2 Rapajko 13 - সান্তালী বাইবেল

Israelren Jehoahas raj

¹ Jihudạren raj Ahasiạren hopon Joasakʼ rajokʼ bargel pe bochorre Jihuren hopon Jehoahas do Samariạre Israelkoren raj lekate geleae bochor raje calaokeda.

² Uni do Probhu Isorakʼ mẽtʼre oka bạṛicʼakʼ kan onageye kạmikan tahẽkana ar Nabatren hopon Jerobiam Israelko cetʼ lekae kại ocoyetʼko tahẽkan onkage uni hõe kại ocoyetʼko tahẽkana; ar ona khon do bae ruạṛlena.

³ Ona iạte Probhu Isor do Israel upạrte pit caṛhaoentaea; ar uni do Aramren raj Hasael ar uniren hopon Benhadadakʼ tire ghane ghạṛicʼe soprotetʼko tahẽkana.

⁴ Inạ tayom Jehoahas do Probhu Isor ṭhene nehõrena ar Probhu Isor do uniyakʼe ańjomketʼtaea, ente Aramren raj do ạḍi bạṛicʼ Israelko cetanre jor julume calaoetʼ tahẽkana ar ona do uniye ńelkeda.

⁵ Unre Probhu Isor do Israelko mitʼṭen babańcaoicʼe ematʼkoa. Onate Israelko do Aramrenkoakʼ ti khon rukhiyạko ńamkeda. Ona iạte onko do lahate leka arhõ sulukte girobasokʼko ehopʼena.

⁶ Menkhan Jerobiam Israelko cetʼlekae kại ocoletʼko onko do uniyakʼ bõsrenko reakʼ onako kại khon bako ruạṛlena, menkhan kạmi iditegeko tahẽyena. Ona chaḍa Asera muṭhạn do unhõ Samariạrege tahẽyena.

⁷ Mõṛẽgel aswariko, gel goṭecʼ rãt gạḍi ar gel hajar palṭonko chaḍa Jehoahasren lạṛhại phạdren do ar celege bako tahẽkana, ente Aramren raj do sarecʼ sanamkoe marao giḍi utạrletʼkoa. Uni do ot lekage jaṅgateye lebetʼ gańjaoletʼkoa.

⁸ Jehoahasakʼ eṭakʼ sanam kạmiko reakʼ kathako ar lạṛhạire jitạukʼ reakʼ katha do “Israel rapajkoakʼ Itihãs” ńutumanakʼ puthire ol menakʼa.

⁹ Ar Jehoahas do acʼren hapṛamko ṭhene calaoena ar uni do Samariạreko topakadea. Ar uniyakʼ jaegare do uniren hopon Jehoase rajena.

Israelren Jehoas raj

¹⁰ Jihudạren raj Joasakʼ rajokʼ pegel eaeyakʼ bochorre Jehoahasren hopon Jehoas do Samariạren raje hoyena. Uni do gel turui bochor raje calaoleda.

¹¹ Uni do Probhu Isorakʼ mẽtʼre oka bạṛicʼakʼ kan onageye kạmiyetʼ tahẽkana ar Nabatren hopon Jerobiam cetʼleka Israelkoe kại ocoyetʼko tahẽkan Jehoas hõ onkageye kạmi ocoketʼkoa, ar ona khon uni do bae ruạṛlena.

¹² Jehoasakʼ eṭakʼ eṭakʼ kạmiko reakʼ katha ar okaṭakʼ daṛete uni do Jihudạren Amasiạ raj sãoteye lạṛhạilen ona do “Israelren rapajkoakʼ Itihãs” ńutumanakʼ puthire ol menakʼa.

¹³ Ar Jehoas do acʼren hapṛamko ṭhene senena ar uniren hopon Jerobiam do uniyakʼ jaegare raje hoyena. Ar Jehoas do Samariạre Israelren rajko sãoteye topa ocoyena.

Elisae nạbiyakʼ gujukʼ

¹⁴ Inạ lahare Elisae doe ruạ kạhil akan tahẽkana ar ona kạhilrege uni doe gocʼena. Uni gujukʼ lahare Israelren raj Jehoas do uni ńeńele senlena ar rakʼ rakʼteye menleda, “E ińren ạpuń, E ińren ạpuń, rãt gạḍiko ar aswariko leka am do Israelren rurukhiyạyicʼ kanam.”

^15-16 Unre Elisae do uniye metadea, “Amakʼ akʼ sar ạguiytam.” Uni do onae ạguketʼ khan Elisaeye menkeda, “Akʼ sar sabme.” Onate uni do onae sapʼkeda. Tayomte Elisae do rajakʼ ti cetanre acʼakʼ ti dohokateye menkeda,

¹⁷ “Purub senakʼ jalna jhijme.” Uni doe jhicʼkeda. Ona tayom Elisaeye menkeda, “Ma tuń me.” Jehoas do jalna jhicʼkateye tuńkeda. Unre Elisae doe menkeda, “Noa do hoyokʼkana Probhu Isorakʼ jitạukʼ reakʼ sar, Aram cetanre jitạukʼ reakʼ sarge. Am do Aramrenko Aphekrem bhagaokoa arem marao utạrkoa.”

¹⁸ Ona tayom Elisaeye menkeda, “Ma sarko hatao ruạṛme.” Ar raj do onakoe hataoketʼ khan Elisaeye menkeda, “Ma otre dalme.” Ar raj do pe dhao otreye dalkeda.

¹⁹ Unre Isorren hoṛ do raṅgaoenteye menkeda, “Mõṛẽ se turui dhao otre dadal jạruṛ tahẽkantama; enḍekhan am do Aramrenko purạtem marao caba daṛekekoa. Menkhan ńitokʼ do eken pe dhaoem bhagao daṛeakoa.”

²⁰ Tayomte Elisaeye gocʼen khan uni doko topakedea. Moabrenko do jao bochor Israel disạmte luluṭ lạgitʼko bolokʼkan tahẽkana.

²¹ Mitʼ dhao Israelko do mitʼ hoṛko topayede tahẽkanre ackage mitʼ dol luluṭkoko ńelketʼko khan onko do Elisaeakʼ topare mạ̃ṛĩko giḍikada. Khange uni hoṛakʼ mạ̃ṛĩ do Elisaeakʼ jaṅ sãote jakʼen soṅgete uni doe jiwetʼ ruạṛena are teṅgoyena.

²² Jehoahasakʼ goṭa rajokʼ oktere Aramren raj Hasael do Israel cetanreye jor julumetʼ tahẽkana.

²³ Menkhan Probhu Isor do Abraham, Isahak ar Jakob lạgitʼ okaṭakʼ bondobose doholetʼ ona iạte uni do Israelko cetanre daya are mãyãkʼkan tahẽkante onkoe luturatʼkoa. Onate teheń hạbicʼ hõ marao giḍiko se apnar samaṅ khon sạṅgiń giḍikako do bae khojleda.

²⁴ Aramren raj Hasaele gocʼen khan uniyakʼ jaegare uniren hopon Benhadad do raje hoyena.

²⁵ Unre Jehoahasren hopon Jehoas do ona nagrahako arhõe hat ruạṛkeda one okako do Hasaelren hopon Benhadad do acʼren apat Jehoahas ṭhen khon lạṛhạireye jitạu akatʼ tahẽkan. Jehoas do pe dhao Benhadad lạṛhạireye bhagao ledete Israelkoakʼ nagrahakoe rukhiyạleda.