2 Rapajko 11 - সান্তালী বাইবেল

Athaliạ ar Joas

¹ Jihudạren raj Ahasiạren eṅgattetʼ tinreye ńelkeda, acʼren hopon doe gocʼ ocoyena unre uni do Jihudạ rajren sanam hoponkoe gocʼketʼkoa.

² Menkhan sanam raj hoponko ạuriko gocʼ ocokʼre Jehoram rajren hoponera Ahasiạren misera Jehosaba do Ahasiạren hopon Joase kombṛo idikedea. Athaliạ ṭhen khon okore dohoye lạgitʼge Jehosaba do Joas ar uniren jokʼtonicʼ mitʼṭecʼ giticʼakʼ oṛakʼreye dohokatʼkinạ. Ar onate Joas do bae gocʼ ocolena.

³ Uni do acʼren jokʼtonicʼ sãote turui bochor Probhu Isorakʼ oṛakʼre okogeye tahẽkana; unre Athaliạ do disạmreye rajokʼkan tahẽkana.

⁴ Eaeakʼ bochorre Jehoyada naeke do rurukhiyạkoren subedarko ar pahradarkoren subedarkoe hoho ạguketʼkoa ar Probhu Isorakʼ oṛakʼre acʼ ṭhene hohoatʼkoa. Uni do onko sãote mitʼṭecʼ bondobose bandhaokeda ar Probhu Isorakʼ oṛakʼreye kiriạ ocoketʼkote rajren hopone udukʼatʼkoa.

⁵ Ona tayom uni do hukumatʼkoteye metatʼkoa, “Okaṭakʼ cekae hoyokʼtape ona do noage: ape okoe do jirạukʼ mãhãre kạmi lạgitʼpe calakʼa, unre pe hạṭińko modre mitʼ hạṭińrenko do raj doṅgolpe horhoea,

⁶ ar mitʼ hạṭińrenko do Sur-phaṭok duạr ṭhenpe tahena ar mitʼ hạṭińrenko do pahradarkoakʼ kuḍạm reakʼ phaṭok duạr ṭhenko tahena. Nonkate ape do koejoṅ oṛakʼpe horhokakʼa.

⁷ Aperen eṭakʼ bar dolrenko okoe do jirạukʼ mãhãre chuṭipe ńam ape jotokoge koejoṅ oṛakʼre rajpe horhoyea.

⁸ Ar ape do apan ạpin khanḍa bhanḍa sapʼkate raj beṛhaetepe tahena. Ar jãhãege ape ṭhene hijukʼ uni dope gocʼ giḍikaea. Ar jãhãtege raje calakʼ ape do uni sopor soporpe tahena.”

⁹ Naeke Jehoyada do subedarko oka lekae hukumatʼko onkage onko doko kạmikeda. Subedarko do jotoge apan ạpin hoṛkoante, metakʼme okoe do jirạukʼ mãhãre kạmi reakʼ pạli bodolko hecʼlen ar okoe do kạmi khonko ruạṛ calakʼkan tahẽkan subedarko do onko salakʼ naeke Jehoyada ṭhenko hecʼena.

¹⁰ Unre Jehoyada do Dạud rajakʼ okako borlom ar ḍhalko Probhu Isorakʼ oṛakʼre tahẽkan onako hataokate subedarkoe ematʼkoa.

¹¹ Ar pahradarko do raj rukhiạye lạgitʼ sanamkoge khanḍa bhanḍa sapʼkate mundil oṛakʼ samaṅ reakʼ pinḍ ṭhen dạkhin secʼ khon utạr hạbicʼko teṅgoyena.

¹² Unre Jehoyada do rajren hopone oḍok ạgukedete uniyakʼ bohokʼre mukuṭe horokʼadea ar uniyakʼ tire bondobos reakʼ puthiko caladea. Onko do raj menteko ojokʼ bahalkedea ar disạm hoṛko do ti thayoate ar ãṭ aṛaṅte hohoateko menkeda, “Moharaj do jiwetʼ baṛeye tahenma.”

¹³ Pahradar ar hoṛkoakʼ hoho ańjomte Athaliạ do Probhu lsorakʼ oṛakʼteye boloyena.

¹⁴ Uni doe ńelkeda raj do tham khunṭi aṛereye teṅgo akana. Ar Subedarko ar sakwa okʼroṅko do raj beṛhaeteko teṅgo akana ar disạmren sanam hoṛ doko rạskạkʼ kana ar sakwako oroṅeda. Niạ ńelte Athaliạ do acʼakʼ kicricʼe oṛecʼketʼte ãṭ aṛaṅteye menkeda, “Hul! Hul!”

¹⁵ Unre Jehoyada naeke do okoe cetanre lạṛhại phạdkoakʼ bhare emade tahẽkan uni subedare hukumadea, “Uni do lạṛhại phạdko talare dohokate nonḍe khon oḍok idiyepe. Ar okoe uni tayomteye hijukʼ uni hõ gojepe.” Niạ lahare uni doe hukumatʼko tahẽkana, Probhu Isorakʼ oṛakʼ talare Athaliạ goje do ṭhik baṅ hoyokʼa.

¹⁶ Onate Athaliạ doe sapʼ ocoyena ar raj oṛakʼ reakʼ racare sadomkoakʼ bolokʼ horre idikateko gocʼkedea.

Jehoyadawakʼ kạmi

¹⁷ Ona tayom Jehoyada do raj ar hoṛko talare noa bondobose bandhaokeda, onko do Probhu Isorren hoṛ lekako calakʼa. Ona chaḍa uni do raj ar hoṛko talare mitʼṭecʼ bondobose bandhaokeda.

¹⁸ Ona tayom disạmren sanam hoṛ do Bakʼal debotawakʼ mundilte senkate onako rạputʼ giḍikada. Onko do onḍenakʼ pinḍ ar murhutʼkoko rạputʼ giḍikatʼkoa ar Bakʼal debotaren naeke Matan do pinḍ samaṅreko gocʼkedea. Tayomte Jehoyada naeke do Probhu Isorakʼ oṛakʼre pahradarkoe bahalketʼkoa.

¹⁹ Ona tayom uni do subedarko, rurukhiyạko, sarecʼ pahradarko ar disạmren sanam hoṛko soṅgekate Probhu Isorakʼ oṛakʼ khon raje oḍok ạgukedea. Unkin do pahradarkoakʼ phaṭok bhitrite bolokate raj oṛakʼtekin boloyena ar raj do siṅghạsonreye duṛupʼkedea.

²⁰ Onate disạmren sanam hoṛko rạskạyena ar nagraha do suluk ruạṛena. Ar Athaliạ do raj oṛakʼreye gocʼ ocoyena.

²¹ Joas tinre rajokʼe ehopʼena unre uniyakʼ umer do eken eae bochor tahẽkantaea.