2 Rapajko 15 - সান্তালী বাইবেল

Jihudạren Asariạ raj

¹ Israelren Jerobiam rajakʼ rajokʼ bargel eaeyakʼ bochorre Jihudạren raj Amasiạren hopon Asariạ do rajokʼe ehopʼena.

² Uni do gel turui bochor umerre raje hoylena ar Jerusalemre mõṛẽgel bar bochor raje calaokeda. Uniren eṅgatakʼ ńutum do Jekoliạ tahẽkana; uni do Jerusalemren maejiue tahẽkana.

³ Asariạ do acʼren apat Amasiạ lekage Probhu Isorakʼ mẽtʼre oka bhageakʼkan onageye kạmiyetʼ tahẽkana.

⁴ Menkhan than boṭkocʼko do bae marao giḍileda; ar hoṛko hõ onakore janwar dãṛẽko samaṅetʼko tahẽkana ar dhupko jeretʼetʼ tahẽkana.

⁵ Tayomte Probhu Isor do raje ghạlkede khan uni do jiwetʼ bhor murhucʼ jom rogteye jạbunena. Uni do mitʼṭecʼ begar oṛakʼreye girobasokʼkan tahẽkana. Ar rajren hopon Jotham do raj oṛakʼren mạlike hoyena ar disạm hoṛko ḍanṭaokoe ehopʼena.

⁶ Asariạwakʼ eṭakʼ sanam kạmiko reakʼ katha do “Jihudạ rapajkoakʼ Itihãs” ńutumanakʼ puthire ol menakʼa.

⁷ Tayomte Asariạ do acʼren hapṛamko ṭhene calaoena ar uni do Dạudakʼ nagrahareko topakadea. Ar uniyakʼ jaegare uniren hopon Jotham do raje hoyena.

Israelren Sakhariạ raj

⁸ Jihudạren raj Asariạwakʼ rajokʼ pegel irạlakʼ bochorre Jerobiamren hopon Sakhariạ do Israelren raj lekate turui cando raje calaoleda.

⁹ Uni hõ acʼren hapṛamko lekage Probhu Isorakʼ mẽtʼre oka bạṛicʼakʼkan onageye kạmiyetʼ tahẽkana. Nabatren hopon Jerobiam do cetʼleka Israelkoe kại ocoyetʼko tahẽkan Sakhariạ hõ onkageye kạmiyetʼ tahẽkana.

¹⁰ Jabesren hopon Salum do Sakhariạ upạrteye soṛojontrokeda ar hoṛko samaṅrege uniye akromon kedeteye gocʼkedea ar acʼ do uniyakʼ jaegare raje hoyena.

¹¹ Sakhariạwakʼ eṭakʼ sanam kạmi reakʼ katha do “Israelren rapajkoakʼ Itihãs” ńutumanakʼ puthire ol menakʼa.

¹² Probhu Isor do Jihu okae metade tahẽkan, “Amakʼ bõsren pon piṛhi hạbicʼ Israelakʼ siṅghạsonreko duṛupʼa” ar ona do purạuena.

Israelren Salum raj

¹³ Jihudạren raj Usiạwakʼ, metakʼme Asariạwakʼ rajokʼ pegel areakʼ bochorre Jabesren hopon Salum do raje hoyena ar Samariạre mitʼ cando raje calaokeda.

¹⁴ Ona tayom Gadiren hopon Menahem do Tirsa khon Samariạte senkate Jabesren hopon Salume akromonkedete uniye gocʼkedea ar uniyakʼ jaegare raje hoyena.

¹⁵ Salumakʼ eṭakʼ sanam kạmi reakʼ katha ar uni upạrte soṛojontro reakʼ katha do “Israelren rapajkoakʼ Itihãs” ńutumanakʼ puthire ol menakʼa.

¹⁶ Tayomte Menahem do tirsa khon oḍok kate Tipsa nagraha ar onḍenko hoṛko ar ona aḍepase ṭoṭharen sanamkoe akromonketʼkoa, ente onko do akoakʼ nagraha reakʼ phaṭok duạr jhicʼ bako rạjilena. Ona iạte uni do Tipsae marao utạrkeda ar sanam bhạrti hoṛmo maejiukoakʼ lacʼkoe getʼ cirạketʼtakoa.

Israelren Menahem raj

¹⁷ Jihudạren raj Asariạwakʼ rajokʼ pegel areakʼ bochorre Gadiren hopon Menahem do Israelren raje hoyena. Uni do Samariạre gel bochor raje calaokeda.

¹⁸ Uni do Probhu Isorakʼ mẽtʼre oka bạṛicʼakʼkan onageye kạmikeda. Uniyakʼ rajokʼ bhor uni do onako kạkại tegeye tahẽyena one cetʼleka Nabatren hopon Jerobiam do Israelkoe kại ocoyetʼko tahẽkan.

¹⁹ Inạ tayom Asurren raj Pul do Israele akromonkeda. Unre Menahem do Pulakʼ goṛote disạmre acʼakʼ rajosṭi kajaktae lạgitʼ pegel are ṭon rupại emadea.

