2 Rapajko 14 - সান্তালী বাইবেল

Jihudạren Amasiạ raj

¹ Israelren raj Jehoahasren hopon Jehoasakʼ rajokʼ dosar bochorre Jihudạren raj Joasren hopon Amasiạ do rajokʼe ehopʼena.

² Raje hoyokʼ jokhecʼ uniyakʼ umer do bargel mõṛẽ bochor tahẽkantaea. Uni do Jerusalemre bargel are bochor hạbicʼ raje calaokeda. Uniren eṅgatakʼ ńutum do Jehoyadin tahẽkana; uni do Jerusalemren maejiue tahẽkana.

³ Amasiạ do Probhu Isorakʼ mẽtʼre okaṭakʼ bhageakʼkan onageye kạmiyetʼ tahẽkana, menkhan uniren hapṛam Dạud leka do baṅa. Uni do acʼren apat Joas leka sanamakʼgeye kạmiyetʼ tahẽkana.

⁴ Menkhan than boṭkocʼko do bae marao utạrleda, ar hoṛko hõ onḍe janwarkoko dãṛẽyetʼko tahẽkana ar dhupko jeretʼetʼ tahẽkana.

⁵ Ado rajosṭi acʼakʼ tire hecʼen khan okoekin guti do rajkin gocʼlede, metakʼme uniren apatkin gocʼlede uni do unkine gocʼketʼkinạ.

⁶ Menkhan Moseyakʼ ạn-ạrire oka ol menakʼ ona leka uni do uniren hoponko bae gocʼletʼkoa. Ona puthire Probhu Isorakʼ niạ hukum ol tahẽkana, “Hoponkoakʼ kại gunạkʼte apat se apatakʼ kại iạte hoponko do bako gocʼ ocokʼa, menkhan mimitʼko do akoakʼ kại gunạkʼtegeko gujukʼa.

⁷ Amasiạ do buluṅ doreãore gel hajar Edomrenkoe gocʼletʼkoa ar lạṛhạikate Selae hatkeda ar ona reakʼ ńutum do Joktheyele dohokeda; ona ńutum do teheń hạbicʼ hõ menakʼgea.

⁸ Ona tayom uni do Jehuren goṛomtetʼ koṛa, metakʼme Jehoahasren hopon Israelren raj Jehoas ṭhene roṛgotʼkada, “Dela, hijukʼme mẽtʼ mẽtʼ laṅ beṅgetʼange.”

⁹ Menkhan Israelren raj do Jihudạren raj ṭhen kathae roṛ gotʼkada, “Lebanon reakʼ aṭkuṭi jạnum do Lebanon reakʼ debdạru dare ṭhen kathae roṛ gotʼkada, ‘ińren hopon sãote amren hoponera baplayem.’ Ona tayom mitʼṭen bir janwar do hecʼkate ona aṭkuṭi jạnumkoe lebetʼ gańjaokeda.

¹⁰ Edomren hoṛkom bhagao akatʼkote amakʼ mon do sạrige bạḍạite perecʼ akana. Ma ṭhonokokʼte dhirpurkokʼme, ar amakʼ oṛakʼrege tahenme. Cedakʼ muhin dom hoho ạgujoṅkana ar ona sãote Jihudạ reakʼ maraokʼ hõ?”

¹¹ Menkhan Amasiạ do ona bae luturada. Onate Israelren raj Jehoas do uniye akromonkedea. Uni ar Jihudạren Amasiạ raj do Jihudạ reakʼ Bet-Semesrekin samna sạmniyena.

¹² Unre Israelkoakʼ tire Jihudạ doe bhagao ocoyena ar sanamko apan ạpin oṛakʼteko dạṛkeda.

¹³ Israelren raj Jehoahas do Bet-Semesre Ahasiaren goṛomtetʼ koṛa, metakʼme Joasren hopon Jihudạren raj Amasiại bondikedea. Ona tayom Jehoas do Jerusalemte senkate onḍenakʼ pạcri reakʼ Ephrayim phaṭok duạr khon konac reakʼ phaṭok duạr hạbicʼ ponsae moka jeleń mitʼ hạṭińe rạputʼkeda.

¹⁴ Probhu Isorakʼ oṛakʼre ar raj oṛakʼ khajańci reakʼ sona, rupạ ar eṭakʼ eṭakʼ jinisko tinạkʼ tahẽkan ona sanamakʼe idikeda. Ona chaḍa uni do jạmin lekate adom adom hoṛkoante Samariạteye ruạṛ calaoena.

