? Iń do cetʼ gocʼkate arhõ jiwiń em ruạṛ daṛeakʼa? Murhucʼ jom rog khon bogekʼ lạgitʼ cedakʼ uni do iń ṭhen nui hoṛe kolkedea? Ńelpe, uni do iń sãote lạṛhại lạgitʼ susiye ńam bakʼṛakana.”

⁸ Isorren hoṛ Elisae do tinreye ańjomkeda, Israelren raj do acʼakʼ kicricʼe oṛecʼ akatʼtaea, unre uni do noa khobore kolkeda, “Cedakʼ kicricʼ dom oṛecʼketʼtama? Uni hoṛ do iń ṭhen kolkaeme. Inạ khane baḍae daṛeakʼa, Israelre mitʼṭen nạbi menaea mente.”

⁹ Onate Naman do acʼakʼ rãt gạḍiko ar aswarikoante Elisaeyakʼ oṛakʼ duạr ṭhen senkateye teṅgoyena.

¹⁰ Unre Elisae do mitʼṭen hoṛ hoteteye roṛ gotʼkada, “Jordan gaḍate senkate am do eae dhao umokʼme. Inạ khan am dom boge utạrokʼa.”

¹¹ Menkhan Naman do ạḍiye raṅgaoente onḍe khone calaoena are menkeda, “Iń doń hudisleda khạṭige uni do iń ṭhene oḍokʼ hijukʼa ar teṅgokate acʼren Probhu Isore hohoaea ar murhucʼ jom rog cetanre acʼakʼ tiye dohoytaea ar ińakʼ roge bogeytińạ.

¹² Damesek reakʼ Abana ar Parpar gaḍa dakʼ do cetʼ Israel reakʼ sanam gaḍa dakʼko khon baṅ sorosgea? Iń do cetʼ onḍe umkate bạń sapha daṛekokʼa?” Ar niạ menkate uni do raṅgaoteye ruạṛ calaoena.

¹³ Namanren gutiko do unre uni ṭhen senkateko metadea, “E hujur, uni nạbi jodi jãhãn maraṅ kạmi lạgitʼe menkem enḍekhan cetʼ ona bam onkakea? Ar umkate saphakʼe metamkan onate cetʼ artetʼ onkae lek do baṅkan tama?”

¹⁴ Unre Naman do Isorren hoṛakʼ katha leka senkate jordanre eae dhaoe unumena. Onate uniyakʼ hoṛmo do bogeyena ar huḍiń gidrạkoakʼ hoṛmo leka arhõ mońj ruạṛentaea.

¹⁵ Unre Naman ar uni sãoten sanam hoṛ do Isorren hoṛ ṭhenko ruạṛ calaoena. Naman do uni samaṅre teṅgokateye menkeda, “Ńitokʼ doń baḍae daṛeakʼkana, Israelren Isor chaḍa dhạrtire ar cele Isorge bạnukʼkoa. Am do ńitokʼ amren guti ṭhen khon niạ sandes baṛe ataṅme.”

¹⁶ Nạbiye roṛ ruạṛkeda, “Okoeyiń sewawae kan uni jiwetʼ Probhu Isor ńutumteń kiriạkʼ kana, iń do mitʼṭecʼ jinis hõ bạń hataotama.” Namane jormoṭkedere hõ uni do bae rạjilena.

¹⁷ Namane menkeda, “Jãhãnakʼge bam hatao enḍekhan dayakate barea gadha jemonkin idi daṛeakʼ nonkan hasa amren guti baṛe emaeme, ente amren nui guti do Probhu Isor chaḍa tisge jãhãn debota ṭhen jeredokʼakʼ ar eṭakʼ samaṅokʼakʼ do bae samaṅa.

¹⁸ Menkhan niạ babotre jemon Probhu Isor do acʼren gutiye ikạkạń. Ińren kisạ̃ṛ do tinre Rimon debotawakʼ mundilre ińre ṭenḍarkateye bolokʼa ar Rimone ḍobokʼae unre ińhõ ḍobokʼ lagaoạńạ. Niạ babotre jemon Probhu Isor do ińe ikạkạń.”

^19-20 Elisaeye menkeda, “Sulukte senjoṅ joṅme.” Naman do uni ṭhen khon thoṛa sạṅgińe senen khan Isorren hoṛ Elisaeren guti Gehosi do mone moneteye menkeda, “Aramren Naman okae ạguletʼ ona baṅ hataokate ińren mạlik do maṅnategeye aṛakʼkadea. Jiwetʼ Probhu Isor ńutumteń kiriạkʼ kana, uniń khudạu tiyogea ar uni ṭhen khon jãhãnakʼ iń hataogea.”

²¹ Niạ menkate Gehosi do Naman tayom tayomteye senena. Ar Naman do acʼ secʼ ńir hijukʼkane ńelkede khan uni sãote ńapamokʼ lạgitʼ rãt gạḍi khone pheḍena. Uni doe kulikedea, “Sanamakʼ ṭhikgea tho?”

²² Gehosiye menkeda, “Jotowakʼge ṭhikgea. Menkhan ińren kisạ̃ṛ do niạ katha lạiyam lạgitʼe kolakadińạ, Ephrayim buru ṭoṭha khon cela-nạbiko modre bar hoṛ do ńitge uni ṭhen kin seṭer akana. Onate dayakate am do unkin lạgitʼ pegel are keji rupạ ar bar joṛa kicricʼ baṛe emokʼme.”

²³ Namane menkeda, “Pegel are keji do cedakʼ? Am do eaegel irạl keji hataome.” Ar onako hatao lạgitʼ uni do Gehosiye jormoṭkedea ar eaegel irạl keji rupạ barea thạilạkʼreye tolketʼte bar joṛa kicricʼe emadea. Uni do acʼren barea gutikin onakoe ematʼkinạ ar unkin do Gehosi laha lahatekin gokʼ idikeda.

²⁴ Ado ḍuṅgri buru ṭhen hecʼkate Gehosi do gutikin ṭhen khon onako hataokate oṛakʼreye dohokada. Ar ona tayom doe bidạkatʼkinte unkin dokin ruạṛ calaoena.

²⁵ Ona tayom uni do bhitrite senkate acʼren kisạ̃ṛ Elisae samaṅreye teṅgoyena. Elisae do uniye kulikedea, “Gehosi, am do okatem senlena?” Gehosiye menkeda, “Amren guti do okatehõ bacoń senlen.”

²⁶ Menkhan Elisae do uniye metadea, “Uni hoṛ do tinre am sãote ńapamokʼ lạgitʼ rãt gạḍi khone pheḍena unre ińakʼ mon do cetʼ am sãote baṅ senlentińạ? Ṭaka-poesa, kicricʼ khạnḍwạkʼ, jạitun bagwan, darkha bagwan, mĩhũ-meromko, bhiḍiko ar guti kạ̃ṛmĩko hataoko reakʼ okte do cetʼ ńitokʼ kangea?

²⁷ Onate Namanakʼ murhucʼ jom rog do am ar amren bõsko talare jaejug hạbicʼ tahena.” Unre Gehosi do Elisae samaṅ khone calaoena ar uniyakʼ hoṛmo do murhucʼ jom rogte him leka ponḍentaea.