2 Rapajko 12 - সান্তালী বাইবেল

Mundil oṛakʼ jut arokʼkan

¹ Jihuakʼ rajokʼ eaeyakʼ bochorre Joas do raje hoylena ar Jerusalemre uni do pongel bochor raje calaokeda. Uniren eṅgatakʼ ńutum do Sibiạ tahẽkana; uni do Ber-seba nagraharen kuṛiye tahẽkana.

² Naeke Jehoyada tinạkʼ din Joasren sosolhayicʼe tahẽkan unạkʼ din Joas do Probhu Isorakʼ mẽtʼre oka bhageakʼ kan onageye kạmiyetʼ tahẽkana.

³ Menkhan than boṭkocʼko do uni hõ bae marao utạrleda; hoṛko do un hạbicʼ hõ onakore janwarko dãṛẽyetʼko tahẽkana ar dhupkoko jeretʼetʼ tahẽkana.

⁴ Joas do naekeye metadea, “Probhu Isorakʼ oṛakʼre sonotakʼ dan lekate tinạkʼ ṭaka poesa ạgukʼ onape hataoa arpe doho jarwaea. Onako do hoyokʼkana- hoṛko lekhako jokhecʼ ạguakʼ ṭaka, manot purạu lạgitʼ ạguakʼ ṭaka ar koejoṅ oṛakʼte apnar kusi leka ạguakʼ ṭaka.

⁵ Ar mimitʼ naekeko do akoren hoṛko ṭhen khon ṭaka poesa hataokate koejoṅ oṛakʼ jut aroe kạmire ona jemonko beohar ma.”

⁶ Menkhan Joasakʼ rajokʼ bargel pe bochorre naekeko do unhõ koejoṅ oṛakʼ do bako jut aro akatʼ tahẽkana.

⁷ Ona iạte Joas do Jehoyada ar eṭakʼ naekeko hohoatʼkoteye kuliyana, “Koejoṅ oṛakʼ do cedakʼ bape jut aroyeda? Hoṛko ṭhen khon ṭaka hataokate ape ṭhen do alope dohokakʼ bickom koejoṅ oṛakʼ jut aroe lạgitʼ emokʼpe.”

⁸ Naekeko doko rạjiyena, hoṛko ṭhen khon ṭaka poesa hataokate ako ṭhen do bako dohoya ar apnarte koejoṅ oṛakʼ jut aroe reakʼ kạmi hõ bako kạmiya.

⁹ Unre Jehoyada naeke do mitʼṭecʼ baksa hataokate ona reakʼ ḍhakna cetanre mitʼṭecʼe bhugạkʼkeda. Ona do pinḍ aṛere Probhu Isorakʼ oṛakʼ bolokʼ duạr reakʼ jojomsa aṛereye dohokada. Okoe naekeko koejoṅ oṛakʼ bolokʼ duạrko horhoyetʼ tahẽkan onko do Probhu Isorakʼ oṛakʼre ạguakʼ sanam ṭaka ona baksareko dohoyetʼ tahẽkana.

¹⁰ Nonkate tinreko ńelkeda ona baksare aema ṭaka jarwa akana unre rajren hoṛ ar naekeko hecʼkate Probhu Isorakʼ oṛakʼre ạguakʼ ṭaka lekhakate thạilạkʼreko bhoraokakʼ kan tahẽkana.

¹¹ Ar tinạkʼ hoyena ona soṅ tayom ona ṭaka do Probhu Isorakʼ oṛakʼ okoeko ńel jutetʼ tahẽkan onko do hoṛkoakʼ tireko jimạyetʼ tahẽkana. Ar ona ṭaka do Probhu Isorakʼ oṛakʼ jut aroyetʼkan hoṛko, metakʼme chutạr mistriko, oṛakʼ benao mistriko,

¹² raj-mistriko ar dhiri gegetʼ mistriko mujuri lekateko emakokan tahẽkana. Ona chaḍa Probhu Isorakʼ oṛakʼ jut aroe kạmi lạgitʼ onko do kaṭ ar getʼakʼ dhirikoko kirińetʼ tahẽkana ar ona kạmi lạgitʼ okoeyakʼ oka lagaokʼkan tahẽkan ona lạgitʼko khorocetʼ tahẽkana.

¹³ Koejoṅ oṛakʼ lạgitʼ oka ṭakako ạguiyetʼ tahẽkan onate do rupạ reakʼ bạṭiko, sultạ saphae reakʼ cimṭạko, chichiṭiạu bạṭiko, pẽpṛẽtʼko, se Probhu Isorakʼ oṛakʼ reakʼ sona-rupạ reakʼ eṭakʼ eṭakʼ bhajanko do bako benao ocoleda.

¹⁴ Ńel todarotko do ona ṭaka mistrikoko emakokan tahẽkana jemon onko do koejoṅ oṛakʼ jut aroe reakʼ kạmireko beohar daṛeakʼ.

¹⁵ Menkhan onko ńel todarotkan hoṛko ṭhen khon hisạb hatao reakʼ jạṛuṛ do baṅ tahẽkana, ente onko do purạte pạtiạr salakʼko kạmikan tahẽkana.

¹⁶ Dos ńutumte samaṅokʼakʼ ar kại ńutumte samaṅokʼakʼ reakʼ ṭaka do Probhu Isorakʼ oṛakʼ reakʼ baksare bako dohoyetʼ tahẽkana; ona do naekekoakʼ bakhra kana.

¹⁷ Onako dinre Aramren raj Hasael doe rakapʼ calaoente Gat upạrteye lạṛhạiyena ar onae hatkeda. Ona tayom Jerusalem akromon lạgitʼ uni doe laha idiyena.

¹⁸ Unre Jihudạren raj Joas do acʼ ar acʼren hapṛamkoren, metakʼme Jihudạren Jehosaphat raj, Jehoram ar Ahasiạ emakʼ Probhu Isor ńutumte begarakʼ sanam jinisko Aramren raj Hasael ṭhene kolkeda. Ona chaḍa uni do Probhu Isorakʼ khajańci oṛakʼre ńamakʼ raj oṛakʼ reakʼ joto sona hõ uni ṭhene kolkeda. Onate Hasael do Jerusalem bạgikateye calaoena.

¹⁹ Joasakʼ eṭakʼ eṭakʼ sanam kạmi reakʼ kathako do “Jihudạ rapajkoakʼ Itihãs” ńutumanakʼ puthire ol menakʼa.

²⁰ Uniren gutikin do uni upạrte soṛojontrokate Silla calakʼ horre Bet-milore unikin gocʼkedea.

²¹ Okoe gutikin unikin gocʼlede unkin dokin hoyokʼkana Simeatren hopon Josakar ar Somerren hopon Jehosabad. Joase gocʼen khan Dạud nagrahare acʼren hapṛamko sãoteko topakadea. Ar uniyakʼ jaegare acʼren hopon Amasiạ do raje hoyena.