2 Rapajko 16 - সান্তালী বাইবেল

Jihudạren Ahas raj

¹ Remaliạren hopon Pekawakʼ rajokʼ gel eaeyakʼ bochorre Jihudạren raj Jothamren hopon Ahas do rajokʼe ehopʼena.

² Uni do bargel bochor umer tahẽkanre raje hoylena ar Jerusalemre gel turui bochor raje calaokeda. Uniren hapṛam Dạud do cetʼ leka Probhu Isorakʼ mẽtʼre bhageakʼe kạmikan tahẽkan onka Ahas do bae kạmiyetʼ tahẽkana.

³ Uni do Israelren rajko lekageye calakʼkan tahẽkana; ar Probhu Isor Israelko samaṅ khon okoe jạtrenkoe laga ńirletʼko onkoakʼ bạṛicʼakʼ kạmiko lekage uni do acʼren hopon seṅgelreye samaṅledea.

⁴ Uni do than boṭkocʼkore, buru cetankore ar mimitʼ hạriạṛ dare buṭạkore janwarkoe dãṛẽyetʼko tahẽkana ar dhupkoe jeretʼetʼ tahẽkana.

⁵ Aramren raj Resin ar Remaliạren hopon Israelren raj Peka do Jerusalem upạrte rakapʼ hecʼkate Ahas sudhạ nagrahae gherao ạcurkeda, menkhan uni do Ahas bae bhagao daṛeadea.

⁶ Onako dinre Aramren raj Resin do Elat nagraha khon Jihudạren hoṛkoe laga ńirketʼkote ona do arhõ Aramakʼ tabereye ạgukeda. Ona tayom Edomrenko do Elatte senkate girobasokʼko ehopʼena. Ar teheń hạbicʼ onko do onḍege menakʼkoa.

⁷ Tayomte Ahas do Asurren raj Tiglot-Pileser ṭhen niạ katha roṛ lạgitʼ hoṛkoe kolkatʼkoa, “Iń do amren guti ar amren hopon kạnạń. Am do hijukʼte Aramren raj ar Israelren rajakʼ ti khon rukhiyạyińme. Unkin do ińkin akromoneń kana.”

⁸ Ahas do Probhu Isorakʼ oṛakʼ ar raj oṛakʼ reakʼ khajańci khon sona ar rupại ạguketʼte sandes lekate Asurren raj ṭhene kolkeda.

⁹ Asurren raj doe rạjiyena ar uni do Dameseke akromonketʼte onae hatkeda. Ar onḍenko hoṛkoe bondi idiketʼkoa ar Resin doe gocʼkedea.

¹⁰ Unre Ahas raj do Damesekte Asurren raj Tiglot-Pileser sãote ńapamokʼ lạgitʼe senena. Uni do onḍenakʼ pinḍ ńelte ona benao reakʼ monsubạ ar ona reakʼ nạmuna do naeke Uriạ ṭhene kolkeda.

¹¹ Damesek khon Ahas raje kolletʼ sanam goṭawakʼ lekage naeke Uriạ do mitʼṭecʼ pinḍe benaokeda ar Ahas raje ruạṛ hijukʼ laharege ona doe sạtkeda.

¹² Damesek khon ruạṛ hecʼkate raj do ona pinḍe ńelkeda ar ona pinḍ ṭhen senkate ona cetanreye samaṅkeda.

¹³ Uni do onḍe acʼakʼ jeredokʼ samaṅokʼakʼ, anaj samaṅokʼakʼ ar coḍorakʼ samaṅokʼakʼ samaṅkeda ar acʼakʼ sulukren samaṅokʼakʼ reakʼ mãyãm hõe ircikeda.

¹⁴ Ar Probhu Isor samaṅre dohoakan pitạl reakʼ pinḍ do Probhu Isorakʼ oṛakʼ ar nãwã pinḍ reakʼ tala khon ocokʼkate nãwã pinḍ reakʼ utạr secʼreye dohokeda.

¹⁵ Ona tayom Ahas raj do Uriạ naeke noae hukumadea, “Ona maraṅ pinḍ cetanre do setakʼ reakʼ jeredokʼ samaṅokʼakʼ ar ạyupʼ bela reakʼ anaj samaṅokʼakʼ porobem porobokʼa. Ona chaḍa ona cetanre rajakʼ jeredokʼ samaṅokʼakʼ ar anaj samaṅokʼakʼ ar disạmren sanam hoṛkoakʼ jeredokʼ samaṅokʼakʼ ar onkoakʼ anaj samaṅokʼakʼ ar coḍorokʼ samaṅokʼakʼem samaṅa. Sanam jeredokʼ samaṅokʼakʼ ar eṭakʼ janwar samaṅokʼakʼ reakʼ mãyãm do ona pinḍ cetanrem irciwakʼa. Menkhan Isorakʼ hukum ńam lạgitʼ do ona pitạl reakʼ pinḍgeń beohara.”

¹⁶ Ar naeke Uriạ do Ahas rajakʼ hukum leka jotowakʼe kạmikeda.

¹⁷ Ahas raj do bhajan bạisạu akan binḍi aṛe reakʼ sanam patkoe getʼ giḍikada ar onḍe khon bhajankoe ocokʼ giḍikada. Pitạlren ḍaṅgrako cetanre oka maraṅ okocʼ karahe bạisạu tahẽkan ona ocokʼ giḍikatʼte uni do mitʼṭecʼ dhiri cetanreye dohokada.

¹⁸ Probhu Isorakʼ oṛakʼre jirạukʼ mãhã ńutumte oka cala benao akan tahẽkan Ahas do Asurren raj botorte onae ocokʼ dohokada ar Probhu Isorakʼ oṛakʼ bahre secʼ rajakʼ bolokʼ lạgitʼ oka hor benao akan tahẽkan ona hõe ocokʼkada.

¹⁹ Ahasakʼ eṭakʼ sanam kạmiko reakʼ katha do “Jihudạren rapajkoakʼ Itihãs” ńutumanakʼ puthire ol menakʼa.

²⁰ Tayomte Ahas do acʼren hapṛamko ṭhene calaoena ar Dạud nagrahare acʼren hapṛamko sãoteko topakadea. Ar uniyakʼ jaegare uniren hopon Hiskiạko rajkedea.