¹⁵ Jehoasakʼ eṭakʼ sanam kathako, ar lạṛhạire uniyakʼ jitạukʼ reakʼ katha ar Jihudạren Amasiạ raj upạrte uniyakʼ lạṛhại reakʼ katha do, “Israelkoren rapajkoakʼ Itihãs” ńutumanakʼ puthire ol menakʼa.

¹⁶ Tayomte Jehoas do acʼren hapṛamko ṭhene ruạṛ calaoena ar uni do Samariạre Israelren rajko sãoteko topakadea. Ar uniren hopon Jerobiam do uni bodolte raje hoyena.

Jihudạre Amasiạ rajakʼ gujukʼ

¹⁷ Israelren raj Jehoahasren hopon Jehoasakʼ gujukʼ tayom Jihudạren raj Joasren hopon Amasiạ do arhõ gelmõṛẽ bochor jiwetʼe tahẽkana.

¹⁸ Amasiạwakʼ eṭakʼ sanam kạmi reakʼ kathako do “Jihudạ rapajkoakʼ Itihãs” ńutumanakʼ puthire ol menakʼa.

¹⁹ Jerusalemre Amasiạ upạrte soṛojontro hoyen khan uni do Lakhisteye ruạṛ calaoena, menkhan Lakhiste hoṛ kolkate uni do onḍeko gocʼkedea.

²⁰ Uniyakʼ mạ̃ṛĩ do sadomre ladekate Jerusalemteko ạgukeda ar Dạudakʼ nagrahare uniren hapṛamko sãoteko topakadea.

²¹ Ona tayom Jihudạren sanam hoṛ do Amasiạwakʼ jaegare uniren hopon Asariạko rajkedea. Unre uniyakʼ umer do gel turui bochor tahẽkantaea.

²² Amasiạ do acʼren hapṛamko ṭhene senen khan Asariạ do Elat nagraha arhoe benao arokeda ar Jihudạ gobolreye ạgukeda.

Israelren dosar Jerobiam raj

²³ Jihudạ raj Joasren hopon Amasiạwakʼ rajokʼ gelmõṛẽakʼ bochorre Israelren raj Jehoas hopon Jerobiam do Samariạre raje hoyena ar uni do pongel mitʼ bochor raje calaokeda.

²⁴ Uni do Probhu Isorakʼ mẽtʼre oka bạṛicʼakʼ kan onageye kạmikan tahẽkana ar Nabatren hopon Jerobiam Israelko cetʼlekae kại ocoyetʼko tahẽkan uni hõ onkageye kạmikeda.

²⁵ Israelren Probhu Isor do acʼren guti Gat-Hepherren Amitaeren hopon Jona nạbi hotete oka kathae roṛletʼ ona katha lekage Jerobiam do Hamat ṭoṭha khon Araba doreão hạbicʼ Israelkoakʼ disạm reakʼ lahateakʼ simạna do arhõ acʼakʼ dokholreye ạgukeda.

²⁶ Noa reakʼ karon do hoyokʼkana, Probhu Isor do Israelren sạdhin se guti jotoge ạḍi bạṛicʼ sasetokʼkane ńelletʼkoa; ar onko goṛowako leka do celege bako tahẽkana.

²⁷ Probhu Isorakʼ sana do baṅ tahẽkana, serma latar khon Israelakʼ ńutum marao giḍikakʼ do. Ona iạte uni do Jehoasren hopon Jerobiam hotete onkoe bańcaoketʼkoa.

²⁸ Jerobiamakʼ eṭakʼ sanam kạmiko reakʼ, lạṛhạire uniyakʼ jitạukʼ reakʼ ar mitʼ jokhecʼ Jihudạ gobolre tahẽkan Damesek ar Hamat cetʼ leka Israel lạgitʼ arhõe hatketʼ onako reakʼ katha do “Israelren rapajkoakʼ Itihãs” ńutumanakʼ puthire ol menakʼa.

²⁹ Inạ tayom uni doe gocʼena ar acʼren hapṛamko ṭhen, metakʼme Israelren rajko ṭhene calaoena ar uniyakʼ jaegare uniren hopon Sakhariạ do raje hoyena.