2 Rapajko 17 - সান্তালী বাইবেল

Israelren mucạtʼ raj Hosea

¹ Jihudạren raj Ahasakʼ rajokʼ gelbar bochorre Elaren hopon Hosea do Samariạre Israelren raje hoyena. Uni do are bochor raje calaokeda.

² Uni do Probhu Isorakʼ mẽtre oka bạricʼakʼ kan onageye kạmikan tahẽkana, menkhan Israelren lahatenko raj leka do bae kạmileda.

³ Asurren raj Salmaneser do Hosea akromone lạgitʼe rakapʼ hecʼena. Ar onate Hosea do Salmaneser taberen raje hoyena ar uni khajna emaye ehopʼena.

⁴ Menkhan Asurren raj doe baḍaekeda, Hosea do mitʼṭen badmas hoṛkanae mente, ente uni do Misorren raj So ṭhen goḍetkoe kolletʼkoa ar Asurren raj do jao bochor oka khajnae emaekan tahẽkan ona do ar bae emokʼkana. Ona iạte Salmaneser do Hoseae sapʼkedete hajotreye bhoraokedea.

⁵ Asurren raj do goṭa disạme akromonketʼte Samariạteye senena ar pe bochor bhor onae gherao dohokada.

⁶ Hoseawakʼ rajokʼ areyakʼ bochorre Asurren raj do Samariạ hatkate Israelko Asurteye bondi idiketʼkoa. Uni do Halare, Haber gaḍa aṛe Gosan ṭoṭhare ar Mediạkoakʼ nagrahakoreye girobas ocoketʼkoa.

Kại gunạkʼte Israelkoakʼ ńurokʼ

^7-8 Noako hoylena, ente Misor khon, Misorren raj Pharaoakʼ gobol khon okoe do onkoe oḍok ạguletʼko Israelko do akoren uni Probhu Isor upạrteko kạiletʼ tahẽkana. Onko do debotakoko sewawako kan tahẽkana ar onko samaṅ khon Probhu Isor do okoe jạtrenkoe laga ńirletʼko tahẽkan onko lekako taṛametʼ tahẽkana. Ona chaḍa Israelren rajko oka ạri cạliko benao oṭoletʼ ona lekageko calakʼkan tahẽkana.

⁹ Israelko do hape hapete Probhu Isor upạrte ạḍi bạṛicʼko kạmiyetʼ tahẽkana. Ar okako jaegakoreko girobasokʼ kan tahẽkan onako nagraha baṅ do huḍińakʼ kan baṅ do maraṅakʼkan ona jaegakore ako lạgitʼ than boṭkocʼko benaojoṅ kan tahẽkana.

¹⁰ Onko mimitʼko do usul buru cetanre ar hạriạṛ dare buṭạ latarkore dhiriko ar Asera khunṭiko bạisạu joṅkan tahẽkana.

¹¹ Probhu Isor do okoe jạtrenko onko samaṅ khone laga ńirletʼko onko leka noko hõ than boṭkocʼkore dhupko jeretʼetʼ tahẽkana. Ona chaḍa onko do arhõ bạṛicʼakʼ kạmikate Probhu Isorko khĩs ocoyede tahẽkana.

¹² Onko do boṅga murhutʼkoko sewawako kan tahẽkana, menkhan Probhu Isor do onakoe baron letʼkorehõ onko do onageko kạmikan tahẽkana.

¹³ Probhu Isor do acʼren sanam nạbiko ar ńeńelko hotete Israelko ar Jihudiko niạ menteye sontorletʼkoa, “Apeakʼ bạṛicʼakʼ hor khon ruạṛokʼpe ar sanam ạn-ạriko okaṭakʼ do aperen hapṛamko manao lạgitʼ iń ematʼko tahẽkan ar ińren gutiko, metakʼme nạbiko hoteteń baḍae ocoakatʼpe ona lekage ińakʼ sanam hukumko ar niạmko manaope.”

¹⁴ Menkhan onko do ona katha bako luturada. Onkoren hapṛamko okoe do akoren Probhu Isor ṭhen bako ṭehãḍokʼkan tahẽkan, onko lekage monko keṭecʼketʼ takoa.

