2 Rapajko 19 - সান্তালী বাইবেল

Jerusalem rukhiyạkʼ reakʼ nạbi katha

¹ Hiskiạ raj do niạ kathae ańjomketʼ khan acʼakʼ kicricʼe oṛecʼketʼtaea ar gõṛẽ kicricʼe horokʼketʼte Probhu Isorakʼ oṛakʼteye boloyena.

² Uni do raj oṛakʼren mukhiyạ Eliạkim, rajren olokʼicʼ Sibna, naekeko ar mukhiyạko gõṛẽ kicricʼko horokʼ akatʼge Amasren hopon Jesaea nạbi ṭhene kolkatʼkoa.

³ Onko do Jesaeako metadea, “Hiskiạ do nonkae meneda, teheńakʼ din do gạr, nisṛạu ar opoman reakʼ din kana. Aleakʼ dosa do nonka lekage hoyakantalea je, gidrạkole janamko lạgidokʼ kana menkhan janamko reakʼ daṛe do bạnukʼtalea.

⁴ Ạsurren raj do jiwetʼ Isor nisṛạue lạgitʼ Rabsakeye kolakadea menkhan amren Probhu Isor do hoedaṛeakʼa onako sanamakʼ katha ańjomkate uniye sạjạiyea. Onate am do onko lạgitʼ koeme okoe do ńit hạbicʼ jiwetʼ menakʼko.”

^5-6 Hiskiạ rajren kạmiyạko do tinre Jesaea nạbi ṭhenko hecʼena unre Jesaea do onkoe metatʼkoa, “Aperen kisạ̃ṛpe metaea, Probhu Isore meneda, ‘okaṭakʼem ańjomakatʼ, metakʼme Ạsur rajren gutiko iń upạrte oka henosta kathako roṛ akatʼ onate am do alom botorokʼa.

⁷ Ańjomme, iń do unire mitʼṭecʼ jiuiń kolea ar onate uni do mitʼṭecʼ sombate ańjoma ar acʼakʼ disạmteye ruạṛ calakʼa ar iń do onḍege tarwaṛeteń makʼ gojea.’ ”

Ạsurrenko do Israelko botorko udukʼako kan

⁸ Rabsake doe ańjomkeda, Ạsurren raj do Lakis bạgikate Libna upạrteye lạṛhại kana. Ona iạte uni hõ onḍeye calaoena.

⁹ Ạsurren raj Senakerib doe ańjomkeda, Kus disạmren Tirhak raj do acʼ upạrte lạṛhại lạgitʼe oḍok hecʼakana. Onate uni do goḍet kolkate Hiskiạ ṭhene roṛ gotʼkada,

¹⁰ “Ape do Jihudạren raj Hiskiạ nonka metaepe, ‘okoe cetanrem bhorsakʼkan uni Isor doe meneda, Ạsurren rajakʼ tire Jerusalem do baṅ soprotokʼa. Uniyakʼ ona eṛe kathate am do alom bulạu ocokʼa.

¹¹ Ạsurren raj do eṭakʼ eṭakʼ disạmko cetʼlekae marao giḍiakatʼ ona do khạṭigem ańjom akada; enḍekhan cekate am dom hudiseda onam rukhiyạ daṛeakʼa mente?

¹² Ińren hapṛamko do okoe jạtren hoṛko marao giḍiletʼko onkoren debotako, metakʼme Gosan, Haran, Reseph ar Telasarreko girobasokʼkan Edonren debotako do cetʼ onkoko rukhiyạ daṛeatʼko tahẽkana?

¹³ Hamatren raj, Arpadren raj, Sepharwayim nagraharen raj se Hena ar Ibahren raj doko okayena? ”

Hiskiạwakʼ koejoṅ

¹⁴ Hiskiạ do goḍetkoakʼ ti khon ciṭhi hataokateye paṛhaokeda. Ona tayom uni do Probhu Isorakʼ oṛakʼte bolokate Probhu Isor samaṅre ciṭhiye samaṅkeda.

¹⁵ Ar Hiskiạ do Probhu Isor ṭhen noae koekeda, “E Probhu Isor Israelkoren raj, am do Kerubkin talarem tahẽnkana, ar am eskarge dhạrtiren sanamakʼ rajosṭiren Isor kanam. Am do serma ar otem benao akada.

¹⁶ E Probhu Isor, luturakʼ tińme; ar amakʼ mẽtʼ baṛe beṅgedtam, ńelme; jiwetʼ Isor henostawae lạgitʼ Senakerib do cetʼko kathae roṛetʼkana ona ańjomme.

¹⁷ E Probhu Isor, noa katha do sạrikana, Ạsurren rapajko do noko jạtrenko ar onkoakʼ disạmko marao giḍiakada.

¹⁸ Onkoren debotako do seṅgelre giḍikateko nosṭo caba akatʼkoa. Onko do Isor doko baṅkana, onko do manwa tite benaoakʼ eken kaṭ ar dhiri kanako; ona iạtege onko doko marao giḍi daṛeatʼko tahẽkana.

¹⁹ E aleren Probhu Isor, de ńitokʼ Ạsurren rajakʼ ti khon rukhiyạleme, jemon dhạrtiren sanam rajosṭirenko baḍae daṛeakʼ, am eskarge Probhu do ar amkangeam Isor do .”

