2 Korinthiko 8 - সান্তালী বাইবেল

Dan emokʼ reaṅ

¹ E boehako, Makedoniạ reakʼ manḍerkore Isor ṭhen khon oka daya ńamakan ona reaṅle baḍae ocoyetʼpea.

² Aema duk ar ạḍi okocʼ biḍạu talate ar reṅgecʼko tahẽkanre hõ onkoakʼ monre nunạkʼ rạskạ tahẽkana je, onko do asambheṛko danleda.

³ Iń do onko lạgitʼ noa gohań emeda je, onko do daṛeakʼ bhor, hẽ daṛeakʼ khon hõ bạ̃ṛtige apnar kusi lekako danletʼ tahẽkana.

⁴ Onko do ạḍi jid salakʼ ale ṭhenko nehõrlena jemon Isorren okoeko hoṛ reṅgecʼre menakʼko, onkoakʼ reṅgecʼ meṭaotako reakʼ kạmire jemon seledokʼ reakʼ ạtko ńam.

⁵ Alele aslen tahẽkan khonakʼ hõ bạ̃ṛtiko danleda; onko do pạhilre Probhu Isor ṭhen apnarko em maṛaṅena ar ona tayom do Isorakʼ sanaleka ale ṭhenko emleda.

⁶ Noa ńelte ale do bạ̃ṛtikaete Titusle nehõrade tahẽkana, dan reaṅ oka kạmi ale talareye ehopʼletʼ ona jemon uni doe purạugotʼkakʼ.

⁷ Jotowakʼge, metakʼme biswạs, Isorakʼ katha, akel, jid ar alere cetʼ leka apeakʼ asambheṛ dulạṛ menakʼ onkage jemon dan reakʼ gun hõ sareṛokʼ tape.

⁸ Noań hukumape kana ona do baṅa, menkhan eṭakʼkoakʼ jid reakʼ katha baḍae ocopeteń biḍạu aṭkaretʼ pea apeakʼ dulạṛ do tinạkʼgan khạṭi tapea mente.

⁹ Ape do aboren Probhu Jisu Mạsiyakʼ daya dan reakʼ kathape baḍaegea, uni do apnartetʼe kisạ̃ṛgere hõ ape khạtirteye reṅgecʼena, jemon uniyakʼ reṅgejokʼ hotete apepe kisạ̃ṛ daṛeakʼ.

¹⁰ Ape lạgitʼ okaṭakʼ bhageakʼkan ona reaṅ do ińiń bujhạuetʼkan lekageń baḍae ocoyetʼpea. Ar apege noa dan do calaoen bochor khon uṭhạupe ehopʼleda ar jid salakʼpe kạmileda.

¹¹ Menkhan ńitokʼ do ona kạmi purạutape. Ar oka khaṛa monte kạmi sanaletʼpe inạ khaṛa montege daṛeakʼ bhor purạugotʼkakʼpe.

¹² Jãhãe emokʼ reakʼ monejoṅakʼ tahentae khan enḍekhan uni oka menakʼtae ona lekage Isor do uniyakʼ dane ataṅtaea, ar oka bạnukʼtae ona do Isor hõ bae khojkana.

¹³ Eṭakʼko do sukre ar ape do dukrepe tahen ona do bạń khojkana, bickom ińakʼ monejoṅakʼ do okoe hõ jemon ṭonṭa alo tahentape.

¹⁴ Ńitokʼ apeakʼ oka sareṛokʼakʼko menakʼ ona hotete onkoakʼ ṭonṭa do cabakʼtakoa, ar onkoakʼ sareṛokʼakʼre apeakʼ ṭonṭa hõ meṭaokʼtapea, nonkate sanamkoakʼ dosa do somanokʼa.

¹⁵ Sonot sostorre olakana, “Okoe ḍherko halaṅketʼ onko do baṅ bạ̃ṛtilentakoa, ar okoe thoṛako halaṅketʼ onko hõ baṅ komaolentakoa.”

Titus Korinthiteye kol ocoyen

¹⁶ Ape lạgitʼ ińakʼ ontorre oka jid menakʼ, Isor do Titusakʼ ontorre hõ ona jidgeye emakatʼte Isoriń sarhaoedekana.

¹⁷ Titus do aleakʼ nehõre dohoakada, menkhan ona khon maraṅ katha do noage, uni do acʼakʼ kusi sana leka ạḍi jidkate ape ṭhene calakʼ kana.

¹⁸ Ale do Titus sãote armitʼ boehale kolekana. Jisu Mạsi reaṅ bhage sombat porcar kạmire nui boeha do joto manḍerrenko sarhaoede kana.

¹⁹ Niạ manḍerrenko hõ eken uniko sarhaoedea ona do baṅ, ale sãote noa dan idi lạgitʼ hõ manḍerrenko do uniko bachao akadea. Probhu Isor gunmanao joharae ar eṭakʼko goṛowako lạgitʼ khaṛa mon menakʼtaete ale do noa dan idi lạgitʼle goṭa akadea.

²⁰ Noa maraṅ dan hạṭińako babotre okoe hõ jemon ale upạrte jãhãnakʼ aloko bodnam daṛeakʼ onate nui boehale kolekana.

²¹ Ale do eken Probhu Isorakʼ mẽtʼãhã samaṅre do baṅ, menkhan manwa samaṅre hõ dhoromte calakʼ reakʼle kurumuṭuyeda.

²² Ona chaḍa onko tulucʼ aleren armitʼ boeha hõle kolekana. Uni do calakʼ lạgitʼe khaṛagea, ente ạḍi dhaole biḍạu aṭkar akadea; ar ape upạrte uniyakʼ do ńitokʼ ạḍi pạtiạu hoyakante calakʼe khaṛagea.

²³ Titus reaṅ okaṭakʼ memenakʼ menakʼtiń ona do noage, uni do ińren gate kanae ar iń tulucʼ ape lạgitʼe kạmiyeda. Ar eṭakʼ boehako reaṅ oka memenakʼ menakʼtiń ona do noage, manḍerrenko do unkin bachaokateko koletʼkinạ. Nukin boeha hotete Mạsiye ṭhonokokʼma.

²⁴ Onateń mena, onko ṭhen apeakʼ dulạṛ do sodortege sạbud ocoytape ar udukʼakope cedakʼ ale do ape iạtele sarhaokʼkana, ar manḍerrenko jemon onako ńelńam.