2 Rapajko 18 - সান্তালী বাইবেল

Jihudạren Hiskiạ raj

¹ Elaren hopon Israelren raj Hoseawakʼ rajokʼ tesar bochorre Jihudạren raj Ahasren hopon Hiskiạ do rajokʼe ehopʼena.

² Uni do bargel mõṛẽ bochor umerre raje hoylena ar Jerusalemre bargel are bochor raje calaokeda. Uniren eṅgatakʼ ńutum do Abi tahẽkana; uni do Sakariạren hoponerae tahẽkana.

³ Hiskiạ do acʼren hapṛam Dạud lekage Probhu Isorakʼ mẽtʼre oka bhageakʼkan onageye kạmikan tahẽkana.

⁴ Uni do than boṭkocʼkoe maraokeda, ar sekʼwa dhirikoe rạputʼ giḍikada ar Asera khunṭikoe makʼ rạputʼkada. Ar Moseye benaolede pitạlren biń hõe rạputʼ khanḍa khunḍikedea, ente Israelko do un hạbicʼ hõ uni biń ńutumte dhupko jeretʼetʼ tahẽkana. Pitạlren bińakʼ ńutum do Nehustan tahẽkana.

⁵ Hiskiạ do Israelren Probhu Isor cetanreye jamaṛ akane tahẽkana. Uni lahate ar uni tayomte Jihudạren rapajko modre uni leka do ar okoege bako tahẽkana.

⁶ Uni do Probhu Isorre sapʼ kajak akane tahẽkana ar jao okte uniyakʼ horteye taṛametʼ tahẽkana. Probhu Isor do Mose okae hukumade tahẽkan onage uni doe manao idiyetʼ tahẽkana.

⁷ Probhu Isor do uni são sãoteye tahenkan tahẽkana. Ar jãhãnakʼgeye kạmiyetʼ tahẽkan onaregeye jo bahakʼkan tahẽkana. Asurren raj upạrte hulkate uni do golam ar bae khaṭaolena.

⁸ Gasa ar onako ṭoṭha talare Philisṭiko okakoreko girobasokʼ kan tahẽkan uni do onkoe akromonketʼkoa are bhagaoketʼkoa.

⁹ Hiskiạ rajakʼ rajokʼ ponakʼ bochorre, metakʼme Elaren hopon Israelren raj Hoseawakʼ rajokʼ eaeyakʼ bochorre Asurren raj Salmaneser do Samariạ upạrte lạṛhại lạgitʼe rakapʼ calaoente nagrahae gherao ạcurkeda.

¹⁰ Pe bochor gherao esetʼ tayom Hiskiạwakʼ rajokʼ turui bochorre ar Israelren raj Hoseawakʼ rajokʼ areakʼ bochorre Asurrenko do Samariạko hatkeda.

¹¹ Ar Asurren raj do Israelkoe bondiketʼkote Asur disạmteye idiketʼkoa ar Halare ar Habor gaḍa aṛe reakʼ Geson ṭoṭha ar Medekiạkoakʼ nagrahakoreye girobas ocoketʼkoa.

¹² Noako do hoylena, ente onkoren Probhu Isorakʼ katha onko do bako manaoleda, bickom uniyakʼ bondobos, metakʼme Probhu Isorren guti Moseyakʼ sanam hukumko bako bataoleda. Onko do onako hukum reakʼ katha lutur hõ bako luturada ar manao hõ bako manaoleda.

Senakerib do Jerusalem upạrteye teṅgon kan

¹³ Hiskiạ raje rajokʼ gelponakʼ bochorre Asurren raj Senakerib do Jihudạ reakʼ pạcrite esetʼ sanam nagrahakoe akromonketʼte onakoe hatkeda.

¹⁴ Unre Jihudạren Hiskiạ raj do Lakisre Asurren raj niạ kathae roṛ gotʼadea, “Iń doń behok akada. Am do ruạṛ calakʼme. Ar iń ṭhen okam khoj onageń emama.” Onate Asurren raj do Jihudạren Hiskiạ raj ṭhen khon gelbar ṭon rupạ ar mitʼ ṭon khon hõ ḍher sonae khojkeda.

¹⁵ Onate Hiskiạ do Probhu Isorakʼ oṛakʼ ar rajakʼ khajańci oṛakʼre tinạkʼ rupạ tahẽkan jotoge uniye emadea.

¹⁶ Jihudạren raj Hiskiạ do Probhu Isorakʼ oṛakʼ reakʼ silpińko ar duạr reakʼ kobjako oka do sonate tol tahẽkan unre ona raṛakate Asurren raje emadea.

¹⁷ Asurren raj do Lakis khon Tartan, Rabsari ar Rabsaki noko pene hoṛ do maraṅ utạr lạṛhại phạdkoante Jerusalemren raj Hiskiạ ṭhene kolkatʼkoa. Onko do Jerusalemte senkate dhubi ṭạnḍi reakʼ ḍahar aṛe usul jaega reakʼ pukhri sãote joṛao akatʼ dakʼ nala ṭhenko teṅgoyena.

¹⁸ Onko do rajko hohoade khan raj oṛakʼren mukhiyạ do Hilkiạren hopon Eliakim, rajren olokʼicʼ Sibna ar Itihãs olokʼicʼ Asaphren hopon Joa noko pene hoṛ do oḍok hecʼente onko ṭhenko senena.

¹⁹ Unre Rabsake do onkoe metatʼkoa, “Hiskiạ do noa kathape metaea, Asurren raj maharaje meneda, ‘am do cetʼ cetanrem bhorsakʼ kana?

²⁰ Am do lạṛhại reakʼ bud ar daṛe menakʼtama mentem hudis joṅkan, khan noako do amakʼ luṭi reakʼ katha kana. Ar okoe cetanrem bhorsakʼkante iń upạrtem huhul kana?

