2 Rapajko 23 - সান্তালী বাইবেল

Bondobos manao reakʼ gokʼakʼ

¹ Josiạ raj do hoṛ kolkate Jihudạ ar Jerusalemren sanam murubbikoe hoho jarwaketʼkoa.

² Uni do Jihudạ ar Jerusalemren hoṛko, naekeko, nạbiko, disạm hoṛko ar lekman hoṛkoante Probhu Isorakʼ oṛakʼteye boloyena. Ar Probhu Isorakʼ oṛakʼre okaṭakʼ bondobos puthi ńamlen ona reakʼ sanam kathakoe paṛhao ańjomatʼkoa.

³ Raj do tham khunṭi aṛere teṅgokate Probhu Isorakʼ horte calakʼ lạgitʼ goṭa mon ar ontorte uniyakʼ sanam hukumko, ạn-ạriko manao lạgitʼ, metakʼme niạ puthire olakʼ bondobos reakʼ sanam katha manao lạgitʼ Probhu Isor samaṅreye gokʼana. Unre sanam hoṛko hõ raj sãote inạgeko gokʼana.

⁴ Unre raj do Bakʼal debota ar Asera ar sermaren ipilko ńutumte benaoakʼ sanam jinisko Probhu Isorakʼ oṛakʼ khon oḍok giḍikakʼ lạgitʼ maraṅ naeke Hilkiạ, ar huḍiń naekeko ar pahradarkoe hukumatʼkoa. Uni do Jerusalem bahre Kedron soḍokʼ reakʼ bilạn ṭạnḍire onakoe atar giḍikada ar torocʼko do Jerusalemteye idikeda.

⁵ Jihudạ reakʼ nagrahako ar Jerusalem beṛhaeteakʼ than boṭkocʼkore dhup jered lạgitʼ Jihudạren rapajko do boṅga sewawako lạgitʼ okoe naekekoko ojokʼ bahalletʼko, metakʼme okoe do Bakʼal debota, ńindạ cando, siń cando, ipilko, ar sermaren eṭakʼ ipilko ńutumte dhupko jeretʼetʼ tahẽkan onko doe sạṅgiń giḍikatʼkoa.

⁶ Uni do Probhu Isorakʼ oṛakʼ khon Asera muṭhạn hataokate Jerusalem bahre Kedron soḍokʼte idikate onakoe atar giḍikada. Ona tayom onako gunḍạkate ona reakʼ dhuṛi do hoṛkoakʼ topa cetanreye chiṭiạukada.

⁷ Ar Probhu Isorakʼ oṛakʼre herel kusumbikoakʼ okako kandha tahẽkan onako hõe rạputʼ giḍikada. Onḍe do maejiuko Asera lạgitʼ kicricʼko tińetʼkan tahẽkana.

⁸ Josiạ do Jihudạ reakʼ nagraha ar atoko khon sanam naekeye ạguketʼkoa ar Geba khon Berseba hạbicʼ okako than boṭkocʼre onko do dhupko jeretʼetʼ tahẽkan onakoe bhõnḍ ocokeda. Uni do Josuạwakʼ phaṭok-duạrte bolokʼ horre okako than boṭkocʼ tahẽkan onako hõe rạputʼ giḍikada. Niạ phaṭok do nagraha reakʼ maraṅakʼ phaṭok duạr khon leṅga secʼre tahẽkana.

⁹ Than boṭkocʼkoren naekeko do Jerusalem reakʼ Probhu Isorakʼ pinḍre sewa kạmi do bako daṛeakʼ kan tahẽkana, menkhan eṭakʼ eṭakʼ naekeko sãote bin khạmiyanakʼ piṭhạ doko jom daṛeakʼkan tahẽkangea.

¹⁰ Ar Molek debota ńutumte jãhãege nijạrren gidrạko seṅgelre jemon aloko samaṅ daṛeako ona lạgitʼ Josiạ do Ben-Hinom buru nala reakʼ Tophet ńutuman than boṭkocʼ hõe bhõnḍ ocokeda.

¹¹ Jihudạren rapajko oka rãt gạḍiko ar sadomko siń-cando ńutumte samaṅokʼ lạgitʼko emlen Josuạ do onko sadomkoe sạṅgiń giḍikatʼkoa ar rãt gạḍikoe jeretʼ giḍikada. Noko sadom do Probhu Isorakʼ oṛakʼte bolokʼ hor aṛere, tala racare, Nathan-melek ńutuman mitʼṭen gutiyakʼ kandha aṛereko dohoyetʼko tahẽkana.

