2 Rapajko 20 - সান্তালী বাইবেল

Hiskiạ rajakʼ ruạ

¹ Onako dinre Hiskiạ do gujukʼ dạkhile ruạ kạhil akan tahẽkana. Unre Amosren hopon Jesaea nạbi do uni ṭhen senkateye menkeda, “Probhu Isore meneda, am do amakʼ oṛakʼ duạr sạriạutam, ente am dom gujukʼgea, ar bam bogekʼa.”

² Niạ katha ańjomkate Hiskiạ do bhit secʼ samaṅkate Probhu Isor ṭhene koekeda,

³ “E Probhu Isor, disạime baṛe, am samaṅre oka leka pạtiạrạnicʼ iń tahẽkana ar goṭa ontorte am botoram tulucʼ iń dãṛãnkan tahẽkana ar amakʼ mẽtʼre oka ṭhikakʼkan onageń kạmiyetʼ tahẽkana.” Ar niạ menkate Hiskiạ do hũk hũke rakʼkeda.

⁴ Ar Jesaea do raj oṛakʼ reakʼ tala raca ạuriye paromokʼrege uni ṭhen Probhu Isorakʼ niạ katha sodorena,

⁵ “Am do ruạṛ senkate ińren hoṛkoren mukhiyạ Hiskiạm metaea, amren hapṛam Dạudren Probhu Isor do niạ kathae meneda, ‘iń do amakʼ koejoṅiń ańjom akada ar amakʼ mẽtʼ dakʼ iń ńelakada. Iń do amiń bogemea. Ar ńitokʼ khon pe din hilokʼre am do Probhu Isorakʼ oṛakʼtem calakʼa.

⁶ Amakʼ bahaokʼ din do arhõ gelmõṛẽ bochor iń juṭucʼatʼtama. Ar Ạsurren rajakʼ ti khon niạ nagraha hõń rukhiyạya. Iń lạgitʼ ar ińren guti Dạud lạgitʼ noa nagraha doń rukhiyạigea.’ ”

⁷ Jesaeae menkeda, “Loa piṭhạ ạguiype.” Hoṛko do onako ạguketʼ khan Hiskiạwakʼ bis phoṛareko thopramadea, adoe bes utạrena.

⁸ Hiskiạ do Jesaea nạbiye kulikedea, “Probhu Isor ińe bogeyiń ar pe din hilokʼte Probhu Isorakʼ oṛakʼteń sen daṛeakʼ reakʼ cinhạ do cetʼkana?”

⁹ Jesaea doe roṛ ruạṛkeda, “Probhu Isor acʼakʼ gokʼake dohoy ona lạgitʼ uni do mitʼṭecʼ cinhại dohoya. Onate ma lạime, umul do cetʼ gel dhap lahakʼ se gel dhap tayomokʼa?”

¹⁰ Hiskiạ doe menkeda, “Umul gel dhap lahakʼ do algagea, bickom ona do gel dhap tayom ocoyme.”

¹¹ Unre Jesaea nạbi do Probhu Isore hohoade tahẽkana. Onate Ahasakʼ siṛhi khon umul do tinạkʼ dhap pheḍ hecʼlen Probhu Isor do ona khon gel dhape tayom ocokeda.

Babelren paṭhaonako

¹² Unre Babel raj Baladanren hopon Merodak Baladan do Hiskiạwakʼ ruạ kạhil akan reakʼ khobore ańjomketʼ khan uni ṭhen ciṭhi ar sandeskoe kolkeda.

¹³ Hiskiạ do kusite onko goḍetkoe ataṅ aderketʼkoa ar acʼakʼ sanam khajańci oṛakʼ, sona, rupạ, jut so mosola, daman sunumko, khanḍa bhanḍako ar murạikoe udukʼatʼkoa. Hiskiạwakʼ raj oṛakʼre se uniyakʼ rajosṭire nonkan cetʼge baṅ tahẽkana one okaṭakʼ do bae udukʼ akawatʼko.

¹⁴ Unre Jesaea nạbi do Hiskiạ raj ṭhen senkateye kulikedea, “Onko hoṛko do cetʼko menkeda, ar oka khonko hecʼlena?” Hiskiạ doe menkeda, “Onko do sạṅgiń disạm, Babel khonko hecʼlena.”

¹⁵ Nạbi do uniye kulikedea, “Onko do amakʼ raj oṛakʼre cetʼ cetʼko ńelkeda?” Hiskiại menkeda, “Ińakʼ raj oṛakʼ reakʼ sanamakʼge onko doko ńelkeda. Ińakʼ khajańci oṛakʼre nonkan cetʼge bạnukʼa one okaṭakʼ do bạń udukʼ akawatʼko.”

¹⁶ Unre Jesaea do Hiskiại metadea, “Probhu Isor okae menetʼ ona ańjomme.

¹⁷ Probhu Isore meneda, nonkan din hijukʼa tinre amakʼ raj oṛakʼ reakʼ sanamakʼ ar amren hapṛamkoko jogao dohoakatʼte teheń hạbicʼ menakʼ onako jotoge Babelte idi ocokʼa, cetʼge baṅ bạgi oṭokʼa.

¹⁸ Amren adom bõsko, amren hoponko, okoe dom janam akatʼko onko do Babel rajakʼ oṛakʼre mạ̃yạ̃ṛi akae tahẽkate sapʼ sosor kạmiko kạmiya.”

¹⁹ Hiskiại roṛ ruạṛkeda, “Probhu Isorakʼ oka katham menketʼ ona do bhagegea.” Uni do niạ kathae menkeda, enteye hudisleda acʼakʼ jion bhor hoedaṛeakʼa suluk ar nirạiteye tahẽdaṛeakʼa.

²⁰ Hiskiạwakʼ eṭakʼ kạmiko ar lạṛhạire jitạukʼ reakʼ kathako ar cetʼlekate uni do pukhri ar suṛoṅgoko benaokate nagrahare dakʼe ạguletʼ ona do “Jihudạ rapajkoakʼ Itihãs” ńutumanakʼ puthire ol menakʼa.

²¹ Tayomte Hiskiạ doe gocʼena ar uniyakʼ jaegare uniren hopon Manase do raje hoyena.