2 Rapajko 22 - সান্তালী বাইবেল

Jihudạren Josiạ raj

¹ Josiạ do irạl bochor umerre raje hoylena ar pegel mitʼ bochor Jerusalemre raje calaokeda. Uniren eṅgatakʼ ńutum do Jedida tahẽkana; uni do Baskat atoren Adayaren hoponerae tahẽkana.

² Uni do Probhu Isorakʼ mẽtʼre oka bhageakʼkan onageye kạmiyetʼ tahẽkana ar uniren hapṛam Dạudakʼ hortegeye calakʼkan tahẽkana ar etom se końe secʼ do bae taṛametʼ tahẽkana.

Ạn-ạri reakʼ puthi ńamen

³ Josiạ rajakʼ rajokʼ gel irạlakʼ bochorre uni do Mesulamren goṛomtetʼ koṛa, metakʼme Asaliạ hopon rajren olokʼicʼ Saphan do niạ katha menkate Probhu Isorakʼ oṛakʼteye kolkedeteye metadea,

⁴ “Am do maraṅ naeke Hiskiạ ṭhen calakʼme ar Probhu Isorakʼ oṛakʼre lạgitʼ hoṛkoakʼ ạguakʼ okaṭakʼ ṭaka poesa do horhokoko uṭhạu akatʼ ona reakʼ hisạb jemon ṭhik lekako dohokakʼ.

^5-6 Ar koejoṅ oṛakʼ ńel todarot lạgitʼ okoeko bachao ocoakan ona ṭaka do jemon onkoakʼ tireko jimạkakʼ. Ar Probhu Isorakʼ oṛakʼ ńel todarotko do ona ṭaka jemon chutạr mistriko, oṛakʼ benao mistriko ar raj mistriko onkoakʼ paona lekako emkatako. Ona chaḍa koejoṅ oṛakʼ jut aroe lạgitʼ onko do kaṭ ar mońjte getʼakʼ dhiri jemonko kiriń ạgui.

⁷ Onkoakʼ tire okaṭakʼ ṭaka emakan ona reakʼ hisạb do baṅ emokʼ hoyokʼtakoa, ente onko do pạtiạr salakʼgeko kạmikana.”

⁸ Unre maraṅ naeke Hilkiạ do rajren olokʼicʼ Saphane metadea, “Probhu Isorakʼ oṛakʼre ạn-ạri reakʼ puthiń ńam akada.” Ar Hilkiạ do ona puthi Saphone emade khan uni do onae paṛhaokeda.

⁹ Ona tayom Saphan do ona puthi raj ṭhen idikateye menkeda, “Probhu Isorakʼ oṛakʼre oka ṭaka tahẽkan ona do amren kạmiyạkoko oḍokketʼte Probhu Isorakʼ oṛakʼ reakʼ kạmi ńel todarotkoakʼ tireko jimạ akada.”

¹⁰ Unre olokʼicʼ do niạ katha raje baḍae ocokedea, “Naeke Hilkiạ do mitʼṭecʼ puthiye emakawạdińa.” Ar niạ menkate Saphan do raj onae paṛhao ańjomadea.

¹¹ Ạn-ạri reakʼ puthire oka ol tahẽkan ona ańjomte raj do acʼakʼ kicricʼe oṛecʼketʼtaea.

¹² Uni do naeke Hilkiạ, Saphanren hopon Ahikam, Mikaren hopon Akbor, Saphan ar rajren gokʼṛoyicʼ Asayateko noae hukumatʼkoa,

¹³ “Nokʼõe noa puthi okaṭakʼ ńam akan onare okako katha olakan onako katha reaṅ ape do senkate iń lạgitʼ ar nonḍe ar sanam Jihudạren hoṛko lạgitʼ Probhu Isor ṭhen kulijoṅpe. Probhu Isor do abo upạrte edreteye jal jalao akana, ente aboren hapṛamko do niạ puthi reakʼ katha leka bako taṛamleda ar bako manaoleda ar onare okako katha ol menakʼ ona leka hõ bako kạmileda.

¹⁴ Niạ katha ańjomkate naeke Hilkiạ, Ahikam, Akbar, Saphan ar Asaya do maejiu nạbi Hulda ṭhen senkate uni tulucʼko galmaraokeda. Hulda do kicricʼ khạnḍwạkʼ rurukhiyạicʼ Salumren bạhui tahẽkana. Ar Salum do Harhasren goṛomtetʼ koṛa, metakʼme Tikwaren hopone tahẽkana. Hulda do Jerusalem reakʼ dosar atoregeye girobasokʼ kan tahẽkana.

^15-16 Hulda do uniye metadea, “Israelren Probhu Isor do memene metadińạ, okoe iń ṭhen apeye kolakatʼpe senkate unipe metaea Probhu Isore meneda, ‘Jihudạren raj niạ puthire olakʼ okakoe paṛhao akatʼ ona lekage iń do mitʼke mitʼ muhinko niạ jaega cetanre ar uniren hoṛko cetanreń paṛao ocoya.

¹⁷ Onko do ińko bạgi giḍi akadińạ ar debotako ńutumte dhupko jeretʼetʼ kana ar akoakʼ titeko benao akatʼko sanam murhutʼkote ińko khĩs ocoyediń kana; ona iạte niạ jaega upạrte ińakʼ edre do salgaokʼkan tińạ ar ona do baṅge ĩṛĩjokʼa.’

^18-19 Probhu Isor ṭhen kulijoṅ lạgitʼ okoeye kol akatʼpe uni Jihudạren rajpe metaea, Israelren Probhu Isore meneda, ‘niạ jaega ar uniren hoṛko upạrte okaṭakʼ sarap ar maraokʼ reakʼ kathań roṛ akatʼ ona ańjomte amakʼ mon do kastaokʼkana, amakʼ kicricʼem oṛecʼetʼ tama ar iń samaṅrem rakʼeda. Ar noakom nonka akatʼte iń Probhu Isor do amakʼ koejoṅiń ańjom akada.

²⁰ Ona iạte iń do usạrage amren hapṛamko ṭheniń idimea ar am do suluktem topa ocokʼa. Ar niạ jaega cetanre okako muhiniń paṛao ocoy ona do amakʼ mẽtʼ bae ńela.’ ” Unre onko do Huldawakʼ katha ańjomkate raj ṭhenko ruạṛ calaoena.