¹⁵ Onko do uniyakʼ joto niạm, onkoren hapṛamko lạgitʼ bandhaoakʼ uniyakʼ bondobos ar onko ṭhen uniyakʼ emakʼ sontor katha do bako aṅgocleda. Onko do ạuṛiyakʼren boṅgako sewawatʼkote ako hõko ạuṛiyakʼena. Probhu Isor do Israelko okoeko leka calakʼe baronletʼko onkage onko do beṛhaeten jạtrenko lekako kạmikan tahẽkana.

¹⁶ Onko do akoren Probhu Isorakʼ sanam hukum bạgikate ako lạgitʼ dulakʼ barea mĩhũ muṭhạn ar mitʼṭecʼ Asera khunṭiko benao joṅan tahẽkana. Onko do sermaren ipilkoko sewawako kan tahẽkana ar Bakʼal debota hõko sewawae kan tahẽkana.

¹⁷ Onko do Apnarren gidrạko seṅgelreko khadleyetʼko tahẽkana. Arko janokʼkan tahẽkana ar cinhạko ńelte tayom daram reakʼ katha lại reakʼko hewakʼkan tahẽkana ar Probhu Isorakʼ mẽtʼre oka bạṛicʼakʼ kan ona kạmi lạgitʼko ạkhrińokʼkan tahẽkante Probhu Isorko khĩs ocoyede tahẽkana.

¹⁸ Onate Israelren hoṛko cetanre Probhu Isor do ạḍi bạṛicʼe edreyena ar acʼ samaṅ khon onkoe ocokʼketʼkoa. Ar eken Jihudạ gusṭiren sarecʼko tahẽyena,

¹⁹ menkhan Jihudạ gusṭiren hõ akoren Probhu Isorakʼ hukum leka senokʼ baṅkate Israelko lekako kạmikeda.

²⁰ Ona iạte Probhu Isor do sanam Israelkoe nihạ̃t giḍiketʼkoa. Uni do harket sasetreye dohoketʼkoa ar luluṭkoakʼ tireye jimạkatʼkoa, ar mucạtʼre acʼ samaṅ khone ocokʼ giḍikatʼkoa.

²¹ Probhu Isor do Dạudakʼ bõs khon Israelko tinreye cirạ begarketʼkoa unre onko do Nabatren hopon Jerobiam akoren rajko benaokedea. Ar Jerobiam do Probhu Isorakʼ hor khon Israelkoe ghańjeṛ idiketʼkote onko do maraṅ okocʼe kại ocoketʼkoa.

²² Israelren hoṛko do Jerobiamakʼ sanamakʼ kại reakʼ horteko taṛametʼ tahẽkana, ar ona khon do bako ạcur ruạṛlena.

²³ Mucạtʼre Probhu Isor do acʼren sanam gutiko, metakʼme nạbiko hotete emakʼ sontor katha lekate acʼ samaṅ khone ocokʼ giḍikatʼkoa. Ona iạte Israelren hoṛko do akoakʼ disạm khonko bondi ocoyente Asur disạmteko idi ocoyena, ar teheń hõ onko do onḍege menakʼkoa.

Samariạre eṭakʼ eṭakʼ hoṛkoakʼ girobasokʼ

²⁴ Asurren raj do Israel hoṛkoakʼ jaega purun lạgitʼ Babel, Kuth, Awa, Hamat ar Sepharwayim khon hoṛko ạgukate Samariạ nagraha ar atokoreye dohoketʼkoa. Ar onko do onako jaegare girobasokʼko ehopʼena.

²⁵ Onḍe girobasokʼko ehopʼen pạhil secʼ onko do Probhu Isor bako sewawae kan tahẽkana, onate uni do onko talare dhạcri kulkoe kolketʼkoa. Ar onko do onkoren hoṛkoko gocʼketʼkoa.

²⁶ Unre Asurren raj ṭhen niạ khobor kollena, “Okoeko hoṛ bondikate Samariạre girobasokʼ lạgitʼem kol akatʼko onko do bako baḍaea ona disạmren Isor do cetʼ lekateko kusi ocoyea mente. Onate Isor do onko talare dhạcri kulkoe kolketʼkoa ar onkoko gocʼ ocokʼkana.

