2 Korinthiko 9 - সান্তালী বাইবেল

¹ Isorren hoṛko lạgitʼ dan emokʼ reakʼ okaṭakʼ kạmi calakʼkan ona reaṅ olape reakʼ jãhãn jạruṛ do bạnukʼtińạ,

² ente noa kạmire apeakʼ khaṛa moniń baḍaegea. Iń do ape iạte Makedoniạren hoṛko ṭhen noa menteń sarhaokʼ kanaje, Akhaearen hoṛko do dinkalom khon, metakʼme noa dan lạgitʼ sapṛao menakʼpea. Apeakʼ noa khaṛa monge onkoren ḍher hoṛkoe udgạu akatʼkoa.

³ Iń do noko boehakoń koletʼkoa jemon noa babotre ape ńutumte okaṭakʼ sarhaokʼakʼ menakʼtale ona onko ṭhen sạriyakʼ mente sạbudokʼ, ar cetʼ lekań menakatʼ onkage jemon ape do sạrige sapṛao akaepe tahen.

⁴ Ar baṅkhan Makedoniạren hoṛko iń sãoteko senlen khan ar begor sapṛao akanko ńellepe khan, enḍekhan apere aleakʼ nunạkʼ pạtiạu iạte ale do lajaorele paṛaokʼa; ar ape hõpe lajao ocokʼa.

⁵ Onate noko boehako lahare ape ṭhen calakʼ lạgitʼ nehõrako reakʼ jạruṛiń hudiskeda, jemon okaṭakʼ maraṅ dan emokʼ lạgitʼpe gokʼletʼ tahẽkan ona reakʼ onko do laharegeko sapṛao hataṛkakʼ. Ar ape ṭhen khon jormoṭte jãhãnakʼ do baṅ hataokʼa, bickom dan lekate okape emokʼ onage laha khon sapṛao dohokakʼpe.

Dan emokʼ reaṅ sikhạuna

⁶ Noa baḍaekakʼpe, okoe korocʼ moṭocʼkateye er, uni do korocʼ moṭocʼkatege ir hõe ira ar okoe ḍhere er uni do ḍhergeye ira.

⁷ Mimitʼ hoṛko monre okaṭakʼko goṭa akatʼ ona lekageko emokʼma; okoe hõ mon dukkate aloe emokʼma, ente kharsala monte emokʼkạnicʼge Isor doe dulạṛea.

⁸ Isor do joto secʼte dayawape reakʼ daṛe menakʼtaea, jemon apeakʼ oka jạruṛokʼ ona do jaoge tahentape; ar onate jemon joto lekan bhage kạmi lạgitʼ khulạsatepe dan daṛeakʼ.

⁹ Sonot sostorre olakana, chiṭiạukedae, reṅgecʼ orecʼkoe ematʼkoa; ar uniyakʼ dhorom do jaejug hạbicʼ tahẽ akae tahẽnkana.

¹⁰ Cacasicʼ lạgitʼ itạ ar jom lạgitʼ piṭhạ okoeye kulạu juṛạuetʼ, uni do erokʼ lạgitʼ itạ hõe kulạuapea are baḍhao ocoytapea; ar apeakʼ dhorom reakʼ phosole borket ocoytapea.

¹¹ Ape do joto secʼtegepe kisạ̃ṛokʼa jemon soṛa montepe dan daṛeakʼ, ar onatege ale hotete Isor do gun manao johare emocokʼa.

¹² Apeakʼ noa kạmi iạte eken Isorren hoṛkoakʼ ṭonṭa purunokʼtakoa ona do baṅ; Isor secʼ ạḍi utạr hoṛakʼ gun manao johar hõ sareṛokʼtakoa.

¹³ Ar apeakʼ noa dangeye sạbudetʼ kana je, ape do biswạsiko kanape mente, ar ona ńelte onko do Isorko sarhaoea, ente ape do Mạsi reaṅ bhage sombatrepe pạtiạu akante uni gobolrenpe hoyakana ar soṛa monte onko ar eṭakʼko jotope dan akawatʼkoa.

¹⁴ Isor ṭhen khon okaṭakʼ asambheṛ dayape ńamakatʼ ona ńutumte onko do goṭa ontorteko koeapea.

¹⁵ Ar oka dan reakʼ katha baṅ lạiyogokʼ ona dan ńutumte Isorakʼ sarhao baṛe hoyokʼtaema.