2 Patras 2 - সান্তালী বাইবেল

Eṛe cecetʼko

¹ Menkhan Israelko talare cetʼleka eṛe nạbikoko tahẽkan, onkage apeko talarehõ eṛe cecetʼkoko tahena. Onko do hape hapete nonkan bhul cecetʼakʼko ạguiya one okaṭakʼte manwako nosṭokʼ; ar okoeye kiriń chaḍao akatʼko uni Probhu Isor hõ bako aṅgocea. Nonkate onko do ạḍi usạra apnarte nosṭokʼko ạgujoṅa.

² Ar ḍher hoṛge onko ńelte lucạ lamoṭkoko hoyokʼa. Onko iạtege sạriyakʼ reakʼ hor do nindạu ocokʼa.

³ Lalocte eṛeteakʼ katha menkate akoakʼ porho lạgitʼ onko do kạmireko lagaopea. Onkoakʼ sạjại do ḍher din khonge jhulạu akana, ar onkoakʼ nosṭokʼ do bae duṛupʼ thirakana.

⁴ Serma goḍetkoko kạiletʼre Isor do onko bae aṛakʼ giḍiletʼkoa, bickom norok reakʼ ńut ghaḍlakʼreye giḍiletʼkote bicạrko lạgitʼe dohoakatʼkoa.

⁵ Uni do mare dhạrtirenko hõ bae aṛakʼletʼkoa, bickom Isor bin bhokti hoṛkore ḍubạ dakʼe ạguleda; menkhan Noha ar eṭakʼ eae hoṛ doe bańcaoletʼkoa. Ar nui Nohage Isor bhokti reaṅe porcarleda.

⁶ Sodom ar Gomora nagraha seṅgelte ḍahao maraokate Isor do ona nagraharen hoṛkoe sạjạiletʼkoa ar nonkate uni doe udukʼatʼkoa, okoe Isor bako botorae onko do cetʼ dosa hoyokʼ takoa mente;

⁷ Menkhan uni do Loṭe rukhiyạledea. Loṭ do Isor bhokti hoṛe tahẽkana. Uni do onḍenko ạn-ạri bebataoetʼkan hoṛkoakʼ lucạlamoṭ iạte duke ńametʼ tahẽkana.

⁸ Uni Isor bhokti hoṛ do onko talare tahẽkate dinke din onkoakʼ kạmiye ńeletʼkan tahẽkana ar onkoakʼ kathae ańjometʼ tahẽkana, ar ạn-ạri upạrte onkoakʼ kạmi ńelte acʼakʼ dhorom jiwire ạḍi duke ńametʼ tahẽkana.

⁹ Noako khon ńelokʼkana, okoe Probhu Isorko botoraekan onko do biḍạu tala khon bańcaoko doe baḍaegea.

¹⁰ Ona chaḍa okoe Isor botoraekoko baṅkan, asokaete okoe do akoakʼ kusi sana lekako calakʼkan ar ḍanṭao bako moneyakʼkan, onko sạjạiko lạgitʼ uni do bicạr din hạbicʼ dohoko hõe baḍaegea. Noko eṛe cecetʼko do ạḍi dilanko kanako. Onko do akoakʼ kusi sana lekako calakʼa ar ṭhonokanko upạrte henosta kathako roroṛ hõ bako botorokʼa.

¹¹ Menkhan serma goḍetko do daṛe ar ektiạriteko maraṅgere hõ Probhu Isor ṭhen onko reaṅ nonkan jãhãnakʼ bako lạlisa one onare nindạu reakʼ kathako menakʼ.

¹² Menkhan bin buj janwarko leka okoe do sobhabtege sapʼocokʼ ar gocʼ ocokʼ lạgitʼko janam akan, noko eṛe cecetʼko hõ onko lekage. Onko do okaṭakʼ bako bujhạu akatʼ ona reaṅ bạṛicʼ kathako roṛa. Ar akoakʼ bạṛicʼakʼrege onko doko ḍahao maraokʼa.

¹³ Onkoakʼ bạṛicʼ kạmi reakʼ kuṛại lekate onko do kosṭoko joma. Noko hoṛ do siń marsalre bhojkore haha hihi ar ńũ bulokʼgeko kusiyakʼa. Ar ape tulucʼ jojomko duṛupʼlenre onko do umtạ umtikʼte bubulakʼko ńũńũte akoakʼ rij roṅte lajaokʼ ar bemanotko ạgujoṅa.

¹⁴ Onkoakʼ mẽtʼ do loṭghuṭite perecʼgea ar tisge kạkại do bako bạgiya. Onko do dhoromre nijor monanko lalocko udukʼakote bhul horteko idikoa. Onkoakʼ ontor do eken lalocgeye cetʼakada. Onkore sarap menakʼa. Onko do sojhe hor bạgikate bhul hor secʼko ghańjeṛ akana.

¹⁵ Onko do Beor hopon Biliamakʼ hor secʼko mohnḍa akana. Biliam do bạṛicʼ kạmi reakʼ kuṛại ńam lạgitʼe menleda,

¹⁶ menkhan acʼakʼ bạṛicʼ kạmi iạte uni do mitʼṭen abola gadha ṭhene dhomkao ocolena. Uni gadha do manwa leka kathae roṛketʼte uniyakʼ koṅkatetʼe akoṭletʼtaea.

¹⁷ Noko hoṛ do ańjedokʼkan jharna ar hoete oṭanokʼkan kuṛhạ lekanako. Noko lạgitʼ do kaṛaṅ kucạṅ ńut dohoakana.

¹⁸ Onko do ạuṛi sạuṛi ar lạṭu lạtu kathako roṛa ar manwakoakʼ jel reakʼ bạṛicʼ sanako rakapʼ ocoyetʼte nonkan hoṛko bhul horteko idiyetʼkoa, okoe do bạṛicʼko talare menakʼko khonko oḍok hijukʼkan.

¹⁹ Onko eṛe cecetʼko do onko hoṛko sạdhinokʼ reakʼko gokʼako kangea, menkhan ako do bạṛicʼ kạmire golam akanko tahenkana; ente jãhãe jãhãnakʼreye bhagao ocolen khan uni do onaren golame hoyokʼa.

²⁰ Aboren Probhu ar babańcaoicʼ Jisu Mạsi reaṅ baḍae khạtirte dhạrti reakʼ bạṛicʼakʼ khonko ńir pharakokʼkanre hõ onko do inạ bạṛicʼakʼregeko jhạlikʼkante arhõko bhagao ocokʼkana, ar onkoakʼ mucạtʼ dosa do pạhilakʼ khon artetʼ bạṛicʼ hoyakantakoa.

²¹ Onko do dhorom jion reakʼ horko baḍaekan tahẽkanre hõ okaṭakʼ sonot hukum ematʼko tahẽkan ona doko bebataoleda. Noa dosare onko lạgitʼ ṭhik hor baṅ baḍaege bickom bhage tahẽkana.

²² Onko babotre noa katha do sạrige hoyakana, “Seta do acʼakʼ becʼ secʼe ạcurokʼa,” ar “Sukri do ạrupʼ saphayere hõ leḍreye jobekʼgea.”