2 Rapajko 25 - সান্তালী বাইবেল

Jerusalem reakʼ ńurokʼ

¹ Sedekiạwakʼ rajokʼ areyakʼ bochor reakʼ gelakʼ cando reakʼ gelakʼ dinre Babelren raj Nebukadnesar do acʼren sanam lạṛhại phạdkoante Jerusalem upạrte lạṛhại lạgitʼe mohnḍayena. Uni do nagraha bahrereye ḍerayena ar nagraha beṛhaete pinḍhạkoe benao ạcurkeda.

² Sedekiạ rajakʼ rajokʼ gelmitʼ bochor hạbicʼ nagraha do gherao esetʼge tahẽkana.

³ Ar ponakʼ cando reakʼ areyakʼ dinre nagrahare akal iạte nonka hoyena, hoṛkoakʼ jomakʼ lạgitʼ cetʼge baṅ tahẽlena.

⁴ Tayomte nagraha pạcri reakʼ mitʼ jaegareko bhugạkʼkeda. Ar Babelrenko do nagrahako gherao esetʼ akatʼ tahẽkanre hõ ńindạ jokhecʼ Jihudạren sanam lạṛhại phạdko do rajakʼ bagwan ṭhenakʼ banar pạcri reakʼ phaṭok duạrte nagraha khonko oḍokena ar raj do Araba secʼe dạṛkeda.

⁵ Ar uniren sanam lạṛhại phạdko do uni khonko begarente onko doko chirchạtur cabayena ar unre Babelren lạṛhại phạdko do rajko khudạu idikedea ar Jerikho reakʼ bilạn ṭạnḍireko sapʼ tiyokʼkedea.

⁶ Onko do uniko bondikedea ar Riblate Babelren raj ṭhenko idikedea. Onḍe uni upạrte sạjại reakʼ hukum hoyena.

⁷ Lạṛhại phạdko do Sedekiạ samaṅrege uniren hoponko gocʼketʼkoa. Ona tayom onko do uniyakʼ mẽtʼko hoṭor totʼketʼtaea ar pitạl reakʼ sikṛite tolkate Babelteko idikedea.

Mundil dhaṅdhaserokʼ kan

⁸ Babelren raj Nebukadnesar rajokʼ gel areyakʼ bochor reakʼ mõṛẽakʼ cando reakʼ eaeyakʼ dinre rajren rurukhiyạ dolren subedar Nebusaradan do Jerusalemteye hecʼena.

⁹ Uni do Probhu Isorakʼ oṛakʼre, raj oṛakʼre ar Jerusalem reakʼ joto oṛakʼre seṅgele jeretʼada. Ar asol asol oṛakʼko hõe jeretʼ giḍikada.

¹⁰ Rajren rurukhiyạ dolren subedar tabere menakʼko Babelren lạṛhại phạdko do Jerusalem reakʼ pạcriko rạputʼ giḍikada.

¹¹ Ar nagraharen sarecʼ hoṛko okoe do Babel raj secʼko hoylen onko sanamkoge rurukhiyạ dolren subedar Nebusaradan do bondikateye idiketʼkoa,

¹² menkhan darkha bagwan ńel todarot ar jumi cas lạgitʼ thoṛa reṅgecʼ hoṛ do disạmreye doho oṭokatʼkoa.

¹³ Babelrenko do Probhu Isorakʼ oṛakʼ reakʼ pitạl tham khunṭi kin, pitạl reakʼ ganḍoko ar pitạl reakʼ maraṅakʼ luihạ do rạputʼ khanḍa khunḍikate Babelteko idikeda.

¹⁴ Ona chaḍa onko do sanam ṭukucʼko, kạ̃ṛchũko, sultạ saphae reakʼ cimṭạko, belcako ar koejoṅ oṛakʼ reakʼ sekʼwa kạmi lạgitʼ eṭakʼ sanam pitạl reakʼ jiniskoko idikeda.

¹⁵ Ar seṅgel dohoy lạgitʼ ḍhaknako, bạṭiko ar sona-rupạ reakʼ eṭakʼ sanamakʼ jinisko hõ rajren rurukhiyạ dolren subedar doe idikeda.

