2 Rapajko 3 - সান্তালী বাইবেল

Moabren raje huletʼkan

¹ Jihudạren raj Jehosaphatakʼ rajokʼ gel irạlakʼ bochorre Ahabren hopon Jehoram do Israelren raje hoyena. Uni do Samariạre tahẽkate gelbar bochor raje calaoketʼa.

² Uni do Probhu Isorakʼ mẽtʼre oka bạṛicʼakʼ kan onageye kạmikan tahẽkana, tobe acʼren eṅgat ar apat leka do bae tahẽkana. Uniren apattetʼ Bakʼal debota sewawae lạgitʼ okaṭakʼ dhiri khunṭiye teṅgoletʼ tahẽkan ona dhiri khunṭi uni doe rạputʼ giḍiletʼa.

³ Ar Nabatren hopon Jerobiam Israelko cetʼ lekae kại ocoletʼko onkage Jehoram hõe kạmikeda. Ar ona khon do bae ruạṛlena.

⁴ Moabren raj Misaren do ạḍi utạr bhiḍiko tahẽkantaea. Uni do khajna lekate mitʼ lakh bhiḍi hopon ar mitʼ lakh bhiḍi upʼ Israelren raje emaekan tahẽkana.

⁵ Menkhan Ahab gujukʼ tayom Moabren raj do Israelren raj upạrteye hulkeda.

⁶ Unre Jehoram raj do Samariạ khone oḍok hecʼente Israelren sanam lạṛhại phạdkoe jarwaketʼkoa.

⁷ Ona chaḍa Jihudạren raj Jehosaphat ṭhen hõ niạ sombate kolkeda je, “Moabren raj do iń upạrteye hul akada. Onate Moab upạrte lạṛhại lạgitʼ am do cetʼ iń tulucʼem calakʼa?” Uni doe roṛ ruạṛkeda, “Hẽ, am sãoteń calakʼa. Iń ar am dolaṅ alaṅ kangea, ińren sanamko doko amrenhõ kana, ińren sadomko hõ amren kangeako.”

⁸ Jehosaphat do noa hõe kuliyana, “Abo do oka horte bon rakapʼ calakʼa?” Jehorame roṛ ruạṛkeda, “Edom reakʼ hahaṅkar talate.”

⁹ Unre Jihudạren raj ar Edomren raj sãote Israelren raj hõe oḍok hecʼena. Onko do eae din hạbicʼ ạcur ạcurteko calaoena. Unre lạṛhại phạdkoren se onko sãoten janwarko lạgitʼ dakʼ do baṅ tahẽkana.

¹⁰ Ona ńelte Israelren raje menkeda, “Hae, hae! Probhu Isor do Moabakʼ tire jimạ bon lạgitʼge cetʼ pea rapajko mitʼ sãoteye hohoakatʼ bona?”

¹¹ Jehosaphate menkeda, “Nonḍe do cetʼ Probhu Isorren jãhãe nạbi bạnukʼkoa one uni hotete Probhu Isor bon kuli daṛeke?” Israel rajren mitʼṭen gutiye menkeda, “Nonḍe do Saphatren hopon Elisae menaea. Uni do Eliạren sapʼ dapʼicʼe tahẽkana.”

¹² Jehosaphate menkeda, “Probhu Isorakʼ katha do uni ṭhen menakʼa.” Onate Israelren raj, Edomren raj ar Jehosaphat do Elisae ṭhenko senena.

¹³ Elisae do Israelren raje metadea, “Am tulucʼ ińakʼ do cetʼ? Am do amren ạpum ar amren eṅgamren nạbiko ṭhen calakʼme.” Israelren raje roṛ ruạṛkeda, “Baṅa, bạń calakʼa, ente Moabakʼ tire jimạle lạgitʼ Isorge ale pepe rapajkoe jarwa mitʼ akatʼlea.”