¹² Raj oṛakʼ reakʼ chatre Ahas rajakʼ kandha ṭhen Jihudạren rapajko okako pinḍko benaoletʼ ar Probhu Isorakʼ oṛakʼ reakʼ banar racare Manase okako pinḍe benaoletʼ Josiạ do onako hõe rạputʼ gejerketʼte Kedron soḍokʼreye giḍikada.

¹³ Jerusalem purub secʼ dhaṅ dhaserakʼ buru reakʼ dạkhin secʼre okako than boṭkocʼ tahẽkan onako hõ uni doe bhõnḍ ocokeda. Israelren raj Solomon do Sedonikoren Astoret debota lạgitʼ, Moabikoren Kemos debota lạgitʼ ar Amonren Melok debota lạgitʼ niạko than boṭkocʼ doe benaoleda.

¹⁴ Josiạ do sewa reakʼ dhiriko hõe rạputʼ gejerkada ar Asera khunṭiko hoẽ makʼ khanḍa khunḍikada ar ona ṭhạ̃ire uni do manwakoakʼ jaṅkoe ḍạṅkada.

¹⁵ Nabatren hopon Jerobiam Israelko cetʼlekae kại ocoyetʼko tahẽkan ar Bethelre oka pinḍ ar than boṭkocʼkoe benaoletʼ Josiạ do onako hõe marao giḍikada. Josiạ do ona than boṭkocʼkoe rạputʼ gejerkeda ar Asera khunṭi do seṅgelreye atarkada.

¹⁶ Ona tayom uni do beṛhaeteye beṅgetʼ ạcurkeda ar buru ṭhen okako topa tahẽkan onḍe khon jaṅkoe ạguketʼte pinḍ cetanreye atarketʼte onae bhõnḍ ocokeda.

¹⁷ Raje menkeda, “Ńelokʼkan hana nisạn do cetʼkana?” Nagraharen hoṛko menkeda, “Ona do Isorren hoṛkoakʼ topa reakʼ cinhạ kana. Uni do Jihudạ khon hecʼkate Bethel reakʼ pinḍ upạrte okae roṛ saḍeletʼ ṭhik onkage am dom kạmiakada.”

¹⁸ Uniye menkeda, “Ona do tahẽ ocoge; ar okoehõ jemon ona reakʼ jaṅko aloko nosṭoe.” Ona iạte hoṛko do ona reakʼ jaṅko ar okoe nạbi Samariạ khone hecʼlen uniyakʼ jaṅko cetʼ leka tahẽkan onageko dohokada.

¹⁹ Samariạ nagraha ar atoko reakʼ than boṭkocʼkore Israelren rapajko okako mundilko benaoletʼte Probhu Isorko khĩs ocolede Josiạ do onako hõe dhaṅ dhaserketʼte Bethel reakʼ than boṭkocʼko lekae hoyocokeda.

²⁰ Josiạ do onako pinḍ cetanrege onḍenko naekekoe gurketʼkoa ar onako cetanre manwakoakʼ jaṅkoe atarkeda. Ar ona tayom uni do Jerusalemteye ruạṛ calaoena.

Josiạ raj do sen parom porobe poroben

²¹ Inạ tayom raj do sanam hoṛko noae hukumatʼkoa, “Bondobos reakʼ puthire cetʼ leka olakan onkage ape do aperen Probhu Isor ńutumte bańcaokʼ porob porobokʼpe.”

²² Israelkoren disạm cakʼlaoko oktere se Israel ar Jihudạren rapajko oktere nonkan bańcaokʼ porob do bako porob akan tahẽkana.

²³ Menkhan Josiạ rajakʼ rajokʼ gel irạlakʼ bochorre Jerusalemre Probhu Isor ńutumte niạ bańcaokʼ porobko porobena.

²⁴ Ona chaḍa okoe do bhutko tulucʼ ar okoe do bạṛicʼ jiuko tulucʼ helmelko dohoyetʼ tahẽkan Josiạ do onko hõe sạṅgiń giḍikatʼkoa. Uni do gharońjren murtiko, boṅgako, Jihudạ ar Jerusalemre oka bạṛicʼakʼ jiniskoe ńelketʼ onako sanamakʼe sạṅgiń giḍikada. Ar naeke Hilkiạ do Probhu Isorakʼ oṛakʼre ạn-ạri reakʼ oka puthiye ńamletʼ ona reakʼ sanam katha jemon ṭhik lekate manao idikʼ ona lạgitʼ Josiạ do noakoe kạmikeda.