²¹ Am do ona loṭocʼ pạṭiol ṭheṅga, metakʼme Misor cetanrem bhorsakʼ kana. Okoe ona pạṭiol ṭheṅga cetanreye bhorsakʼkan uni do ti pạṭi tabokʼtaea. Ar Misorren raj Pharao cetanre okoeye bhorsakʼ uni cetanre hõ onkage hoyokʼa.’

²² Menkhan aperen Probhu Isor cetanrepe bhorsakʼ kana mentepe mitạń, enḍekhan uni do cetʼ uni Isor doe baṅkana one uniyakʼ than boṭkocʼko ar pinḍko Hiskiạ doe marao giḍiakatʼtae ar one Jihudạ ar Jerusalemren hoṛkoe metakokan Jerusalem reakʼ pinḍ samaṅrege dewa sewae hoyokʼtakoa mente?

²³ “Ape do iń hũyạte aperen raj arhõ metaepe, ‘daṛeakʼ khanem ińren kisạ̃ṛ Ạsurren raj sãote niạ bạji dohoyme, uni do bar hajar sadomkoe emama ar am do onkore dejokʼ lekan hoṛ emokʼme.

²⁴ Ar ona hõ bam daṛeakʼ khan ińren kisạ̃ṛren huḍiń utạricʼ do cekatem tạkicʼ daramea, am do Misor reakʼ rãt gạḍi ar aswariko cetanrem bhorsakʼ kana?

²⁵ Ona chaḍa iń do cetʼ Probhu Isor ṭhen khon begor hukum hataokate niạ jaega akromon lạgitʼ iń rakapʼ hecʼakana? Niạ disạm upạrte lạṛhạikate ona marao lạgitʼ Probhu Isor do acʼge ińe menakawạdińa.’ ”

²⁶ Unre Hiskiạren hopon Eliakim ar Sibna ar Joa do Rabsakiko metadea, “Amren golamko ṭhen dayakate Arami pạrsite katha roṛme, ente ale do onale bujhạu daṛeakʼa. Pạcri cetanren hoṛko samaṅre Ibri pạrsite do alom metalea.”

²⁷ Menkhan Rabsake doe roṛ ruạṛkeda, “Ińren kisạ̃ṛ do cetʼ eken aperen kisạ̃ṛ kanae ar ape ṭhen niạko katha lại lạgitʼe kol akadińạ? Pạcri cetanre duṛupʼ akan noko hoṛko, okoe ape leka akoakʼ pạikhana ar putu jojom hoyokʼtako onko ṭhen hõ cetʼ bae kol akadińạ?”

²⁸ Ona tayom Rabsake do teṅgoyente ãṭ aṛaṅte Ibri pạrsiteye menkeda, “Ape do maraṅ rajakʼ, metakʼme Asurren rajakʼ katha ańjompe.

²⁹ Maharaj do nonkae menetʼkana, Hiskiạ do alo jemone eṛepe. Uni do uniyakʼ ti khon bae rukhiyạ daṛeapea.

³⁰ Hiskiạ do nonka menkate Probhu Isorre aloe bhorsa ocope ma, ‘Probhu Isor do khạṭige apeye bańcaopea; ar niạ nagraha do Ạsurren rajakʼ tire bae jimạkakʼa.’

³¹ “Ape do Hiskiạwakʼ katha alope ańjoma. Ạsurren raje meneda, ‘ape do iń tulucʼ sulukokʼpe ar iń ṭhen oḍok hijukʼpe. Enḍekhan ape do uniyakʼ darkha bagwan reakʼ jo ar loa dare reakʼ jope joma ar apnarakʼ kuń khon dakʼpe ńũiya.

³² Ona tayom hecʼkate apeakʼ nij disạm leka ar mitʼ disạmteń idipea. Ona disạm do hoyokʼkana anaj ar nãwã darkha rasa ạtukʼ disạm, piṭhạ ar darkha bagwan reakʼ disạm, jạitun ar dumur rasa reakʼ disạmtege. Ar ińakʼ katha lekape kạmi enḍekhan ape do bape gujukʼa bickom jiwetʼpe tahena. ‘Hiskiạ tinreye mena Probhu Isor do apeye rukhiyạpea, unre uniyakʼ katha do alope ańjomtaea, ente ona katha menkate uni doe ạnḍicʼetʼpea.

³³ Eṭakʼ jạtren jãhãn debota do cetʼ Asurren rajakʼ ti khon acʼakʼ disạme rukhiyạ daṛe akada?

³⁴ Hamat ar Arphadren debotako doko okayena? Ar Sepharwayimren, Hena ar Ibaren debotako do okare menakʼkoa? Onko do cetʼ ińakʼ ti khon Samariạko rukhiyạ daṛe akawada?

³⁵ Niạko disạmren sanam debotako talare jãhãege cetʼ ińakʼ ti khon apnarakʼ disạmko rukhiyạ daṛeakada? Enḍekhan Probhu Isor do cekate ińakʼ ti khon Jerusaleme rukhiyạ daṛekea?’ ”

³⁶ Menkhan hoṛko do hapegeko tahẽyena, cetʼge bako roṛ ruạṛleda, ente Hiskiạ raj do jãhãnakʼ roṛ ruạṛe baronletʼkoa.

³⁷ Inạ tayom raj oṛakʼren mukhiyạko do Hiskiạren hopon Eliakim, rajren olokʼicʼ Sibna ar Itihãs olokʼicʼ Asaphren hopon Joa noko do akoakʼ kicricʼko oṛecʼketʼte Hiskiạ ṭhenko ruạṛ calaoena ar Rabsake cetʼkoe roṛketʼ ona jotowakʼko lạiyadea.