¹⁴ Elisaye menkeda, “Okoeyiń sewawae kan uni sanam daṛean jiwetʼ Probhu Isor ńutumte kiriạkateń meneda, Jihudạren raj Jehosaphat nonḍe bae tahẽlen khan iń do am secʼ beṅgetʼ hõ bạń beṅgetʼkea, ar mone ho bạń moneyam kea.

¹⁵ Ńitokʼ do nonkan mitʼṭen hoṛ ạguiyepe okoe do peṛesaṅe banam daṛeakʼ.” Uni hoṛ do tinre peṛesaṅe banametʼ tahẽkana unre Probhu Isorakʼ daṛe do Elisae cetanre hecʼena.

^16-17 Ar Elisa doe menkeda, “Probhu Isor do niạ buru lodamre soḍokʼko benaoe metapekana, ente hoe se dakʼ bape ńel ńametʼkanre hõ niạ soḍokʼko do dakʼte perejokʼa ar dakʼpe ńama ar aperen ḍaṅgra-bhiḍiko ar eṭakʼ janwarko hõ dakʼko ńũiya.

¹⁸ Probhu Isor ṭhen noa do alga kạmikana. Ona chaḍa uni do Moab disạm hõ apeakʼ tireye jimạ akada.

¹⁹ Ape do pạcrite esetʼ mitʼke mitʼ nagraha ar mitʼke mitʼ atokope marao utạra. Ar mimitʼ bhage darepe makʼ giḍikakʼa, dakʼ reakʼ sanam jharnakope bondkakʼa ar bhage bhage jumire dhirikope capatʼakʼa ar onape nosṭo giḍikakʼa.”

²⁰ Dosar hilokʼ setakʼ jokhecʼ samaṅokʼakʼ oktere Edom disạm secʼ khon dakʼ ạtu hecʼente disạm do dakʼte perecʼena.

²¹ Inạkʼtege Moabrenko doko ańjomleda, onko pea rapajko do ako upạrte lạṛhại lạgitʼko oḍok hecʼakana. Onate onko do lạṛhại reakʼ khanḍa bhanḍako sapʼ daṛeakʼ nonkan sanam herel hoṛko jarwaketʼkote disạm reakʼ simạreko thạrketʼkoa.

²² Ar setakʼ jokhecʼ tinre jạpitʼ khonko beretʼena unre siń cando do dakʼreye jhalkaokʼkan tahẽkana. Ar Moabrenko ṭhen ona dakʼ do mãyãm leka ńelena.

²³ Onkoko menkeda, “Ona do mãyãm kana! Rapajko do khạṭige ako akogeko mapakʼ gopocʼ akana. E Moabrenko, dela, abo do senkate bon luṭ joṅa.”

²⁴ Menkhan Moabrenko do tinre Israelkoakʼ ḍera ṭhenko senena unre Israelko doko oḍok hecʼena ar onko cetanre jhãpko emkeda ar Moabrenko doko dạṛkeda. Ar Israelko do Moabrenko gocʼ gocʼte onkoakʼ disạmteko boloyena.

²⁵ Onko do nagrahako ḍahao maraokeda ar bhage bhage hasakore dhiriko capatʼada. Onko do dakʼ reakʼ sanam jharnako bond oṭokada ar bhage darekoko makʼ giḍikada. Eken Kirhareset nagraha bako marao daṛeada, onate ginḍwạri cakʼpatʼko do ona nagrahako gheraokeda arko hatkeda.

²⁶ Moab raj do tinreye ńelkeda lạṛhạireko bhagao ocokʼkana unre uni do lạṛhại phạdko talate Edomren raj ṭhen senokʼ lạgitʼ acʼ sãote eae sae tarwaṛe cakʼlaokoe soṅgeketʼkoa, menkhan bae sen daṛeada.

²⁷ Unre uni do acʼren pạhil hopon, okoe do acʼ tayom raje hoykokʼ uni do nagraha reakʼ pạcri cetanre idikateye dãṛẽkedea ar seṅgelreye samaṅkedea. Uni do Israelko cetanre ạḍi ãṭe edreyena, ar Israelko doko uṭhạuente akoakʼ disạmteko ruạṛ calaoena.