²⁵ Uni do acʼakʼ goṭa mon, ontor ar daṛete Mose emakʼ sanam ạn-ạriko leka Probhu Isorakʼ horteye taṛametʼ tahẽkana. Uni lahate se uni tayomte ar okoe rajge uni leka do bako tahẽkana.

²⁶ Enhõ Manase do oka kạmikate Probhu Isore khĩs ocoledete Jihudạ upạrte oka botoranakʼ edreteye jal jalaoen ona khon uni do bae ruạṛlena.

²⁷ Ona iạte Probhu Isore menkeda, “Iń samaṅ khon cetʼ leka Israelkoń sạṅgiń giḍiletʼko onkage Jihudạ hõń sạṅgiń giḍikaea, ar okaṭakʼ nagrahań bachaoan tahẽkan Jerusalem ar ona reaṅ iń menletʼ, ‘ińakʼ tahen oṛakʼ hoyokʼa mente’ ona koejoṅ oṛakʼ doń nihạ̃t giḍikakʼa.”

²⁸ Josiạwakʼ eṭakʼ sanam kạmiko reakʼ katha do “Jihudạkoren rapajkoakʼ Itihãs” ńutumanakʼ puthire ol menakʼa.

²⁹ Josiạwakʼ rajokʼ oktere Misorren Pharao raj Neko do Asurren raj goṛowae lạgitʼ phurạt gaḍa secʼe senena. Unre Josiạ hõ uni teṅgo darame lạgitʼe oḍok calaoena, menkhan Pharao Neko do uni tulucʼe lạṛhạiyente Josiạ do Megidoreye gocʼocoyena.

³⁰ Josiạren lạṛhại phạdko do rãt gạḍire uniyakʼ mạ̃ṛĩko ladeketʼte Megido khon Jerusalemteko ạgukeda ar uniye ṭhik dohoakatʼ topareko baekadea. Tayomte disạmren hoṛko do uniren hopon Jehoahasko ojokʼ bahalkedete uniren apatakʼ jaegareko rajkedea.

Jihudạren raj Jehoahas

³¹ Jehoahas do bargel pe bochor umerre Jihudạren raje hoylena. Uni do Jerusalemre pe cando raje calaokeda. Uniren eṅgatakʼ ńutum do Hamutal tahẽkana; uni do Libna nagraharen Jeremiạren hoponerae tahẽkana.

³² Jehoahas do acʼren hapṛamko leka Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana. Pharao Neko do Hemat disạm reakʼ Riblare uniye aṭok dohokedea jemon uni do Jerusalemre aloe raj daṛeakʼ.

³³ Pharao Neko do pon ṭon rupạ ar pegel are keji sona khajna lekate Jihudạ disạm cetanreye ladeatʼkoa.

³⁴ Ar Josiạren eṭagicʼ hopon Eliakim do uniren apat Josiạ bodolteye rajkedea ar Eliakimakʼ ńutume bodolketʼte Jehoyakime dohoketʼtaea. Pharao Neko do Jehoahas Misorteye idikedea, ar Jehoahas do onḍegeye gocʼena.

³⁵ Pharao Nekowakʼ dạbiteakʼ lekate Jehoyakim do sona ar rupạ uniye emadea. Ar ona emae lạgitʼte disạmren hoṛko cetanre khajnae ladeatʼkoa ar disạmren mimitʼko hõ khajnae ṭhikatʼkote sona ar rupạ do disạmren hoṛko ṭhen khone ạdại hataoketʼa.

Jihudạren Jehoyakim raj

³⁶ Jehoyakim do bargel mõṛẽ bochor umerre raje hoylena. Uni do gelmitʼ bochor Jerusalemre raje calaokeda. Uniren eṅgattetʼakʼ ńutum do Sebida tahẽkana; uni do Ruma atoren Podaeren hoponerae tahẽkana.

³⁷ Jehoyakim do acʼren hapṛamko lekage Probhu Isorakʼ mẽtʼre oka bạṛicʼakʼkan onageye kạmiyetʼ tahẽkana.