2 Rapajko 10 - সান্তালী বাইবেল

Ahabakʼ bõsren hoṛkoakʼ gujukʼ

¹ Samariạre Ahabren eaegel hoponko tahẽkana. Jihu do ciṭhi olkate Samariạte Jisriyelren subedarko ṭhen, murubbiko ṭhen ar Ahabren bõs rurukhiyạko ṭhene kolkeda. Uniye olkeda,

^2-3 “Aperen kisạ̃ṛren bõsko do ape ṭhen menakʼkoa ar rãt gạḍi, sadomko, pạcrite esetʼ nagrahako ar khanḍa bhanḍako hõ menakʼgea. Onate niạ ciṭhi ńam são sãote aperen kisạ̃ṛren sanam khon bhage ar lekmanicʼ hopon bachaokate Ahabakʼ siṅghạsonre duṛubepe, ar ona tayom do aperen kisạ̃ṛakʼ bõs lạgitʼ lạṛhạipe.”

⁴ Menkhan onko do botor caṛhaoatʼkoteye menkeda, “Barea raj Jihu upạrte bạkin teṅgo daṛeada enḍekhan abo do cetʼ bo daṛeakʼa?”

⁵ Onate raj oṛakʼren sordar, nagraharen murubbiko ar Ahab bõsren rurukhiyạko do niạ katha Jihuko roṛ gotʼadea, “Ale do amren golam kanale. Am cetʼem metale onagele onkaea. Ale do okoege bale rajkoa; am okaṭakʼ bhagem hudisetʼkan onage onkaeme.”

⁶ Unre Jihu do onko ṭhen niạ menkate ciṭhiye olkeda, “Iń secʼpe tahen khan ar ińakʼ hukumpe manaoetʼ khan aperen kisạ̃ṛren bõsrenkoakʼ bohokʼ makʼkate gapa niạ okte Jisriyelte iń ṭhen ạguiype.” Ahabren onko eaegel bõsko do unre nagraharen napṛakʼ hoṛko ṭhenko tahẽkana. Onko do onkoko ńel todarotetʼko tahẽkana.

⁷ Jihuakʼ ciṭhi seṭeren tayom hoṛko do onko eaegel jotogeko sapʼketʼkoa arko gocʼketʼkoa. Ona tayom khạclạkʼre onkoakʼ bohokʼko bhoraoketʼte Jisriyelte Jihu ṭhenko kolkeda.

⁸ Unre mitʼ hoṛ do hecʼkate Jihui metadea, “Onko do onkoakʼ bohokʼko ạguakada.” Unre Jihui hukumkeda, “Onako do nagraha reakʼ phaṭok bolokʼ horre bar ṭhen ḍhipikate setakʼ hạbicʼ dohokakʼpe.”

⁹ Dosar hilokʼ setakʼre Jihu do bahreteye senena. Uni do sanam hoṛko samaṅre teṅgoyenteye menkeda, “Apeakʼ do jãhãn dos bạnukʼa. Ińge ińren kisạ̃ṛ upạrte soṛojontrokate uniń gocʼakadea, menkhan noko sanamko do okoeye gocʼketʼkoa?

¹⁰ Baḍae dohokakʼpe, Ahabren bõsko upạrte Probhu Isore roṛakatʼ mitʼṭecʼ katha hõ baṅ ạuṛiyagokʼa. Probhu Isor do acʼren guti Eliạ hotete oka hoyokʼ reakʼ kathae menletʼ onae onka akada.”

¹¹ Tayomte Jihu do Jisriyelre Ahabakʼ bõsren sarecʼ hoṛko, uniren sanam manotan hoṛko, uniren gateko ar uniren naekekoe gocʼketʼkoa. Ar onkoren do celege jiwetʼ bako tahẽlena.

^12-13 Inạ tayom Jihu doe oḍokente Samariạ secʼe mohnḍayena. Ar horre gupikoakʼ ato Bet-Ekodre Jihudạren Ahasiạ rajren bõskoe ńapamketʼkoa. Uni do onkoe kuliketʼkoa, “Okoe kanape ape do? Onkoko menkeda, “Ale dole Ahasiạ bõsren hoṛ kana. Ale do Isebel rạniren hoponko ar raj gharońjrenko johar emako lạgitʼle calakʼkana.”

¹⁴ Unre Jihui hukumkeda, “Onko do jiwetʼte sapʼkope.” Ar hoṛko do jiwetʼte onkoko sapʼketʼkoa ar onḍenakʼ kuń ṭhenko gocʼketʼkoa. Onko do lekhare pongel bar hoṛko tahẽkana. Onko modren mitʼ hoṛ hõ jiwetʼ do bae doholetʼkoa.

¹⁵ Ar Jihu do onḍe khone calaoen khan Rekabren hopon Jehonadab sãoteye ńapamena. Uni do Jihu sãote ńapamokʼ lạgitʼgeye hecʼlena. Jihu do uni joharadeteye metadea, “Cetʼ leka am secʼ minạń onkage cetʼ amhõ iń secʼ menama?” Jehonadabe roṛ ruạrkeda, “Hẽ, minạńgea.” Jihui menkeda, “Onka khan ti baṛe tiạrtam.” Jehonadab tiye tiạrketʼtae khan Jihu do acʼakʼ rãt gạḍireye rakapʼkedea.

¹⁶ Ona tayom Jihuye menkeda, “Iń sãote hijukʼme ar Probhu Isor lạgitʼ ińakʼ tinạkʼ gagoc menakʼ ona baṛe ńelme.” Niạ menkate uni do rãt gạḍiteye idikedea.

¹⁷ Jihu do Samariạte hecʼkate Ahab bõsren sarecʼ sanam hoṛkoe gocʼketʼkoa. Probhu Isor do Eliạ cetʼ lekae metade tahẽkan onkage Jihu do onkoe marao utạrketʼkoa.

