2 Rapajko 21 - সান্তালী বাইবেল

Jihudạren Manase raj

¹ Manase do gelbar bochor umerre raje hoylena ar Jerusalemre mõṛẽgel mõṛẽ bochor raje calaokeda. Uniren eṅgatakʼ ńutum do Hephsiba tahẽkana.

² Probhu Isor do Israelko samaṅ khon okoe jạtrenkoe laga ńirletʼko tahẽkan Manase do onko leka hirkhạwakʼko kạmikate Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana.

³ Uniren apat Hiskiạ do okako than boṭkocʼkoe marao giḍiletʼ onako uni do arhõe jut arokeda. Israelren Ahab raj cetʼ lekae cekaletʼ onkage uni hõ Bakʼal debota ńutumte pinḍko ar mitʼṭecʼ Asera khunṭiye benaokeda. Uni do sermaren sanam ipilkoe sewawako kan tahẽkana.

⁴ Okaṭakʼ oṛakʼ reaṅ Probhu Isore menletʼ, “Iń do jaejug hạbicʼ Jerusalemreń tahena,” Probhu Isorakʼ ona oṛakʼre uni do pinḍkoe benaokeda.

⁵ Ar Probhu Isorakʼ oṛakʼ reakʼ banar racarege sermaren ipilko ńutumte adomakʼ pinḍkoe benaokeda.

⁶ Uni do acʼren hopon seṅgelreye samaṅkedea. Uni do maya-biddạkoe beoharetʼ tahẽkana ar cinhạko ńelte tayom daram reakʼ kathakoe guniyetʼ tahẽkana ar okoe do bhutko ar bạṛicʼ jiuko sãote jopoṛaoko dohoyetʼ tahẽkan onko tulucʼe solhayetʼ tahẽkana. Uni do Probhu Isorakʼ mẽtʼre ḍher bạṛicʼakʼ kạmikate uniye khĩs ocoyede tahẽkana.

⁷ Uni do oka Asera muṭhạne benao akatʼ tahẽkan ona do koejoṅ oṛakʼreye dohokeda. Niạ koejoṅ oṛakʼ reaṅge Probhu Isor do Dạud ar uniren hopon Solomone metatʼkin tahẽkana, “Niạ oṛakʼ ar Israelren sanam gusṭiko tala khoniń bachao akawan niạ Jerusalemge iń lạgitʼ jaejug tahen oṛakʼ iń hoeocoya.

⁸ Israelko do eken ińakʼ sanam hukumko joton salakʼko pańjae ar ińren guti Mose okaṭakʼ ạn-ạrikoe emakawatʼko ona lekako calakʼ enḍekhan iń do onkoren hapṛamko okaṭakʼ disạmiń emakatʼko ona disạm do bạgiyakʼ ar baṅ hoyokʼtakoa.”

⁹ Menkhan hoṛko do ona katha bako ańjomleda. Manase do bạṛicʼ horteye ạyurketʼkoa; ar Probhu Isor do okoe jạtrenko Israel hoponko samaṅ khone marao giḍiletʼko onko khon hõ ḍher bạṛicʼakʼe kạmikeda.

¹⁰ Unre Probhu Isor do acʼren gutiko, metakʼme nạbiko hotete niạ kathae menkeda,

¹¹ “Jihudạren raj Manase do niạko bạṛicʼakʼe kại akada. Uni lahate okoe Amorikoko tahẽkan uni do onko khonhõ artetʼ bạṛicʼe kạmi akada ar acʼren boṅga murhutʼko hotete Jihudạ do kại secʼe ạyur idiakadea.

¹² Onate iń Israelren Probhu Isoriń meneda, iń do usạrage Jerusalem ar Jihudạ cetanre nonkan muhiniń ạguiya, ar ona reakʼ katha okoeko ańjoma onko sanamgeko thar tharaokʼa.

¹³ Samariạ upạrte okaṭakʼ sosoṅakʼ baber ar Ahabakʼ bõsko upạrte okaṭakʼ sạhul baberiń beoharletʼ onage iń do Jerusalem upạrteń beohara. Cetʼ leka thạri bạṭiko gasao mańjao onkage iń do Jerusalemiń mańjao saphaea ar hạrupʼkateń dohokakʼa.

¹⁴ Ińren hoṛkoren sarecʼ hĩsko doń bạgi oṭoakoa ar bạirikoakʼ tireń jimạkoa. Onkoren sanam bạiriko do onkoakʼko luṭtakoa ar jotowakʼ jor julumkateko idiy takoa,

¹⁵ ente ińakʼ mẽtʼre oka bạṛicʼakʼkan onage onko doko kạmi akada ar oka hilokʼ onkoren hapṛamko do Misor khonko oḍok hecʼlen enhilokʼ khon teheń hạbicʼ onko do ińko khĩs ocoakadińạ.”

¹⁶ Inạ chaḍa Manase do bin dusạn hoṛkoakʼ mãyãm nunạkʼe joro ocoakada je, ona mãyãmte Jerusalem reakʼ mitʼ simạ khon eṭakʼ simạna hạbicʼ perecʼlen tahẽkana. Uni do Jihudạren hoṛkoe kại ocoletʼkote onko do Probhu Isorakʼ mẽtʼre oka bạṛicʼakʼ kan onageko kạmiyetʼ tahẽkana.

¹⁷ Manaseakʼ eṭakʼ sanam kạmiko reakʼ ar uniyakʼ kại reakʼ kathako do “Jihudạ rapajkoakʼ Itihãs” ńutumanakʼ puthire ol menakʼa.

¹⁸ Tayomte Manase do acʼren hapṛamko ṭhene senena ar uni do raj oṛakʼ reakʼ bagwanre, metakʼme Usakʼ bagwanreko topakadea. Ar uniyakʼ jaegare uniren hopon Amon do raje hoyena.

Jihudạren Amon raj

¹⁹ Amon do bargel bar bochor umerre raje hoylena. Ar Jerusalemre bar bochor raje calaoketʼa. Uniren eṅgatakʼ ńutum do Mesulemet tahẽkana; uni do Jotba atoren Harusren hoponerae tahẽkana.

²⁰ Amon do acʼren apat Manase lekage Probhu Isorakʼ mẽtʼre oka bạṛicʼakʼkan onageye kạmiyetʼ tahẽkana.

²¹ Acʼren apattetʼ oka horteye taṛametʼ tahẽkan uni hõ inạ hortegeye taṛamkeda; acʼren apattetʼ okoe murhutʼkoe sewawako kan tahẽkan uni hõ onkogeye sewawatʼkoa.

²² Uni do acʼren hapṛamkoren Probhu Isore bạgiyade tahẽkana ar uniyakʼ horte hõ bae senokʼkan tahẽkana.

²³ Amonren kạmiyạko do uni upạrteko soṛojontroketʼte raj oṛakʼrege uniko khũnkedea.

²⁴ Menkhan okoe do Amon raj upạrteko soṛojontroletʼ disạmren hoṛko do onko jotoko gocʼketʼkoa ar uniren hopon Josiạ do uniyakʼ jaegareko rajkedea.

²⁵ Amonakʼ eṭakʼ sanam kạmiko reakʼ katha do “Jihudạ rapajkoakʼ Itihãs” ńutumanakʼ puthire ol menakʼa.

²⁶ Ar Usakʼ bagwanre acʼ lạgitʼ ṭhik dohowakatʼ topare uni doko topakadea. Ar uniyakʼ jaegare uniren hopon Josiạ do raje hoyena.