¹⁶ Solomon raj do Probhu Isorakʼ oṛakʼ lạgitʼ okaṭakʼ barea tham khunṭi, maraṅ karahe ar ganḍokoe benao ocoletʼ ona reakʼ sanam pitạlko do ojon daṛekokʼ khon hõ ḍherge tahẽkana.

¹⁷ Mimitʼ goṭecʼ khunṭi do gel irạl moka usul ar ona reakʼ muthni do pe moka usul tahẽkana. Muthni beṛhaete do pitạl reakʼ sikṛi ar pitạl reakʼ ḍạlim jokote sajao tahẽkana.

¹⁸ Jihudikoren maraṅ naeke Seruya, ar dosaricʼ naeke Sephaniạ ar pene pahradarko do uni rurukhiyạ dolren subedare bondi idiketʼkoa.

¹⁹ Ar unre okoe do nagrahareko tahẽkan onko mod khon uni do lạṛhại birko cetanre bahal akan mitʼṭen guti ar rajren mõṛẽ goṭen sopolhakoe sapʼketʼkoa. Ona chaḍa subedarren olokʼicʼ, okoe do lạṛhại phạdre hoṛkoe bhoraoetʼko tahẽkan uni ar nagrahareko ńamen arhõ turuigel hoṛkoe sapʼketʼkoa.

²⁰ Nebusaradan do onko sanamkoe bondiketʼkote Riblate Babelren raj ṭhene idiketʼkoa.

²¹ Ar raj do Hamat disạm reakʼ Riblare noko sanam hoṛkoe gocʼketʼkoa. Nonkate Jihudạren hoṛko bondikate apnarakʼ disạm khon sạṅgińteko idiocoyena.

²² Babelren raj Nebukadnesar do okoe hoṛko Jihudạ disạmreye sarecʼ oṭoletʼko tahẽkan onko cetanre Saphanren goṛomtetʼ koṛa, metakʼme Ahikamren hopon Gedaliạ do disạm cakʼlaoicʼ menteye bahalkedea.

²³ Babelren raj do Gedaliạ disạm cakʼlaoyicʼ menteye bahal ocoakana menteye ańjomketʼ khan Jihudạren sarecʼ subedarko ar onkoren hoṛko, metakʼme Nethaniạren hopon Ismael, Kareyer hopon Johanan, Netopha Tanhumetren hopon Seruya ar Makathiren hopon Jasaniạ ar onkoren hoṛko do Mispate Gedaliạ ṭhenko hecʼena.

²⁴ Gedaliạ do onko ar onkoren hoṛko ṭhen kiriạkateye menkeda, “Ape do Babelren cakʼlaoko alope botorakoa. Disạmre girobasokʼpe ar Babelren raj do mạlik mente aṅgocepe, onate ape do bhage hoyokʼtapea.”

²⁵ Menkhan eaeyakʼ candore Elisamaren goṛomtetʼ koṛa, metatʼme Nethaniạ hopon Ismael do gel hoṛko soṅgekate Gedaliạ ar Jihudạren okoeko hoṛ do Babel reakʼ Mispare uni sãoteko tahẽkan onko sanamkoe gocʼketʼkoa. Nui Ismael do raj bõsren hoṛe tahẽkana.

²⁶ Onate Babelrenko botorte Jihudạren kạṭicʼ lạṭu sanam hoṛko ar subedarko do Misorteko dạṛkeda.

Jehoyakin do hajot khon chaḍaoe ńamketʼ

²⁷ Jihudạren raj Jehoyakine bondi idi ocokʼ reakʼ pegel eae bochorre Ewil Merodak do Babelren raje hoyena. Uni do inạ bochor reakʼ gelbar cando reakʼ bargel eaeyakʼ dinre Jehoyakin do hajot khone aṛakʼkedea.

²⁸ Uni do Jehoyakin sãote mońjteye galmaraokeda ar Babelre uni sãote okoe rajko tahẽkan onko khon hõ ḍher manotakʼ ṭhạ̃ireye duṛupʼkedea.

²⁹ Jehoyakin do jel khana reakʼ kicricʼe bocʼkeda ar jion reakʼ sarecʼ dinko do raj sãote jom ńũkateye paromkeda.

³⁰ Ar tinạkʼ din jiwetʼe tahẽkan unạkʼ din raj do din hilokʼ mitʼṭecʼ bhata lekae emaekan tahẽkana.