Bakʼal debotaren naekekoakʼ gujukʼ

¹⁸ Ona tayom Jihu do sanam hoṛko jarwaketʼkoteye metatʼkoa, “Ahab do Bakʼal thoṛageye sewawade tahẽkana, menkhan Jihu do ona khon hõ ḍhere sewawaea.

¹⁹ Ńitokʼ ape do Bakʼal debotaren sanam nạbiko, sekʼwako ar naekeko hoho ạgukope. Ar ńelpe okoehõ jemon aloko sarecʼ tahen, ente Bakʼal debota ńutumte maraṅ okocʼ janwar dãṛẽko lạgitʼ iń doń bebostayetʼkana. Onate jãhãe bae hijukʼ enḍekhan uni doe gocʼ ocokʼa.” Menkhan Jihu do Bakʼal debota sewawaekanko marao giḍikako lạgitʼge niạ phundi doe aṭaoleda.

²⁰ Jihui menkeda, “Bakʼal debota ńutumte mitʼṭecʼ sabha hohokʼma.” Onate hoṛko do ona reakʼko lại sodorkeda.

²¹ Unre Jihu do Israel reakʼ sanam jaegare khobore kolkeda. Onate Bakʼal debotaren sanam sekʼwako do hecʼkateko jarwayena, ar mitʼ hoṛhõ bako sarecʼlena. Onko do Bakʼal debotawakʼ mundilreko boloyen khan nonkako bhiṛkeda, mundil do hoṛkote perecʼ cabayena.

²² Unre Jihu do kicricʼ godamren sordare metadea, “Bakʼal debota sekʼwa sanamko lạgitʼ kicricʼ ạguiyme.” Onate uni do onko lạgitʼ kicricʼe ạgukeda.

²³ Ar ona tayom Jihu ar Rekab hopon Jehonadab do Bakʼal debotawakʼ mundiltekin boloyena. Jihu do Bakʼal sekʼwakoe metatʼkoa, “Mońjtepe sendrakoa jemon ape sãote Probhu Isorren gutiko aloko tahen, eken Bakʼal debota sekʼwa hoṛgeko tahenma.”

²⁴ Unre onko do janwar dãṛẽ ar jeredokʼ samaṅokʼakʼ porobko porobena. Jihu do irạlgel hoṛko niạ menkate sontorte bahrere teṅgo ocoketʼkoteye metatʼkoa, “Okaṭakʼ bhariń ematʼpe onko modre mitʼ hoṛ hõ jodi jãhãeye ńir paskao ocoye enḍekhan uni ńir paskaoicʼ bodolte uniyakʼ jiwi hataokʼtaea.”

²⁵ Jihu do jeredokʼ samaṅokʼakʼ porobe sạtketʼ sãote pahradarko ar subedarkoko hukumkeda, “Bhitrite bolokʼpe ar onko gocʼ cabakope; mitʼ hoṛhõ jemon aloko dạṛ daṛeakʼ.” Unre onko do tarwaṛete onkoko gocʼketʼkoa. Pahradar ar subedarko do mundil bahrete mạ̃ṛĩkoko giḍi baṛakatʼte bhitri oṛakʼteko boloyena.

²⁶ Bakʼal debotawakʼ mundil khon pujạ reakʼ dhiriko oḍokkate onakoko atar giḍikada.

²⁷ Ona tayom onko do Bakʼal debotawakʼ pujạ dhiriko gejerkeda ar mundil hõko rạputʼkeda. Hoṛko do unkhon teheń hạbicʼ ona do pạikhana oṛakʼ menteko beohar ạguiyeda.

²⁸ Nonkate Jihu do Israelko tala khon Bakʼal debota pujại bondkeda.

²⁹ Menkhan Nabatren hopon Jerobiam Israelko okae kại ocoyetʼko tahẽkan ona khon uni do bae ruạṛ hecʼlena. Ona do hoyokʼkana Bethel ar Danre sonaren mĩhũ sewawạkin reakʼ.

³⁰ Probhu Isor do Jihui metadea, “Am do ińakʼ mẽtʼre hok reakʼgem kạmi akada ar onam onka akatʼte amren bõsko do pon piṛhi hạbicʼ Israel reakʼ siṅghạsonreko duṛupʼa.”

³¹ Enhõ Jihu do goṭa ontorte Israelren Probhu Isorakʼ ạn-ạriko manao lạgitʼ bae sontorlena. Jerobiam Israelko okakoe kại ocoyetʼko tahẽkan uni hõ ona khon do bae ruạṛlena.

^32-33 Ar Probhu Isor do onako okte khon Israel disạm reakʼ simạnakoe huḍiń idikeda. Ar Hasael do Israelkoakʼ disạm reakʼ jordan gaḍa purub secʼakʼ sanam jaegare onkoe bhagaoketʼkoa. Onako jaega do hoyokʼkana Arnon soḍokʼ aṛe reakʼ Aroer hạbicʼ sanam Gilead ar Bason disạm. Noa do tahẽkana Gad, Ruben ar Manase ṭoṭhako.

³⁴ Jihuakʼ eṭakʼ sanam kạmi reakʼ kathako ar lạṛhạire uniyakʼ jitạukʼ reakʼ katha do “Israelren rapajkoakʼ Itihãs” ńutumanakʼ puthire ol akana.

³⁵ Ar Jihu do acʼren hapṛamko ṭhene senena ar uni do Samariạreko topakedea. Uniyakʼ jaegare uniren hopon Jehoas do raje hoyena.

³⁶ Jihu do Samariạre bargel irạl bochor Israel cetanre raje calaokeda.