²⁰ Menahem do noa ṭaka Israel hoṛko ṭhen khon jor-julumkateye uṭhạuleda. Ar Asurren raj emae lạgitʼ mimitʼ kisạ̃ṛ hoṛko do turui sae gram rupạ emokʼ hoyentakoa. Onate Asurren raj do disạm bạgiyatʼteye calaoena.

²¹ Menahemakʼ eṭakʼ sanam kạmiko reakʼ katha do “Israelren rapajkoakʼ Itihãs” ńutumanakʼ puthire ol menakʼa.

²² Tayomte Menahem doe gocʼente acʼren hapṛamko ṭhene senena ar uniyakʼ jaegare uniren hopon Pekahiạ do raje hoyena.

Israelren Pekahiạ raj

²³ Jihudạren raj Asariạwakʼ rajokʼ mõṛẽgelakʼ bochorre Menahemren hopon Pekahiạ do Samariạre Israelren raj lekate bar bochor raje calaokeda.

²⁴ Uni do Probhu Isorakʼ mẽtʼre oka bạṛicʼakʼ kan onageye kạmikan tahẽkana. Nabatren hopon Jerobiam cetʼ leka Israelkoe kại ocoyetʼko tahẽkan onkage Pekahiạ hõe kạmikeda.

²⁵ Remaliạren hopon Peka ńutuman uniren mitʼṭen subedar do uni upạrteye soṛojontrokeda. Peka do Gileadren mõṛẽgel hoṛ soṅgekate Samariạ raj oṛakʼ gaṛre Pekahiạ, Orgob ar Oriyi tekoye gocʼketʼkoa. Pekahiạ gocʼkate Peka do uniyakʼ jaegare raje hoyena.

²⁶ Pekahiạwakʼ eṭakʼ sanam kạmiko reakʼ katha do “Israelkoren rapajkoakʼ Itihãs” ńutumanakʼ puthire ol menakʼa.

Israelren Peka raj

²⁷ Jihudạren raj Asariạwakʼ rajokʼ mõṛẽgel dosar bochorre Remaliạren hopon Peka do Samariạren raje hoyena. Uni do bargel bochor raje calaokeda.

²⁸ Uni do Probhu Isorakʼ mẽtʼre oka bạṛicʼakʼ kan onageye kạmikan tahẽkana. Nabatren hopon Jerobiam do Israelko cetʼ lekae kại ocoyetʼko tahẽkan onkage Peka hõe kạmikeda.

²⁹ Israelren raj Pekawakʼ oktere Asurren raj Tiglot-Pilese do hecʼkate Iyon, Abel-beth-Maka, Janoa, Kedes, Hasor, Gilead, Gạlil ar Napthali reakʼ sanam ṭoṭhae ạidạriana ar hoṛko bondikate Asurteye idiketʼkoa.

³⁰ Tayomte Usiạren hopon Jothamakʼ rajokʼ bargel bochorre Elaren hopon Hosea Remaliạren hopon Peka upạrteye soṛojontrokeda ar uniye gocʼkedete uniyakʼ jaegareye rajena.

³¹ Pekawakʼ eṭakʼ sanam kạmiko reakʼ katha do “Israelren rapajkoakʼ Itihãs” ńutumanakʼ puthire ol menakʼa.

Jihudạren Jotham raj

³² Remaliạren hopon Israelren raj Pekawakʼ rajokʼ dosar bochorre Jihudạren raj Usiạren hopon Jotham do rajokʼe ehopʼena.

³³ Uni do bargel mõṛẽ bochor umerre raje hoyena ar Jerusalemre gel turui bochor raje calaokeda. Uniren eṅgattetʼakʼ ńutum do Jerusa tahẽkana; uni do Sadokren hoponerae tahẽkana.

³⁴ Uniren apat Usiạ lekage Jotham do Probhu Isorakʼ mẽtʼre oka bhageakʼkan onageye kạmiyetʼ tahẽkana.

³⁵ Menkhan uni do than boṭkocʼko bae marao utạrleda. Ar hoṛko hõ onakore janwar dãṛẽ ar dhupko jeretʼetʼ tahẽkana. Jotham do Probhu Isorakʼ oṛakʼ reakʼ pạcri reakʼ cetan senakʼ duạre jut aro ocokeda.

³⁶ Jothamakʼ eṭakʼ sanam kạmiko reakʼ katha do “Jihudạren rapajkoakʼ Itihãs” ńutumanakʼ puthire ol menakʼa.

³⁷ Probhu Isor do ona okte khon Aramren raj Resinar Remaliạren hopon Peka do Jihudạ upạrte lạṛhại lạgitʼe kolkedea.

³⁸ Tayomte Jotham do acʼren hapṛamko ṭhene calaoena ar uniren hapṛam Dạudakʼ nagrahareko topakadea. Inạ tayom uniren hopon Ahas do uniyakʼ jaegare raje hoyena.