Jesaea reakʼ nạbi katha

²⁰ Unre Amosren hopon Jesaea do Hiskiạ ṭhen niạ kathae kolkeda, “Israelren Probhu Isore meneda, Asurren raj Senakerib reaṅ amakʼ koejoṅ do uniye ańjom akada.

²¹ Uni upạrte Probhu Isore meneda, ‘Kũạri kuṛi Sion am doko nisṛạumea arko landa-dhutʼama. Jerusalemren hoṛko do am tayomre bohokʼko rukuya.

²² Am do okoeyem henosta akadea? Ar okoe upạrte opoman reakʼ katham roṛeda? Am do okoe upạrtem kikiạukʼ kana ar okoe cetantem beṅgetʼ parom akada? Am do Israelren uni sonoticʼ upạrtege noakom nonka akada.

²³ Amren golamko hotete Probhu Isor dom landa-dhutʼae kana, amakʼ sanam rãt gạḍikoante bururem decʼakana, Lebanon reakʼ usul utạrakʼ cuṛạrem rakapʼ akana, ar ona reakʼ usul usul debdạru ar bhage bhage saro darekom makʼ giḍiakada, ar ona reakʼ bir bhitrikorem boloakana,

²⁴ Uprikoakʼ jaegare do kuńem la akada ar onḍenakʼ dakʼem ńũ akada. Amakʼ jaṅgate am do Misor reakʼ gaḍakom lebetʼ rohoṛakada.

²⁵ Am do cetʼ bam ańjomakada, ḍher din laha khonge ona doń niṭakatʼ tahẽkana mente, ar ḍher din laharege ona reakʼ iń goṭa dohoakada? Ńitokʼ do onań hoyocokeda. Ar onatege pạcrite esetʼ nagrahako do dhiri puńjirem hoyocoakada.

²⁶ Onḍenko hoṛ doko nijor akana ar ạḍi bạṛicʼko botor akana arko lajao akana. Onko do khet reakʼ ghãs leka, omon rakapʼ akan hạriạṛ gạchi leka, chad cetanre janam akan ghãs leka ạuri hara rakabokʼregeko tolmojokʼ kana.

²⁷ Menkhan am do okarem tahenkana ar tinrem hijukʼ kana arem calakʼ kana ar cedakʼ iń upạrtem raṅgaokʼkana ona jotogeń baḍaea.

²⁸ Am do iń upạrtem edre akana ar amakʼ bạḍại reakʼ katha do ińakʼ luturre hecʼakana onate iń do mureń nakolmea ar mocareń jhinmea; ar oka hortem hecʼakan ona hortegeń ruạṛ gotʼkama.’

²⁹ “E Hiskiạ, am lạgitʼ cinhạ do nõkʼõe: nes acʼte oka janamokʼ onape joma, ar kalom ona khon oka janamokʼ onage jompe. Menkhan satom do itạpe era ar phosolpe ira ar darkha bagwan benaokate ona reakʼ jope joma.

³⁰ Jihudạ gusṭiren okoeko hoṛ do unhạbicʼ jiwetʼko tahen onko do ar mitʼ dhaoko jo bahakʼa. Ar dare leka latar secʼko rehedokʼa ar cetan secʼ doko jo bahakʼa.

³¹ Ar sarecʼ hoṛko do Jerusalem khonko oḍokokʼa ar sion buru khon do rukhiyạko ńamakatʼ mitʼ dol hoṛko hijukʼa. Phạdkoren Probhu Isorakʼ ãṭ do onageye hoeocoya.

³² “Ona iạte Ạsurren raj reaṅ Probhu Isor do niạ kathae meneda, ‘Uni do niạ nagrahate bae bolokʼa se nonḍe do mitʼṭecʼ sar hõ bae aṛaga. Ar ḍhalante niạ samaṅte bae hijukʼa se gherao esetʼkate dejokʼ ar pheḍokʼ lạgitʼ jãhãnakʼge bae benaojoṅa.

³³ Uni do okaṭakʼ horteye hecʼakan ona hortegeye ruạṛ calakʼa; niạ nagrahare do bae bolokʼa. Iń Probhu Isorge niạ katha doń meneda.

³⁴ Iń do ińren ar ińren guti Dạud lạgitʼ niạ nagrahań esetʼ ạcura ariń rukhiyạya.’ ”

³⁵ Enhilokʼ ńindạ Probhu Isorren goḍet do oḍok senkate Ạsurrenkoakʼ ḍeraren mitʼ lakh irạlgel mõṛẽ hajar hoṛe gocʼketʼkoa. Dosar hilokʼ setakʼre hoṛko do tinreko beretʼena unre sanam jaegare mạ̃ṛĩko ńelkeda.

³⁶ Onate Ạsurren raj Senakerib do acʼren lạṛhại phạdanteye ruạṛ calaoena ar Niniwi nagrahare senkateye tahẽyena.

³⁷ Mitʼdin Senakerib do acʼren debota Nisrokakʼ mundilreye dewa sewayetʼkan tahẽkanre Adramelek ar Sareser ńutuman uniren hoponkin do onḍe bolokate tarwaṛete unikin gocʼkedea ar Ararat disạmtekin dạṛkeda. Ar uniren hopon Esarhadon do raje hoyena.