2 Rapajko 24 - সান্তালী বাইবেল

¹ Jehoyakimakʼ rajokʼ oktere Babelren raj Nebukadnesar do Jihudạ disạme akromonkeda. Jehoyakim do pe bochor uniyakʼ gobolreye tahẽkana. Menkhan tayomte uni do Nebukadnesar upạrteye hulkeda.

² Probhu Isor do Jehoyakim upạrte Babelrenko, Aramrenko, Moabrenko ar Amonren luluṭ hoṛkoe kolketʼkoa. Probhu Isor do acʼren guti, metakʼme nạbiko hotete okaṭakʼ kathae roṛ saḍeletʼ onkage uni do Jihudạ disạm marao lạgitʼ onkoe kolketʼkoa.

^3-4 Probhu Isorakʼ hukum lekage Jihudạre noako do hoylena jemon uni do acʼ samaṅ khon onkoe sạṅgiń daṛeako. Noako do hoylena Manaseakʼ sanam kại iạte ar bin dusạn hoṛkoakʼ mãyãm joro ocoytako khạtirte. Uni do onkoakʼ mãyãmte Jerusaleme perecʼkeda, ar Probhu Isor do ona ikại lạgitʼ bae rạjilena.

⁵ Jehoyakimakʼ eṭakʼ sanam kạmiko reakʼ katha do “Jihudạren rapajkoakʼ Itihãs” ńutumanakʼ puthire ol menakʼa.

⁶ Tayomte uni do acʼren hapṛamko ṭhene calaoena ar uniren hopon Jehoyakim do uniyakʼ jaegareye rajena.

⁷ Misorren raj do lạṛhại lạgitʼ acʼakʼ rajosṭi khon ar bae oḍok baṛalena, ente Babelren raj do Misor reakʼ rohoṛ gaḍa khon phurạt gaḍa hạbicʼ goṭa rajosṭigeye dokhol akatʼ tahẽkana.

Jihudạren raj Jehoyakin

⁸ Jehoyakin do gel irạl bochor umerre raje hoylena ar pe cando Jerusalemre raje calaokeda. Uniren eṅgatakʼ ńutum do Nehusṭa tahẽkana; uni do Jerusalem nagraha Elnathanren hoponerae tahẽkana.

⁹ Jehoyakin do acʼren apat lekage Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana.

¹⁰ Onako dinre Babelren raj Nebukadenesar ren lạṛhại phạdko do Jerusalemte hecʼkate onako gheraokeda.

¹¹ Uniren lạṛhại phạdko do tinre nagrahako gherao akatʼ tahẽkana unre Nebukadenesar do acʼge nagrahateye boloyena.

¹² Unre Jihudạren raj Jehoyakin, uniren eṅgattetʼ, uniren gokʼṛoyicʼ, uniren subedarko ar uniren gutiko jotoge Nebukadenesarakʼ tireko jimạyena. Nebukadenesarakʼ rajokʼ irạlakʼ bochorre uni do Jehoyakin bondikateye idikedea.

¹³ Probhu Isor okalekae menletʼ onkage Nebukadenesar do Probhu Isorakʼ oṛakʼ ar raj oṛakʼ khon joto dhon duribkoe oḍok idikeda ar Israelren raj Solomon do Probhu Isorakʼ oṛakʼre lạgitʼ sonate okako jinise benao ocoletʼ onako jotowakʼ uni doe samakʼ khanḍa khunḍikeda.

¹⁴ Ona chaḍa Jerusalemren sanamko, metakʼme sanam gutiko ar lạṛhại birko, sanam kạrigolko ar kamarko jotote uni do gel hajar hoṛe bondi idiketʼkoa. Disạmren reṅgecʼ hoṛ chaḍa ar celege bako sarecʼ lena.

¹⁵ Nebukadenesar do bondi lekate Babelte Jehoyakine idi akade tahẽkana. Uni do Jerusalem khon rajren eṅgattetʼ, uniren bạhuttetʼ, uniren kạmiyạko ar disạmren lekman hoṛko hõ bondikateye idiketʼkoa.

¹⁶ Uni do lạṛhại lạgitʼ lek lekan ar daṛean eae hajar lạṛhại birko ar mitʼ hajar kạrigolko bondikate Babelteye idiketʼkoa.

¹⁷ Uni do Jehoyakinakʼ jaegare uniren kakattetʼ Motaniạye rajkedea ar uniyakʼ ńutume bodolketʼtaete Sedekiại dohoketʼtaea.

Jihudạren Sedekiạ raj

¹⁸ Sedekiạ do bargel mitʼ bochor umerre raje hoylena. Uni do Jerusalemre gelmitʼ bochor raje calaokeda. Uniren eṅgatakʼ ńutum do Hamutal tahẽkana; ar uni do Libna nagraha Jirimiạren hoponerae tahẽkana.

¹⁹ Jehoyakim leka Sedekiạ hõ Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana.

²⁰ Jerusalem ar Jihudạren hoṛko iạte Probhu Isor do edreteye jal jalaoena ar mucạtʼre acʼ samaṅ khon onkoe sạṅgiń giḍikatʼkoa. Tayomte Sedekiạ do Babelren raj upạrteye hulkeda.