²⁷ Unre Asurren raj do acʼren hoṛko noae hukumatʼkoa, “Okoe naekeko Samariạ khonpe bondi ạgu akatʼko onko mod khon mitʼ hoṛ onḍe kolkaepe jemon uni do onḍe senkateye girobasokʼ ar ona disạmren Isor cetʼ lekateye kusikʼ onae cetʼako”

²⁸ Unre Samariạ khon idi ocoyen naekeko mod khon mitʼ hoṛ do Bethelre senkate girobasokʼe ehopʼena ar onko cetʼakoe ehopʼena cetʼ lekate Probhu Isorko sewawaea mente.

²⁹ Enhõ mimitʼ jạtren hoṛko do oka ato ar nagrahareko girobasokʼkan tahẽkan onḍe onko do apan ạpin debotako benao joṅana ar Samariạren hoṛko benao akatʼ tahekan than boṭkocʼko reakʼ eṭakʼ eṭakʼ mundilkore onkoko dohokatʼkoa.

³⁰ Nonkate Babelrenko do Sukot-Benot muṭhạn, Kutren hoṛko do Nergalakʼ muṭhạn ar Hamatren hoṛko do Asimaren muṭhạnko benao joṅana,

³¹ ar Awiko do Nibas ar Tartakakʼ muṭhạn ar Sepharwayimko do Adramelek ar Anamelek ńutuman Sepharwayim debota ńutumte akoren gidrạko seṅgelreko samaṅketʼkoa.

³² Onko do Probhu Isorko sewawae kan tahẽkangea ar than boṭkocʼko reakʼ mundilkore naeke kạmi lạgitʼ apnar mod khon hoṛko bahalketʼkoa.

³³ Onko do Probhu Isorko sewawae kan tahẽkana, menkhan ona sãote okako disạm khonko ạgu ocolen onako disạm reakʼ cạli leka onko do akoren debotako hõko sewawako kan tahẽkana.

³⁴ Teheń hạbicʼ onko do ona niạmgeko manao ạguiyeda. Onko do Probhu Isor bako sewawae kana, ente Probhu Isor do okoe Jakobakʼ ńutum Israele doholetʼtae uni Jakobren hoponko do Probhu Isorakʼ emakʼ niạmko, hukumko ar ạn-ạriko bako manaoleda.

³⁵ Probhu Isor do Israelko lạgitʼ mitʼṭecʼ bondobose bandhao jokhecʼ noa hukume ematʼko tahẽkana, “Ape do cele deb debotage alope sewawakoa se alope ḍobokʼakoa ar alope sapʼsorakoa se onko ńutumte jãhãnakʼge alope samaṅa.

³⁶ Menkhan Probhu Isor, okoe do daṛeanakʼ tite Misor disạm khone oḍok ạguletʼpe unige sewawaepe, ar unige ḍobokʼaepe ar uni ńutumte joto samaṅokʼakʼko samaṅpe.

³⁷ Uni okaṭakʼ niạmko, ạn-ạriko, ar hukumko ape lạgitʼe ol akatʼ ona do joton salakʼ manaope. Ar deb debotako do alope sewawakoa.

³⁸ Ape lạgitʼ okaṭakʼ bondobos iń dohoakatʼ ona baṛe disạ dohokakʼpe; ar cele debotakoge alope sewawakoa,

³⁹ bickom aperen Probhu Isorge dewa ar sewawaepe. Aperen sanam bạirikoakʼ ti khon unigeye bańcaopea.”

⁴⁰ Menkhan onko jạtrenko do ona katha bako luturatʼte akoakʼ hewa leka kạmi iditegeko tahẽyena.

⁴¹ Onko do Probhu Isorko sewawae kan tahẽkangea menkhan debotako hõko sewawako kan tahẽkana. Ar teheń hạbicʼ onkoren hoponko ar goṛom gidrạko hõ akoren hapṛamko lekageko taṛameda.